2018 ގައި އަދަބު ދޭނަން، ރައީސްގެ ކަންފަތްފުޅުން މަޑުނަންގަވާ: ރިޔާޒު
25 ޑިސެމްބަރު 2017 | ހޯމަ 11:33ސިޔާސީ ވެރިން ބަންދުކޮށްފައި ވަނީ ގާނޫނާއި ހިލާފަށް
ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒު
ވަކި ތަނެއްގައި މުޒާހަރާ ނުކުރެވިގެން، ނުވަތަ ވަކި މީހަކު ބަންދުގައި ހުރެގެން، އެވާހަކަ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އާއި ހަމައަށް ގެންދާނަމަ އެ ބަޔަކަށް ޖެހޭނީ ވަރަށް ފުނާއި ޖެހެންދެން އެމަނިކުފާނުގެ ކަންފަތްޕުޅުން މަޑު ނަގަން ކަމަށް އެމަނިކުފާނު ވިދާޅުވުމުން ޖުމްހޫރީ ޕާޓީގެ ޑެޕިއުޓީ ލީޑަރ އަބްދުﷲ ރިޔާޒު އެކަމަށް ރައްދުދެއްވައިފިއެވެ.
ރާއްޖޭގެ އުތުރުގެ ބައެއް އަތޮޅުތަކަށް ރައީސް ޔާމީން ކުރައްވާ ދަތުރުފުޅުގައި ނ. ހެނބަދޫއަށް ވަޑައިގެން ރައްޔިތުނާއި މުޚާތަބު ކުރައްވާ ރައީސް ޔަމީން ވިދާޅުވީ، ފެއްސާއި ރަތާއި ހުދު ހިފައިގެން ޤައުމީ ކަންކަމުގައި ވާހަކަ ދެއްކުމަށް އެމަނިކުފާނާއި ހަމައަށް ގޮސްފިނަމަ، އެމަނިކުފާނުގެ ކަންފަތްޕުޅު ވަރަށް ތޫނު ވާނެ ކަމަށެވެ. ނަމަވެސް، ވަކި ތަނެއްގައި މުޒާހަރާ ނުކުރެވިގެން، ނުވަތަ ވަކި މީހަކު ބަންދުގައި ހުރެގެން، އެވާހަކަ ހިފައިގެން ރައީސް ޔާމީނާއި ހަމައަށް ގޮސްފިނަމަ، އެ ބަޔަކަށް ޖެހޭނީ ވަރަށް ފުނާ ޖެހެންދެން އެމަނިކުފާނުގެ ކަންފަތްޕުޅުން މަޑު ނަގަން ކަމަށް އެމަނިކުފާނު ވިދާޅުވިއެވެ.
ރައީސްގެ ވާހަކަފުޅަށް ރައްދު ދެއްވަމުން ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު ރިޔާޒު ކުރެއްވި ޓްވީޓެއްގައި ވިދާޅުވީ ގާނޫނުތަކާއި ހިލާފަށް ފަނޑިޔާރުގެއަށް ނުފޫޒުފޯރުވައިގެން ސިޔާސީ ބޭފުޅުން ބަންދު ކުރުމުން އެވާހަކަ ދައްކަވާނެ ކަމަށެވެ. އަދި ރައްޔިތުންގެ އަޑުނޭހުމުގެ އަދަބު ރައްޔިތުންގެ މަންދޫބުން މިހާރުވެސް ރައީސް ޔާމީނަން ދީފައިވާ ކަމަށް ރިޔާޒު ވިދާޅުވިއެވެ.
އެހެންކަމުން ކުރިއަށް އޮތް ރިޔާސީ އިންތިހާބްގައި ރައްޔިތުން އަދަބު ދޭނެ ކަން ފާހަގަ ކުރައްވަމުން ރިޔާޒު ވަނީ ރައީސް ޔާމީންގެ ކަންފަތްޕުޅުން މަޑުނެންގެވުމަށް އިލްތިމާސް ކުރައްވައިފައެވެ.
"2018ގެ އިންތިހާބުގައި ރައްޔިތުން ވެސް އަދަބު ދޭނެ، ކަންފަތުން މަޑު ނަންގަވާ ސާފުކުރައްވާ،" ރިޔާޒު ވިދާޅުވި އެވެ.
