އަނުޝްކާ އާއި ވިރާތުގެ ދެވަނަ ޕާޓީ: މިފަހަރުވެސް ސަބްޔަސާޗީގެ ޑިޒައިނެއް

ބޮލީވުޑްގެ ތަރި އަނުޝްކާ ޝަރުމާ އާއި ކްރިކެޓް ކުޅުންތެރިޔާ ވިރާތު ކޯލީ ކައިވެނި ކޮށްފައި ވަނީ މިމަހުގެ 11 ވަނަ ދުވަހުގައެވެ.

އެ ދެމީހުން ކައިވެނި ކުރުމަށްފަހު ވަނީ މީގެ ކުރިންވެސް އިންޑިއާގެ ދިއްލީގައި ކައިވެނީގެ ޕާޓީއެއް ބާއްވާފައެވެ. އެ ޕާޓީގައި އިންޑިއާގެ ބޮޑުވަޒީރު ނަރެންދުރަ މޯދީ ވަނީ ބައިވެރިވަޑައިގަންނަވާފައެވެ.

އަނުޝްކާ އާއި ވިރާތުގެ ކައިވެނީގެ އުފަލުގައި ބާއްވާ ދެވަނަ ޕާޓީ ބާއްވާފައިވަނީ އަންގާރަ ދުވަހުގެ ރޭގައެވެ.

މި ޕާޓީގައި ގިނަ ބަޔަކު ލޮލުގައި އަޅައިގަތީ އަނުޝްކާ ލާފައިވާ ހެދުމަށެވެ. މި ފަހަރުގެ ހެދުންވެސް ޑިޒައިންކޮށްފައިވަނީ އިންޑިއާގެ މަޝްހޫރު ޑިޒައިނަރ ސަބްޔަސާޗީ މުކްރަޖީ އެވެ. އަނުޝްކާ އާއި ވިރާތުގެ ކައިވެނީގެ ހެދުންވެސް ޑިޒައިންކޮށް ފަހާފައިވަނީ ސަބްޔަސާޗީއެވެ.

މިމަހުގެ 21 ވަނަ ދުވަހު ދިއްލީގައި ބާއްވާފައިވާ ޕާޓީގައި ވެސް އަނުޝްކާ އާއި ވިރާތު ލާފައިވަނީ ސަބްޔަސާޗީ ޑިޒައިންކޮށް ފަހާފައިވާ ހެދުމެކެވެ.

އަނުޝްކާ އާއި ވިރާތުގެ ކައިވެނީގެ އުފަލުގައި ބާއްވާ އެންމެ ފަހުގެ ޕާޓީގައި އަނުޝްކާ ލައިގެން ހުރީ ރަންކުލައިގެ ހެދުމެކެވެ. އޭގެ މަތިން ކަނާތް ފަރާތަށް ދޯޕައްޓާއެއް އަޅާފައިވާއިރު އުނަގަނޑުގައި ވަނީ ބެލްޓެއް އަޅައިފައެވެ. ވިރާތު ލައިގެން ހުރީ ކަޅުކުލައިގެ ކުރުތާއެކެވެ.

މުމްބާއީގައި ބޭއްވި ޕާޓީއަށް ގޮސްފައިވާ ތަރިންގެ ތެރޭގައި އަމީތާބް ބައްޗަންއާއި، އަބީޝެކް، އައިޝްވަރިޔާ ރާއީ، ޝާހުރުކް ޚާން، ކެޓްރީނާ ކައިފް، ކަންގަނާ ރަނައުތު، ސައިފް އަލީ ޚާންގެ ދެ ދަރިންކަމަށްވާ އިބްރާހިމް އަދި ސާރާ އަލީ ޚާން ހިމެނެއެވެ. މީގެ އިތުރުން ސިދާތު މަލޯތުރާ، ވަރުން ދާވަން، ރޭކާ، މަދޫރީ، އަދި ކަރަން ޖޯހަރު ވަނީ ބައިވެރިވެފައެވެ. އަދި މީގެއިތުރުންވެސް ބޮލީވުޑްގެ ގިނަ ފަންނާނުންތަކެއް ވަނީ އަނުޝްކާއާއި ވިރާތުގެ ކައިވެނީގެ ޕާޓީ އިން ފެނިގެން ގޮސްފައެވެ.