ގައުމީ މަސްލަހަތައްޓަކައި ހަތަރު ފިކުރުގެ ސިޔާސީ ޕާޓީތައް މިވަނީ ގުޅިފައި، މިއީ ހަގީގީ އެއްބައިވަންތަކަމަކީ: ޔުމްނާ
27 ޑިސެމްބަރު 2017 | ބުދަ 02:30ރައްޔިތުން އެއްބައިވަންތަ ކުރުވުމަށްޓަކައި އެންމެ އިސް ރޯލެއް އަދާކުރައްވަން ޖެހިވަޑައިގަންނަވާނީ ގައުމުގެ ރައީސް
ރައީސް މައުމޫންގެ ދަރިކަނބަލުން ޔުމްނާ މައުމޫން
ގައުމީ މަސްލަހަތައްޓަކައި ހަތަރު ފިކުރުގެ ސިޔާސީ ޕާޓީތައް ގުޅިފައިވާ ކަމަށާއި ހަގީގީ އެއްބައިވަންތަކަމަކީ އެއީ ކަމަށް އަދި ރައީސް މައުމޫންގެ ދަރިކަނބަލުން ޔުމްނާ މައުމޫން ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން އަންގާރަ ދުވަހު ކުނޫޒުގައި ބޭއްވި ޕެނަލް ޑިޝްކަޝަންގައި ވާހަކަ ދައްކަވަމުން ޔުމްނާ ވަނީ އިދިކޮޅު ސިޔާސީ ހަތަރު ލީޑަރުން އެއްބައިވަންތަކަމާ އެކު މަސައްކަތް ކުރައްވާތީ ޝުކުރު އަދާކުރައްވާފައެވެ.
"އަޅުގަނޑުމެން މިތިބީ ހަތަރު ފިކުރުގެ ސިޔާސީ ޕާޓީތައް ގުޅިގެން ގައުމީ މަސްލަހަތުގައި މަސައްކަތް ކުރަން. މިއީ ދެއްތޯ އެއްބައިވަންތަ ކަމަކީ ހަގީގަތުގައި. އެހެންކަމުން އަޅުގަނޑުމެންގެ ހަތަރު ލީޑަރުންނަށް އަޅުގަނޑު ތައުރީފު އަރުވަން ހަގީގަތުގައި މިކަހަލަ ދަނޑިވަޅެއްގައި އަމިއްލަ ފިކުރުތައް އެއްފަރާތް ކުރައްވައި އެއްބައިވަންތަކަމާ އެކީ މަސައްކަތް ކުރައްވާތީ. އެހެން ސިޔާސީ ލީޑަރުން ވެސް ފާހަގަކުރައްވައިފި އަމިއްލަ މަސްލަހަތަށް ވުރެން ބޮޑަށް ގައުމީ މަސްލަހަތު އިސްކުރުމުގެ މުހިންމުކަން،" ޔުމްނާ ވިދާޅުވިއެވެ.
މި ޕެނަލް ޑިޝްކަޝަންގައި ވާހަކަ ދައްކަވަމުން ޔުމްނާ ވަނީ ސަރުކާރުގެ ފަރާތުން އެއްބައިވަންތަކަމުގެ ދުވަހުގައި ބޭއްވި ޖަލްސާގައި ރައީސުލް ޖުމްހޫރިއްޔާ އަބްދުﷲ ޔާމީން ބައިވެރިވެވަޑައި ނުގަންނަވާކަން ފާހަގަކުރައްވާފައެވެ. އަދި ރައްޔިތުން އެއްބައިވަންތަ ކުރުވުމަށްޓަކައި އެންމެ އިސް ރޯލެއް އަދާކުރައްވަން ޖެހިވަޑައިގަންނަވާނީ ގައުމުގެ ރައީސް ކަމަށް ވެސް އޭނާ ވިދާޅުވިއެވެ.
ދިވެހިރާއްޖެ ބާރު ސްޕީޑެއްގައި ތަރައްޤީވަމުންދާ ކަމަށް ރައީސް ޔާމީންގެ ސަރުކާރުން ބުނަމުންދާއިރު ރާއްޖެ ތަރައްގީވަމުންދަނީ ގައުމުގައި އަދުލު އިންސާފެއް ނެތި، އިދިކޮޅު ސިޔާސީ ފަރާތްތަކަށް ހިޔާލުފާޅު ކުރުމުގެ މިނިވަން ކަމެއް ވެސް ނެތި ކަމަށާއިއެންމެހާ ރައްޔިތުންގެ ހައްގުތަކަށް ހުރުމަތްތެރިކޮށް ހިތުމެއް ވެސް ނެތި ކަމަށް ޔުމްނާ ވިދާޅުވިއެވެ.
