މިމަހުގެ 15 ވަނަ ދުވަހު ނިކުތް ފުކްރޭ ރިޓާންސްއަށް މިހާތަނަށް ބޮކްސް އޮފީހުގައި ކާމިޔާބެވެ. މި ފިލްމަށް މިހާތަނަށް ލިބިފައިވަނީ 66.11 ކުރޯޑް އިންޑިއަން ރުޕީސްއެވެ. އަންނަ ހަފްތާގައި މި ފިލްމަށް ލިބޭ ތަރުހީބު ބޮޑުވާނެކަމަށް ލަފާ ކުރެވޭއިރު އެނަލިސްޓުން ބުނަމުންދަނީ މި ފިލްމަށް ފައިދާ ނެގޭނީ މިއަންނަ ހަފްތާ އެކަނި ކަމަށެވެ. ސަބަބަކީ މިމަހުގެ 22 ވަނަ ދުވަހު ސިނަމާތަކަށް އަންނަ ޓައިގާ ޒިންދާހޭ އެޅުވުމުން ފުކްރޭ ރިޓާންސްއަށް ލިބޭނެ ތަރުހީބު ކުޑަވެގެން ދާނެ ކަމަށް ބެލެވޭތީ އެވެ. 

މުރިގްދީޕް ސިންހް ޑައިރެކްޓްކޮށްފައިވާ މި ފިލްމުން ފެނިގެންދާ ތަރިންގެ ތެރޭގައި ޕުލްކިތު ސަމްރާޓް، ވަރުން ޝަރްމާ، އަލީ ފަޒާލް، މަންޖޯތު ސިންގް އަދި ރިޗާ ޗައްޑާ ހިމެނެއެވެ.

މީގެ އިތުރުން މި ފިލްމްގައި ޕްރިޔާ އާނަންދް އާއި ވިޝާކާ ސިންގްގެ އިތުރުން ޕަންކަޖް ތްރިޕާތީގެ އެކްޓިން މިފިލްމުން ފެނިގެން ދެއެވެ.

ސަމްރާޓް އާއި ވަރުން ޝަރްމާ ފެނިގެންދަނީ ވަރަށް ގާތް ދެ ރަހުމަތްތެރިންގެ ރޯލުންނެވެ. އަލީ ފަޒާލް ފެނިގެންދަނީ މިއުޒީޝަނެއްގެ ރޯލުންނެވެ. މި ފިލްމު ޕްރޮޑިއުސްކޮށްފައި ވަނީ ފަރްހާން އަޚްތަރު އަދި ރިތޭޝް ސިދްވާނީއެވެ.

ފުކްރޭ ރިޓާންސްއަކީ 28 ކުރޯޑް އިންޑިއަން ރުޕީސްގެ ބަޖެޓަކުން އުފައްދާފައިވާ ފިލްމެކެވެ. އެހެން ކަމުން މި ފިލްމު އުފައްދަން ދިޔަ ޚަރަދަށް ވުރެ އިތުރަށް މިހާރު ވަނީ ފައިދާވެފައެވެ.

ފުކްރޭ ރިޓާންސްއަށް ތަރުހީބު ލިބެން ފެށުމުން ފިލްމުގެ އެކްޓަރ ރިޗާ ޗައްޑާ ބުނެފައިވަނީ ފިލްމު މިހާރު އޮތް ލެވެލްގައި އޭނާ ހިތްހަމަޖެހޭކަމަށާއި އެހެން ނަމަވެސް އަދިވެސް އިތުރަށް ކާމިޔާބީއަށް އެދޭ ކަމަށެވެ. އިންޑިއާގެ ދިއްލީގައާއި މުމްބާއި އަދި ޕަންޖާބީގައި މި ފިލްމުގެ މަގުބޫލުކަން ހައިރާންވާ ވަރަށް ބޮޑުކަމަށް ރިޗާ ބުންޏެވެ. އޭނާ ބުނީ މި ފިލްމު ކާމިޔާބުވުމުން އޭގެއިން އެނގެނީ ހެއްވާ މަޖާ ފިލްމުތައް އޯޑިއެންސް ބަލައިގަންނަ ކަމެވެ.

ފުކްރޭ ރިޓާންސްގެ ފުރަތަމަ ބައި ފުކްރޭ ނެރެފައިވަނީ 2013 ވަނަ އަހަރުގައެވެ. ކުޑަ ބަޖެޓަކުން އުފެއްދި  ފުރަތަމަ ފިލްމަށްވެސް ވަނީ ބޮޑު ތަރުހީބެއް ލިބިގެން ގޮސްފައި ވެއެވެ.