ފިނޭންސްގެ 25 ބުރީގެ އިމާރާތަށް 122 މިލިއަން ޑޮލަރު ބޭނުންވޭ، އެ އިމާރާތް ނިމޭތަން ދެކެން ބޭނުން: ނަޖީބު
20 ޑިސެމްބަރު 2017 | ބުދަ 09:39ފިނޭންސް 25 ބުރީގެ އިމާރާތުގެ މަސައްކަތް ހަވާލުކޮށްފައިވަނީ މެލޭޝިއާ ކުންފުންޏަކާ
މެލޭޝިއާ ބޮޑުވަޒީރާއެކު ރައީސް ޔާމީނު ބޭއްވި ބައްދަލުވުމުގެ ތެރެއިން މި ދަތުރުފުޅުގައި އެއްބަސްވުންތަކެއްގައި ސޮއިކުރި
ފިނޭންސް މިނިސްޓްރީގެ 25 ބުރީގެ އައު އިމާރާތް އެޅުމަށް މެލޭޝިއާގެ ސަރުކާރުން އެހީވާނެ ކަމަށް އެގައުމުގެ ބޮޑުވަޒީރު ނަޖީބު ރައްޒާގު ވިދާޅުވެއްޖެ އެވެ.
ރާއްޖެއާއި މެލޭޝިއާއާ ދެމެދު ބޭއްވި ރަސްމީ ވާހަކަތަކަށްފަހު ދެއްވި ބަޔާނުގައި މެލޭޝިއާގެ ބޮޑުވަޒީރު ނަޖީބު ރައްޒާގު ވިދާޅުވީ ފިނޭންސް މިނިސްޓްރީގެ އައު އިމާރާތް އެޅުމަށް 122 މިލިއަން ޑޮލަރު (ގާތްގަނޑަކަށް 1.8 ބިލިއަން ރުފިޔާ) ބޭނުންވާ ކަމަށެވެ. ނަޖީބު ވިދާޅުވި ގޮތުގައި އެ އިމާރާތް ހަދައި ނިމޭތަން ދެކެން މެލޭޝިއާއިން ބޭނުންވެއެވެ.
މެލޭޝިއާގެ ބޮޑުވަޒީރު ވަނީ އެ އިމާރާތުގެ މަސައްކަތް އެގައުމުގެ ކުންފުންޏަކާ ހަވާލުކޮށްފައިވާތީ ދިވެހި ސަރުކާރަށް ޝުކުރު އަދާކުރައްވާފަ އެވެ.
ފިނޭންސް މިނިސްޓްރީގެ އިމާރާތް ނިމޭއިރު ހުންނާނެ ގޮތުގެ މޮޑެލްއެއް
ތިން އަހަރުގެ ތެރޭގައި އިމާރާތްކޮށް ނިންމާ ގޮތަށް ފިނޭންސް މިނިސްޓްރީގެ 25 ބުރީގެ އިމާރާތުގެ މަސައްކަތް ހަވާލުކޮށްފައިވަނީ މެލޭޝިއާގެ "ޑަބްލިޔޫ ޒެޑް އާރު ޕުރޮޕަޓީ"އާއެވެ. އެކުންފުންޏާއެކު އެއްބަސްވުމުގައި ސަރުކާރުން ސޮއިކުރީ 2016 ވަނަ އަހަރުގެ މާޗް މަހުގަ އެވެ.
ފިނޭންސް މިނިސްޓްރީގެ އިމާރާތް ފުރަތަމަ އެޅުމަށް އެންމެ ފުރަތަމަ ނިންމީ ފިނޭންސް މިނިސްޓްރީ ހުންނަ ކޮށީގައެވެ. އެހެން ނަމަވެސް މެލޭޝިއާ ކުންފުންޏާ މަސައްކަތް ހަވާލުކުރި ފަހުން ސަރުކާރުން ވަނީ އެ އިމާރާތް ހުޅުމާލޭ ދެވަނަ ފިޔަވަހީގައި އަޅަން ނިންމާފަ އެވެ.
ސަރުކާރުން އެއިރު ހާމަކޮށްފައިވާ ގޮތުގައި ފިނޭންސް އިމާރާތް އަޅަނީ ކޮންޓްރެކްޓަރު ފައިނޭންސްކުރާ ގޮތަށް، 123 މިލިއަން ޑޮލަރަށެވެ.
ކުންފުންޏާއެކު އެއްބަސްވުމުގައި ސޮއިކުރުމަށް ބޭއްވި ހަފްލާގައި އެއިރުގެ ފިނޭންސް މިނިސްޓަރު އަދި މިހާރުގެ ނައިބު ރައީސް އަބްދުﷲ ޖިހާދު ކޮންޓްރެކްޓަރު ފައިނޭންސްކުރާ ގޮތަށް އިމާރާތްކުރާ ނިންމާއިރު، ކޮންޓްރެކްޓަރަށް ފައިސާ ދައްކަން ސަރުކާރަށް 23 އަހަރު ލިބޭނެ ކަމަށެވެ. ސަރުކާރުން އެފަރާތައް ފައިސާ ދައްކާނީ އެ އިމާރާތުން ސަރުކާރަށް ލިބޭފައިސާއިން ކަމަށް ވެސް ޖިހާދު ވިދާޅުވި އެވެ.
