މަސްވެރިން މި ސަރުކާރަށް އާނއެކޭ ބުނަން ޖެހޭ އެއްވެސް ސަބަބެއް ނެތް: އަހުމަދު އަބްދުﷲ
މަސްވެރިންނަށް ރަނގަޅު އާމްދަނީއެއް ހޯދައިދިނުމަށް މި ސަރުކާރަށް ލިބުނު ހުރިހާ ފުރުސަތެއްގައި ކުރެއްވީ ގޯނާ ކަމަށް އޭނާ ވިދާޅުވި
އިހަވަންދޫ ދާއިރާގެ ކުރީގެ މެމްބަރު އަހުމަދު އަބްދުﷲ
މަސްވެރިން މި ސަރުކާރަށް އާނއެކޭ ބުނަން ޖެހޭ އެއްވެސް ސަބަބެއް ނެތްކަމަށް އެމްޑީޕީގެ ޗެއާޕާސަން ނައިބު މާލީ އަދި އިހަވަންދޫ ދާއިރާގެ ކުރީގެ މެމްބަރު އަހުމަދު އަބްދުﷲ ވިދާޅުވެއްޖެއެވެ.
ހޮނިހިރު ދުވަހުގެ ރޭ ހއ. އިހަވަންދޫގައި މަސްވެރިން ކުރި މުޒާހަރާއާ ގުޅިގެން ރާއްޖެޓީވީއިން ގެނެސްދިން ލައިވް ކަވަރޭޖްގައި ވާހަކަ ދައްކަވަމުން އަހުމަދު އަބްދުﷲ ވިދާޅުވީ މި ސަރުކާރުގެ ސިޔާސަތަކީ އޮޅުވާލުމާއި، މަކަރު ހެދުމާއި، ރައްޔިތުން ނިކަމެތި ކުރުމާއި ރައްޔިތުންނަށް ޖެއްސުންކުރުން ކަމަށެވެ. މިކަމުގެ ސަބަބުން މަސްވެރިންނަށް ވެސް ދަތިތަކަކާއި ކުރިމަތިވަމުންދާ ކަމަށާއި އެހެންކަމުން މަސްވެރިން މި ސަރުކާރަށް އާނއެކޭ ބުނަން ޖެހޭ އެއްވެސް ސަބަބެއް ނެތް ކަމަށް އަހުމަދު އަބްދުﷲ ވިދާޅުވިއެވެ.
އޭނާ އިތުރަށް ވިދާޅުވީ މަސްވެރިންނަށް ރަނގަޅު އާމްދަނީއެއް ހޯދައިދިނުމަށް މި ސަރުކާރަށް ލިބުނު ހުރިހާ ފުރުސަތެއްގައި ކުރެއްވީ ގޯނާ ކަމަށެވެ. އެކަމުގެ ހިތި ނަތިޖާއާ މި ސަރުކާރަށް ކުރިމަތިލާން ޖެހޭނެ ކަމަށާއި، މަސްވެރިން އެކަމަށް ދޭން ޖެހޭ ޖަވާބު ފުރިހަމައަށް ދޭނެ ކަމަށްވެސް އަހުމަދު އަބްދުﷲ ވިދާޅުވިއެވެ.
މިއަހަރުގެ މަސްވެރިންގެ ދުވަސް ފާހަގަ ކުރުމަށް ހއ. އިހަވަންދޫގައި ބޭއްވި ޖަލްސާއާ ދިމާކޮށް، އިހަވަންދޫގައި ބޭއްވި މުޒާހަރާގައި ގިނަ އަދަދެއްގެ މަސްވެރިންނާއި އާއްމުން ބައިވެރިވެފައިވެއެވެ. މީގެ އިތުރުން އެމުޒާހަރާގައި ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު ކަމުން ވަކިވެފައިވާ ކަމަށް އިލެކްޝަންސް ކޮމިޝަނުން ނިންމާފައިވާ މުޙައްމަދު އަބްދުﷲ (މުޙަންމާ) ބައިވެރިވެވަޑައިގެންނެވި އެވެ.
