ކުޅުދުއްފުށީ ހޮސްޕިޓަލް ހިންގަން ހަވާލުކުރީ ހުއްދަ ނެތް ބަޔަކާ، އެއްބަސްވުން ކުރިއަކަށް ނުގެންދެވޭނެ: މެމްބަރު ނަޝީދު
ހޮސްޕިޓަލް ހިންގުމުގެ އެއްބަސްވުމުގައި ސޮއިކޮށްފައި އޮތީ ދިވެއްސަކު ހިއްސާވާ ކުންފުންޏަކުން
ކުޅުދުއްފުށި ހޮސްޕިޓަލް
ކުޅުދުއްފުށީ ހޮސްޕިޓަލް ހިންގަން ހަވާލުކޮށްފައިވާ ކުންފުންޏަކީ ރާއްޖޭގައި ވިޔަފާރި ކުރުމުގެ ގާނޫނީ ހައިސިއްޔަތެއް އޮތް ބައެއް ނޫން ކަމަށް ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދު ވިދާޅުވެއްޖެއެވެ.
މެމްބަރު ނަޝީދު އޭނާގެ އަމިއްލަ ބްލޮގުގައި ލިޔުއްވާފައިވާ "ހުޅުވާލެވިފައިވާ ސިޓީގައި" ވިދާޅުވެފައި ވަނީ ކުޅުދުއްފުށީ ހޮސްޕިޓަލް ހިންގުމުގެ އެއްބަސްވުމުގައި ސޮއި ކޮށްފައި ވަނީ ރާއްޖޭގައި ރަޖިސްޓްރީކޮށްފައިވާ ދެ ހިއްސާދާރުން ތިބޭ ކުންފުންޏަކުން ކަމަށެވެ. އެނާ ވިދާޅުވެފައިވާ ގޮތުން އެ ކުންފުނީގެ އެއް ހިއްސާދާރުގެ 80 ޕަސެންޓް ޙިއްސާ އޮންނައިރު ދިވެހި މީހާގެ 20 ޕަސެންޓް ޙިއްސާ އޮވެއެވެ.
ނަޝީދު ވިދާޅުވެފައިވާ ގޮތުގައި ކުޅުދުއްފުށީ ހޮސްޕިޓަލް ހިންގުމުގެ އެއްބަސްވުގައި ސޮއިކޮށްފައި އޮތް ކުންފުނީގެ 80 ޕަސެންޓް އޮތީ އިންޑިޔާގެ ނިމްސް ހޮސްޕިޓަލް ހިންގާ "ނޫރުލް އިސްލާމް އެޑިއުކޭޝަނަލް ޓްރަސްޓް" ކިޔާ އިންޑިޔާގައި ރަޖިސްޓްރީކޮށްފައިވާ ޓްރަސްޓެއްގައެވެ. އެއީ، ކިޔަވައިދޭ ތަފާތު މަރުކަޒުތައް ހިންގުމަށް މީގެ އަހަރުތަކެއް ކުރިން އުފައްދާފައިވާ ޓްރަސްޓެއް ކަމަށާއި ނޫރުލް އިސްލާމް މެޑިކަލް ސައިންސްގެ ނަމުގައި ކިޔަވައިދޭ ކޮލެޖާއި ނިމްސް މެޑިސިޓީގެ ނަމުގައި ހޮސްޕިޓަލް ހިންގަނީ ވެސް އެ އެ ޓްރަސްޓްގެ ދަށުން ކަމަށް ނަޝީދު ވެސް ފާހަގަ ކުރައްވާފައިވެއެވެ.
