ކަނޑު ގަދަވާނެތީ މޫސުމަށް ސަމާލުވާން އިލްތިމާސް ކޮށްފި
24 ޑިސެމްބަރު 2017 | އާދީއްތަ 14:26ނ. އަތޮޅުން ފެށިގެން ތ. އަތޮޅާއި ދެމެދު އަތޮޅުތަކުގެ ކަނޑުތައް ގަދަވާނެ
ރާއްޖޭގެ ދެކުނުގެ އަތޮޅުތަކުގެ މައްޗަށް ވިލާތައް ޖަމާވާ މަންޒަރު ފެންނަ ސެޓެލައިޓް ފޮޓޯއެއް
ނ. އަތޮޅުން ފެށިގެން ތ. އަތޮޅާއި ދެމެދު އަތޮޅުތަކުގެ ކަނޑުތައް ގަދަވާނެ ކަމަށް ލަފާކުރެވޭތީ ކަނޑުތައް ގަދަ ހިސާބުތަކުގައި މޫސުމަށް ސަމާލުވުމަށް މޫސުމާއި ބެހޭ ޤައުމީ އިދާރާއިން އިލްތިމާސް ކޮށްފިއެވެ.
މެޓް އޮފީހުން ބުނީ އެހެން ހިސާބުތަކުގެ ކަނޑުތައް އާދައިގެވަރަކަށް މަޑުވެފައި ވިލާގަނޑުގައި އާދައިގެ ވަރަކަށް ގަދަވާނެ ކަމަށެވެ.
ކުރިއަށް އޮތް 24 ގަޑިއިރަށް ރާއްޖޭގެ މޫސުން ކުރިއަށް ލަފާކުރާ ގޮތަށް ބަލާއިރު، މެދުތެރެއާއި ދެކުނުގެ އެކިހިސާބަށް ވިއްސާރަކޮށް ގުގުރުން އެކަށީގެންވާ ކަމަށާއި، ދެކުނުގެ ބައެއް ރަށްތަކަށް ބޯކޮށް ވާރޭވެހޭނޭ ކަމަށް ލަފާކުރެވޭކަމަށް މެޓް އޮފީހުން ބުނެއެވެ. މީގެ އިތުރުން އުތުރުގެ ބައެއް ރަށްތަކަށް ކެރީގެ އަސަރުފޯރާނެކަމަށް ވެސް މެޓް އޮފީހުން ލަފާކުރެއެވެ.
ވައި ޖެހޭ މިންވަރަށް ބަލާއިރު، ނ. އިން ފެށިގެން ތ. އާއި ދެމެދު އަތޮޅުތަކަށް އިރުއުތުރުން ގަޑިއަކު 13 މޭލާ 20 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި، އެހެންހިސާބު ތަކަށް ވައިޖެހެމުން ދާނީ ގަޑިއަކު 5 މޭލާ 15 މޭލާ ދެމެދުގެ ބާރުމިނުގައި، އެންމެއުތުރު އަތޮޅުތަކަށް އިރުއުތުރާއި އިރުން އަދި ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން ކަމަށް މެޓް އޮފީހުން ބުނެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވާނެ ކަމަށް ލަފާކުރެވޭކަމަށް ވެސް މެޓް އޮފީހުން ބުނެއެވެ.
މޫސުން ގޯސްވުމުގެ ސަބަބުން މިއަދު މެންދުރު މެދުރާއްޖެތެރެއާއި ދެކުނުގެ އަތޮޅުތަކަށް ވައިޓް އެލަރޓް ވެސް ނެރެފައިވެއެވެ.
