ގުދުސްގެ މައްސަލައިގައި ނަގާ ވޯޓް: ދެކޮޅަށް ވޯޓް ދޭ ގައުމުތަަކަށް އެހީ ކަނޑާލާނެކަމަށް އެމެރިކާ އިންޒާރުދީފި

އިސްރާއީލުގެ ވެރިރަށުގެ ގޮތުގައި ގުދުސް ބަލައިގަތުމަށް އެމެރިކާއިން ނިންމި ނިންމުމާ ދެކޮޅަށް އދގެ އާއްމު މަޖިލީހުގައި ނަގާ ވޯޓްގައި އެމެރިކާއާ ދެކޮޅަށް ވޯޓްދޭ ގައުމުތަކުގެ "ނަންތައް ނަގާނެ" ކަމަށް އެ ގައުމުން ބުނެފިއެވެ.

އެމެރިކާއިން އދއަށް ކަނޑައަޅުއްވާފައި ހުންނަވާ ދާއިމީ މަންދޫބު ނިކީ ހޭލީ ވަނީ ބުރާސްފަތި ދުވަހު ނަގާ ވޯޓުގައި އެ ގައުމާ ދެކޮޅަށް ވޯޓްދޭ ގައުމުތައް ރައީސް ޓްރަމްޕްއަށް އެންގެވުމަށް ޓްރަމްޕް އަންގަވާފައިވާކަމަށް ވިދާޅުވެ އިންޒާރުދެއްވާފައެވެ.

މިހާރު ޑްރާފްޓްކޮށްފައިވާ ގަރާރުގައި ސީދާ އެމެރިކާގެ ނަމެއް ބުނެފައިނުވާއިރު ގަރާރުގައި ބުނެފައިވަނީ ގުދުސްއާމެދު ނިންމާފައިވާ އެއްވެސް ނިންމުމެއް އޮތްނަމަ އެ ނިންމުމެއް ބާތިލްކުރުމަށެވެ.

ހޯމަ ދުވަހު ސަލާމަތީ މަޖިލީހުގައި ނެގި މިފަދަ ވޯޓެއް އެމެރިކާއިން ވަނީ ވީޓޯކޮށްފައެވެ.

އިސްރާއީލްގެ ވެރިރަށަކީ ގުދުސްކަމަށް އެމެރިކާއިން ބަލައިގަތްގަތުމާ ދެކޮޅަށް އދ. ގެ އާއްމު މަޖިލީހުގައި ގަރާރެއް ފާސްކުރުމަށް އިސްނެގީ ތުރުކީ ކަމަށްވާއިރު އެގައުމަށް ތާއިދުކޮށްފައިވަނީ ޔަމަނުންނެވެ.

ގުދުސްގެ މައްސަލައިގައި ސަލާމަތީ މަޖިލީހަށް ހުށަހެޅި ގަރާރަށް ވޯޓަށް އެހުމުގެ ކުރިންވެސް ތުރުކީއިންވަނީ އެ ގަރާރު އެމެރިކާއިން ވީޓޯކުރާނެކަން ކަށަވަރުވާކަމަށް ބުނެ އާއްމު މަޖިލީހަށް ގަރާރެއް ހުށަހަޅާނެކަމަށް ބުނެފައެވެ.

އެ ގަރާރަކީ "ހުރުމަތްތެރިވެގެންވާ ގުދުސްގައި އެއްވެސް ގައުމަކުން ޑިޕްލޮމެޓިކް މިޝަނެއް ގާއިމް ނުކުރުމަށް" ގޮވާލާފައިވާ ގަރާރެކެވެ.

އދ. ގެ އެންމެ އިސް އެއް ގުނަން ކަމަށްވާ ސަލާމަތީ މަޖިލީހުގައި ހިމެނޭ ވީޓޯކުރުމުގެ ބާރު އޮންނަ ދާއިމީ ފަސް ގައުމުގެ ތެރެއިން އެއް ގައުމަކީ އެމެރިކާއެވެ.

އެމެރިކާގެ ޒަމާންވީ ސިޔާސަތު ދޫކޮށްލައްވައި އަދި ބައިނަލްއަޤްވާމީ މުޖުތަމައުން އަބަދުވެސް ގަބޫލުކުރަމުން އަންނަ ހަމަތަކާ ޚިލާފަށް ގުދުސްއަކީ އިސްރާއީލްގެ ވެރިރަށް ކަމަށް ބަލައިގަތުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމަވާފައި ވަނީ ޑިސެމްބަރުމަހުގެ 6 ވަނަ ދުވަހުއެވެ.

ތުރުކީ އިން އާއްމު މަޖިލީހަށް ހުށަހަޅާފައިވަނީ އދ. އިން މީގެ ކުރިން ފާސްކޮށްފައިވާ ގަރާރެއް ކަމަށްވާ 377-އޭ ނުވަތަ އާއްމުކޮށް ކިޔާ ގޮތުން ނަމަ "ޔުނައިޓިންގް ފޯރ ޕީސް"ގެ ދަށުން ހުށަހަޅާ ގަރާރެކެވެ.

އދ. އިން 1950 ވަނަ އަހަރު ފާސްކުރި، މި ގަރާރަކީ ސަލާމަތީ މަޖިލީހުގެ އެންމެ އަސާސީ ޒިންމާ ކަމަށްވާ ސުލްހަ އާއި ސަލާމަތްތެރިކަން ދެމެހެއްޓުމަށް އެ ކައުންސިލް ނުކުޅެދިއްޖެ ނަމަ އާއްމު މަޖިލީހުން އެ ކަމާ މެދު ގޮތެއް ނިންމުމާ ބެހޭ ގަރާރެވެ.

އާއްމު މަޖިލީހުގައި މި ގަރާރު ފާސް ވާނީ އެންމެ މަދުވެގެން ތިންބައިކުޅަ ދެބައި މެމްބަރުންގެ ވޯޓް ލިބިގެންނެވެ. ތުރުކީގެ ފޮރިން މިނިސްޓްރީ އިން ވާހަކަދެއްކެވި ފަރާތުން ވިދާޅުވީ އެ އަދަދަށް ވޯޓް ހަމަކުރެވިފައިވާ ކަމަށާއި ނަމަވެސް ތުރުކީ އާއި އޯގަނައިޒޭޝަން އޮފް އިސްލާމިކް ކޯޕަރޭޝަނު މަސައްކަތްކުރަމުން ދަނީ އެ އަދަދު އިތުރުކުރުމަށް ކަމަށެވެ.

ފަލަސްތީނުން އދއަށް ކަނޑައަޅުއްވާފައިވާ ދާއިމީ މަންދޫބު ރިޔާދް މަންސޫރު ވިދާޅުވީ އެ ގަރާރަށް ފުރިހަމައަށް ތާއީދު ލިބޭނެކަމަށް އުއްމީދު ކުރައްވާކަމަށެވެ. ނަމަވެސް އެމެރިކާގެ މަންދޫބު ނިކީ ހޭލީ އަންގާރަދުވަހު މެމްބަރު ގައުމުތަކުގެ ބައެއް މަންދޫބުންނަށް ފޮނުއްވި ސިޓީފުޅެއްގައިވަނީ އެމެރިކާއާއި ރައީސް ޓްރަމްޕް މި ވޯޓް ނަންގަވަނީ ވަރަށް ބޮޑަށް އަމިއްލަފުޅުކަމެއްގެ ގޮތުގައިކަން ކަން އަންގަވައި ދެއްވުމަށް އެދިވަޑައިގަންނަވާކަމަށެވެ