ނަޝީދު ހާމަކުރައްވާފައިވާ ގޮތުގައި ކުޅުދުއްފުށީ ހޮސްޕޮޓަލް ނިމްސްއާ ހަވާލުކުރި ކަމަށް ބުނި ނަމަވެސް އެއްބަސްވުމުގައި ސޮއިކޮށްފައި ވަނީ ޢަލީ އުސެއިދު ކިޔާ ދިވެއްސަކަށް 20 ޕަސެންޓް އޮންނަ ކުންފުންޏަކުން ކަމަށެވެ. އޭނާއަކީ، އެ ކުންފުނީގެ ޑައިރެކްޓަރެއް ކަމަށާއި އޭނާގެ އިތުރުން، ކުންފުނީގެ ފަރާތުން ރަށުގައި ހުންނަވަނީ، ޢަލީ އުސެއިދުގެ ދަރިކަނބަލެއް ކަމަށް ވެސް ނަޝީދު ފާހަގަ ކުރައްވާފައިވެއެވެ.
ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދު
ނަޝީދު ވިދާޅުވީ މިހާރު މަޢުލޫމާތު ލިބޭ ގޮތުން، ނޫރުލް އިސްލާމް އެޑިއުކޭޝަނަލް ޓްރަސްޓަކީ، އިންޑިޔާއިން ބޭރުގައި އިންވެސްޓްކޮށް، ވިޔަފާރި ނަފާ ހޯދުމަށް އިންޑިޔާގެ ރިޒަރވް ބޭންކް އޮފް އިންޑިޔާއިން ހޯދަންޖެހޭ "އާރް.ބީ.އައި އެޕްރޫވަލް" އޮތް ބައެއް ނޫނެވެ. އެ ކުންފުންޏަކީ ނަފާ ހޯދުމަށް ނުވާ ގޮތަށް އިންޑިޔާގައި މަސައްކަތްކުރުމަށް ރަޖިސްޓްރީ ކޮށްފައިވާ "ޗެރިޓަބްލް ޓްރަސްޓެއް" ކަމަށް ނަޝީދު ވިދާޅުވެފައިވެއެވެ.
އެހެންކަމުން، އެމީހުންނަށް ރާއްޖޭގައި ކުންފުންޏެއް އުފައްދައި، ހޮސްޕިޓަލެއް ހިންގައި، އާމްދަނީ އާއި ނަފާ ހޯދުމަކީ، ހުއްދަ ކަމެއް ނޫން ކަމަށާއި އަދި އެއީ ކުރެވޭނެ ވެސް ކަމެއް ނޫން ކަމަށް ވިދާޅުވެފައި ވެއެވެ.
" މާނައަކީ، މިހާތަނަށް ދިވެހި ސަރުކާރާއެކު މަޝްވަރާކޮށް، ހުށަހެޅުން ހުށަހަޅައި، ކުންފުންޏެއް އުފައްދައި، އާމްދަނީ އާއި ނަފާ ލިބޭ ގޮތަށް ދިވެހި ސަރުކާރުން ހޮސްޕިޓަލެއް ހިންގަން ޙަވާލުކުރި ކުންފުންޏަކީ، ނުވަތަ އެ ކުންފުނީގެ މައިގަނޑު ޙިއްސާދާރަކީ، ރާއްޖޭގައި ވިޔަފާރިކުރުމުގެ ޤާނޫނީ ޤަބިލުކަން އޮތް ބައެއް ނޫނެވެ." ގާނޫނީ ވަކީލް ނަޝީދު ވިދާޅުވެފައިވެއެވެ.
މީގެ އިތުރުން ނަޝީދު ވިދާޅުވެފައި ވަނީ މިކަންކަން އެނގުމުން، ހުއްދަ ނެތް ބަޔަކާ އެކު ކުރިއަށްދެވޭނެ ގޮތެއް ނޯންނާނެއެވެ. އިތުރަށް ތަފްސީލް ކޮށްދެއްވަމުން ނަޝީދު ލިޔުއްވާފައި ވަނީ ރާއްޖޭގެ ކުންފުންޏާ ބެހޭ ޤާނޫނު ބުނާ ގޮތުން، ކުންފުންޏެއް އުފެއްދެނީ، ދެ ޙިއްސާދާރުންގެ މައްޗަށް ކަމަށާއި އެކަކީ، ޙިއްސާދާރަކަށްވުމުގެ ޤާނޫނީ ޤާބިލުކަން ނެތް ފަރާތެއް ނަމަ، އެ ކުންފުނީގައި ދެ ޙިއްސާދާރުން ތިބި ކަމަށް ނުބެލެވެނެ ކަމަށް ގަބޫލު ކުރައްވާ ކަމަށެވެ.
