އޭސީ މިލާނަށް ކުޅެމުން އަންނަ ލިއަނާޑޯ ބޮނުޗީ ޗެލްސީ އަށް ގެނައުމަށް އެ ކްލަބުގެ ކޯޗު އެންޓޯނިއޯ ކޮންޓޭ މަސައްކަތްކުރަމުން އަންނަ ކަމަށް ރިޕޯޓްތައް ބުނެފިއެވެ.
މަޝްހޫރު ކުޅިވަރު މަޖައްލާއެއް ކަމަށްވާ ޓުޓޯ ސްޕޯޓް އިން ބުނީ ބޮނުޗީ އޭސީ މިލާންގައި ހުރީ ހިތްހަމަޖެހިގެން ނޫން ކަމަށެވެ. އެގޮތުން އޭނާ ޗެލްސީ އަށް ގެނައުމަށް ކުރިން އެޓީމުގެ އެންޓޯނިއޯ ކޮންޓޭ މަސައްކަތް ކުރަމުން އަންނަ ކަމަށެވެ.
މީގެކުރިން އިޓަލީގައި ބޮނުޗީ އަށް އިރުޝާދު ދިން ކޮންޓޭ ވަނީ އޭނާއާ ވާހަކަދައްކާފައި ކަމަށާއި، ކުރިޔަށް އޮތް ސީޒަނުގައި އޭނާ ޗެލްސީ އަށް ގެނައުމަށް މަޝްވަރާކޮށްފައިވާ ކަމަށެވެ.
އިންޓަ މިލާނުން ކެރިޔަރު ފެށި އުމުރުން 30 އަހަރުގެ ބޮނުޗީ ހޯދުމަށް ގިނަ ކްލަބްތަކުން އަންނަނީ މަސައްކަތްކުރަމުންނެވެ. އޭގެ ތެރޭގައި ސްޕެއިންގެ ކްލަބްތައްވެސް ހިމެނެއެވެ. އެހެން ނަމަވެސް ބޮނުޗީ ޓްރާންސްފާއާ ގުޅޭގޮތުން އަދި އެއްވެސް އެއްޗެއް ނުބުނެއެވެ.
ޔުވަންޓަސް އިން ވިދާލި ބޮނުޗީ ވަނީ އެޓީމަށް ހަތް ސީޒަން ކުޅެފައެވެ. އެވީ މުއްދަތުގައި އޭނާ ވަނީ އެ ކްލަބަށް ކުޅުނު 319 މެޗުގައި 19 ލަނޑު ކާމިޔާބުކޮށްފައެވެ. އޭނާ ވަނީ އެ ކްލަބާއެކު ހަ ލީގު ތައްޓާއި، ތިން ކޮޕާ އިޓަލިއާ އާއި ތިން އިޓާލިއާން ސުޕާ ކަޕް އަދި ދެ ފަހަރެއްގެ މަތިން ޔުއެފާ ޗެމްޕިއަންސް ލީގުގެ ދެވަނަ ހޯދާފައެވެ.
ޔުވަންޓަސްއާއެކު ކާމިޔާބީތައް ހޯދުމަށް ފަހު، އޭނާ އޭސީ މިލާނަށް ބަދަލުވީ މި އަހަރުގެ ޖުލައި މަހެެވެ. އޭނާ އެ ކްލަބަށް ބަދަލުވީ 40 މިލިއަން ޔޫރޯގެ އަގަކަށެވެ. އޭނާ ވަނީ މިހާތަނަށް އެ ޓީމަށް 23 މެޗު ކުޅެދީފައެވެ.
އިޓާލިއަން ލީގުގެ މޮޅު ކުޅުންތެރިޔާގެ މަގާމުވެސް ހޯދާފައިވާ ބޮނުޗީ ވަނީ އިޓަލީ ގައުމީ ޓީމަށް އޭނާ ކުޅުނު 75 މެޗުގައި ފަސް ލަނޑު ކާމިޔާބުކޮށްފައެވެ. އޭނާ ވަނީ އިޓަލީ ގައުމީ ޓީމާއެކު ފީފާ ކޮންފެޑެރޭޝަންސް ކަޕްގެ ބްރޯންޒް މެޑަލް ހޯދުމުގެ އިތުރުން ޔޫރޯގެ ރަނަރަޕްކަންވެސް ހޯދާފައެވެ.
