މި ސަރުކާރުން މަސައްކަތްކުރަނީ ލާމަރުކަޒީ ނިޒާމު ފުނޑާލަން: މުޖުތަބާ
ސަރުކާރުން މަސައްކަތް ކުރަމުން ގެންދަނީ ވަކި މީހެއްގެ އަތް މައްޗަށް ބާރުތައް އެއްކުރަން
އަހުމަދު މުޖުތަބާ ފަލަސުރުހީގައި ބައިވެރިވެ ވަޑައިގަންނަވަނީ
މި ސަރުކާރުން މަސައްކަތް ކުރަމުން ގެންދަނީ ލާމަރުކަޒީ ނިޒާމު އެއްކޮށް ފުނޑާލުމަށް ކަމަށް އެމްޑީޕީ ސަރުކާރުގެ ސްޓޭޓް މިނިސްޓަރު އަހުމަދު މުޖުތަބާ ވިދާޅުވެއްޖެއެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަ ދައްކަވަމުން މުޖުތަބާ ވިދާޅުވީ ލާމަރުކަޒީ ނިޒާމު ހިނގައިގަންނަން ބޭނުންވި އެންމެ މުހިންމު ދަނޑިވަޅުގައި ސަރުކާރު ވައްޓާލެވުނު ކަމަށެވެ. އަދި މި ސަރުކާރު އައުމަށް ފަހު މަސައްކަތް ކުރަމުންދަނީ މުޅި ނިޒާމު އެއްކޮށް ބަދަލުކޮށް އެ ފުނޑާލުން ކަމަށް ވެސް މުޖުތަބާ ވިދާޅުވިއެވެ.
ހަމައެހެންމެ މި ސަރުކާރުން މަސައްކަތް ކުރަމުން ގެންދަނީ ވަކި މީހެއްގެ އަތް މައްޗަށް ބާރުތައް އެއްކުރަން ކަމަށާއި ލާމަރުކަޒީ ނިޒާމު މިހާރު އޮތް ހާލަތަކީ ރައީސް މައުމޫނުގެ ދުވަސްވަރު އޮތް ވަރަށް ވުރެ ވެސް ގޯސް ހާލަތެއް ކަމަށް މުޖުތަބާ ވިދާޅުވިއެވެ.
މި ޕްރޮގްރާމްގައި ވާހަކަ ދައްކަމުން މުޖުތަބާ ވިދާޅުވީ މިހާރު މި އަންނަމުންދާ ތަރައްގީއަކީ ދެމެހެއްޓެނިވި ތަރައްގީއެއް ނޫން ކަމަށާއި މިހާރުގެ ސަރުކާރުން ތަރައްގީ މި ގެންނަނީ ދިވެހިން ދަރަނިވެރި ކުރުވައިގެން ކަމަށެވެ. އަދި މިކަމުގެ ސަބަބުން މުސްތަގުބަލުގައި މި ދަރަނި އަދާކުރުމަށް ދިވެހި ރައްޔިތުން ބޮޑެތި ގުރުބާނީތަކެއް ވާން ޖެހޭނެ ކަމަށް ވެސް މުޖުތަބާ ވިދާޅުވިއެވެ.