ކުޅުދުއްފުށީ ހޮސްޕިޓަލް ހިންގުމަށް ނޫރުލް އިސްލާމް އިންޓަނޭޝަނަލް ހިއްސާވާ ކުންފުންޏަކަށް ހަވާލުކުރީ 50 އަހަރަށެވެ.
ކުޅުދުއްފުށީ ހޮސްޕިޓަލް ބޭރުގެ ކުންފުންޏަކާ ހަވާލުކުރުމަށް ބޭއްވި ރަސްމިޔާތުގައި ހެލްތު މިނިސްޓަރު އަބްދުﷲ ނާޒިމް ވިދާޅުވެފައި ވަނީ ދިގު މުއްދަތަކަށް ކުޅުދުއްފުށީ ހޮސްޕިޓަލް ހިންގުން އެ ކުންފުޏްޏަކާ ހަވާލުކުރީ، އެތަނުން ހުށަހެޅި ޕްރޮޕޯސަލަށް ސޯޝަލް ކައުންސިލްގައި މަޝްވަރާކުރުމަށް ފަހުގައި ކަމަށެވެ. އެ އެއްބަސްވުމުގެ ދަށުން ނިމްސް އަށް ގިނަ ފައިދާތަކެއް ލިބިގެން ދެއެވެ. އެގޮތުން ދިވެހި ސަރުކާރުން ކުޅުދުއްފުށީ ހޮސްޕިޓަލާއި، ދެ ފަޅުރަށް ދިނީ މެޑިކަލް އެޑިއުކޭޝަން ސެންޓަރަކާއި، ޖެނެޓިކް ރިސާޗް ސެންޓަރަކާއި، އޭވިއޭޝަން އެކެޑަމީއަކާއި، މެރިން އިންޖިނިއަރިން ކޮލެޖަކާއި، ފަރުވާދޭ ސެންޓަރެއް ހެދުމަށެވެ.
އެއްބަސްވުން ބާޠިލުކުރަން ޖާއިޒު ސަބަބުތަކެއް ސަރުކާރަށް ލިބިގެންވީ ނަމަވެސް، އެކަން ކުރެވެން އޮތީ، ދިގު މަރުޙަލާތަކެއް ކަޑައްތުކޮށްގެން، ގިނަ އިޖުރާޢަތުތަކެއް ފުރިހަމަކޮށްގެން ކަމަށް ވެސް މެމްބަރު ނަޝީދު ފާހަގަކުރައްވާފައި ވެއެވެ. އެހެންނަމަވެސް، އެ ކުންފުނިން ބޭނުން ކަމަށްވާ ނަމަ، ވަރަށް ފަސޭހައިން އެއްބަސްވުން ނިމުމަކަށް ގެނައުމަށް ބޭނުންކުރެވިދާނެ މާއްދާއެއް އެބަ އޮތް ކަމަށާއި އެއީ އެއްވެސް ސަބަބަކާ ނުލައި ނަމަވެސް، ހިންގަން ބޭނުން ނުވެގެން ދޫކޮށްލުމަށް މަގުފަހިކުރާ މާއްދާ ކަމަށް އޭނާ ލިޔުއްވާފައިވެއެވެ.
މެންބަރު ނަޝީދު ވަނީ މި ނޫނަސް އެއްބަސްވުމާ ގުޅޭ އެތައް ކަމެއް ފާހަގަކުރައްވައި ކުޅުދުއްފުށީ ހޮސްޕިޓަލް ހިންގުމުގައި ހުރި ގިނަ ކަންތައްތަކެއް ފާހަގަކުރައްވާފައެވެ.
