ސްޕެނިޝް ލަލީގާގައި ބާސެލޯނާ ކުޅުނު މެޗުން އެ ޓީމު އަނެއްކާވެސް މޮޅުވިއިރު އެޓްލެޓިކޯ މެޑްރިޑް ކުޅުނު މެޗުން އެ ޓީމު ވެސް މޮޅުވެ ތާވަލުގެ ދެވަނައަށް ޖެހިލައިފިއެވެ.

އަމިއްލަ ދަނޑުގައި ޑިޕޯޓިވޯއާ ދެކޮޅަށް ކުޅުނު މެޗުން ބާސާ މޮޅުވެފައިވަނީ 4-0ގެ ތަފާތު ބޮޑު ނަތީޖާއަކުންނެވެ. މި މެޗުގައި ބާސާއިން ވަނީ ގިނަ ވަގުތު ބޯޅަ ހިފަހައްޓައިގެން ކުޅެ ޑިޕޯޓިވޯގެ ގޯލާއި އަމާޒުކޮށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. ޑިޕޯޓިވޯއިން ވެސް ވަނީ ކައުންޓާގައި ބާސާގެ ގޯލާއި އަމާޒުވާ ގޮތަށް ހަމަލާތަކެއް ފޮނުވާލާފައެވެ.

މި މެޗުގެ ފުރަތަމަ ލަނޑު ބާސާއިން ޖެހީ މެޗުގެ 29 ވަނަ މިނެޓުގައެވެ. މެސީ ތަނަވަސްކޮށްދިން ފުރުސަތަކުން މުޅިން ހުހަށް ހުރެ ގޯލުގެ ތެރެއަށް ބޯޅަ ފޮނުވާލައިގެން ބާސާގެ ފުރަތަމަ ލަނޑު ޖަހައިދިނީ ލުއިސް ސުއަރޭޒްއެވެ. ބާސާގެ ދެވަނަ ލަނޑު ފުރަތަމަ ހާފު ނިމެން ހަތަރު މިނެޓަށް ވެފައިވަނިކޮށް ޖަހައިދިނީ މި ސީޒަނުގައި އެ ޓީމާއި އަލަށް ގުޅުނު ބްރެޒިލްގެ މިޑްފީލްޑަރު ޕައުލީނިއޯއެވެ. މި ލަނޑަކީ މެސީ ފޮނުވާލި ހަމަލާއެއް ޑިޕޯޓިވޯގެ ގޯލުގެ ދަނޑީގައި ޖެހުމަށްފަހު އަލުން ކުޅުމުގެ ތެރެއަށް އައުމުން ރީބައުންސްގައި އޭނާ ޖެހި ލަނޑެކެވެ.

ދެ ލަނޑުގެ ލީޑެއްގައި އޮވެ ބާސާއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފު ފެށިގެން ދެ މިނެޓު ނުވަނީސް މެޗުގެ ލީޑު ފުޅާކޮށްފައެވެ. މި ލަނޑު މެޗުގެ 47 ވަނަ މިނެޓުގައި ސާޖީ ރޮބާޓޯގެ އެހީތެރިކަމާއެކު އެ ޓީމަށް ޖަހައިދިނީ ވެސް ސުއަރޭޒްއެވެ.

މި ލަނޑަށް ފަހުވެސް ބާސާއިން ވަނީ އިތުރު ލަނޑުތަކެއް ޖެހުމަށް މަސައްކަތް ކޮށްފައެވެ.  އެ ޓީމުން ފުލުފުލުގައި އުފައްދަމުންދިޔަ ހަމަލާތަކުގެ ނަތީޖާއަކަށް ވެގެންދިޔައީ މެޗުގެ 70 ވަނަ މިނެޓުގައި ލީޑު ފުޅާކުރުމަށް ޕެނަލްޓީއެއް ލިބިގެންދިޔުމެވެ. އެހެން ނަމަވެސް މެސީ ފޮނުވާލި ޕެނަލްޓީ ޑިޕޯޓިވޯގެ ކީޕަރު ދިފާއުކުރިއެވެ. އޭގެ ފަސް މިނެޓު ފަހުން ޕައުލީނިއޯ ވަނީ އޭނާ މެޗުގައި ޖެހި ދެވަނަ ލަނޑު ޖަހައި ބާސާގެ ލީޑު އިތުރަށް ފުޅާކޮށްދީފައެވެ.

މި މެޗުގައި ބާސާއިން ފޮނުވާލި ފަސް ހަމަލާއެއް ޑިޕޯޓިވޯގެ ގޯލުގެ ދަނޑިއަށް އަމާޒުވެފައިވެއެވެ. ހަމައެހެންމެ މުޅި ސީޒަނަށް ބަލަލާއިރު ބާސާއިން ފޮނުވާލި 19 ހަމަލާއެއް ގޯލުގެ ދަނޑިއަށް އަމާޒުވެފައިވާއިރު މިއީ ޔޫރަޕުގެ ރެކޯޑެކެވެ. މި މެޗުގެ ކުރިން މެސީ ވަނީ މިދިޔަ ސީޒަނުގައި އެންމެ ގިނަ ލަނޑު ޖަހައިގެން އޭނާއަށް ލިބުނު ރަން ބޫޓު ދައްކާލާފައެވެ.

އެޓްލެޓިކޯ މެޑްރިޑް ވެސް ވަނީ އަމިއްލަ ދަނޑުގައި 1-0ގެ ނަތީޖާއަކުން އަލަވޭސް ބަލިކޮށް ލަލީގާގެ ޕޮއިންޓް ތާވަލުގެ ދެވަނައަށް ޖެހިލާފައެވެ. މި މެޗުގައި އެޓްލެޓިކޯއިން ޖެހި ހަމައެކަނި ލަނޑު އެ ޓީމަށް ޖަހައިދިނީ ތަޖުރިބާކާރު ފޯވާޑް ފެނާންޑޯ ޓޮރޭޒްއެވެ.

ކުޅުނު އެއްވެސް މެޗަކުން ބަލިނުވެ 42 ޕޮއިންޓާއެކު ބާސާއަށް ޕޮއިންޓް ތާވަލުގެ އެއްވަނަ ލިބޭއިރު ދެވަނައިގައި 36 ޕޮއިންޓާއެކު އޮތީ އެޓްލެޓިކޯއެވެ. ހަމައެހެންމެ ތިންވަނައިގައި 34 ޕޮއިންޓާއެކު ވެލެންސިއާ އޮތްއިރު ހަތަރު ވަނައިގައި 31 ޕޮއިންޓާއެކު އޮތީ ރެއާލް މެޑްރިޑްއެވެ.