ރާއްޖޭގެ ޖިނާއީ އަދުލުގެ ނިޒާމް އޮތީ އެއްކޮށް ފެއިލްވެފައި: އިންތި
20 ޑިސެމްބަރު 2017 | ބުދަ 03:22ބޭރު ދުނިޔޭގައި ރާއްޖޭގެ އަގު ވެއްޓިފައިވަނީ
ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި)
ރާއްޖޭގެ ޖިނާއީ އަދުލުގެ ނިޒާމް އޮތީ އެއްކޮށް ފެއިލްވެފައި ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އިންތި ވިދާޅުވީ ރާއްޖޭގައި އަދުލު އިންސާފު ނެތިގެން ދިޔުމުގެ ހެއްކަކީ ރާއްޖޭގައި މަރުގެ މައްސަލަތައް އިތުރުވުމާއި ސިޔާސީ މީހުން ޖަލަށް ލެވިފައިވުމާއި ބޭރު ދުނިޔޭގައި ރާއްޖޭގެ އަގު ވެއްޓިފައިވުން ކަމަށެވެ.
"ހަމަ ޔަގީނުން މި ރާއްޖޭގެ ޖުޑިޝަރީ އަދި މި ރާއްޖޭގެ ކްރިމިނަލް ޖަސްޓިސް ސިސްޓަމް ނުވަތަ ޖިނާއީ އަދުލުގެ ނިޒާމް ހަމަ އެއްކޮށް ވަނީ ފެއިލް ވެފައިވާތީ. މިއީ ގަސްތުގައި ވެސް ކުރާ ކަމެއް ނޫން. މިކަން މި ހިންގަނީ ރާވައިގެން އިންތިޒާމުވެގެން. މި ރާއްޖޭގެ ރައްޔިތުންނަށް ބޮނޑި ދިނުމުގެ ގޮތުގައި. ވަރަށް ބޮޑަށް ރައްޔިތުންނާއި މެދު ދުޝްމަނުވެގެން އޮންނަ ކަހަލަ ގޮތަކަށް. އަޅުގަނޑުމެންގެ ރާއްޖޭގެ ހާލަތާއި މެދުގައި ބައިނަލަޤްވާމީ ފަރާތްތަކުން ސިފަ ކުރާ ސިފަ ކުރުން ވެސް އޮވޭ ރިޕޯޓުތަކުގައި ލިޔެފައިވާ ވާހަކަތަކުގެ ތެރޭގައި. މި ރާއްޖޭގެ އަދުލުގެ ނިޒާމުގެ ތެރެއިން މި ފެންނަނީ އިންސާފު ގާއިމުކޮށްދޭ ތަނަކަށް ވުރެ ބޮޑަށް ސިޔާސީ އިދިކޮޅު ފަރާތްތަކާއި މެދު ދުޝްމަނުވެގެން މަސައްކަތް ކުރާ ތަނެއްގެ ގޮތުގައި" އިންތި ވިދާޅުވިއެވެ.
ރާއްޖޭގައި ނާއިންސާފުގެ މައްޗަށް ނާއިންސާފު ވަމުންދާ މަންޒަރު ކޯޓުތަކުންނާއި އެހެން މުއައްސާތަކުގެ ފަރާތުން ފެނިގެންދާ ކަމަށް އިންތި ތުހުމަތު ކުރެއްވިއެވެ.
އެގޮތުން ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފްގެ ބައްޕަ މުހައްމަދު ހައްސާންއަށް ތާކުންތާކު ނުޖެހޭ ތުހުމަތުތައް ސިސްޓަމަށް ދިމާވި މައްސަލައަކާއި ގުޅިގެން ކޮށްފައިވާ ކަމަށް ފުލުހުން ބުނެފައިވާ ކަމަށް އިންތި ވިދާޅުވިއެވެ.
މިފަދަ މައްސަލަތައް ފުލުހުންގެ ސިސްޓަމަށް ދިމާވަނީ ކޮންމެ ފަހަރަކު ވެސް ސިޔާސީ މީހެއް ނުވަތަ ސިޔާސީ މީހެއްގެ އާއިލާ މީހަކާއި ދެކޮޅަށް ނެރޭ އަމުރުތަކުގައި އެކަނި ކަމަށް އިންތި ފާހަގަކުރެއްވިއެވެ.
