ދިވެހިރާއްޖެއިން އަބަދުވެސް އިންޑިއާ އިސް ކުރާނެ ކަމަށް އުންމީދު ކުރަން: އިންޑިއާ

ދިވެހިރާއްޖެއިން ތަރައްގީއާ ކުރިއެރުމަށްކުރާ މަސައްކަތުގައި ގައުމުތަކާއެކީ ގުޅުން ބަދަހި ކުރުމުގައި އަބަދުވެސް އިންޑިއާ އިސްކުރާނެ ކަމަށް އުންމީދު ކުރާ ކަމަށް އިންޑިއާއިން ބުނެފިއެވެ.

އިންޑިއާއިން މިހެން ބުނެފައި މިވަނީ ދިވެހިރާއްޖެ އާއި ޗައިނާއާ ދެމެދު ސޮއި ކުރެވުނު މިނިވަން ވިޔަފާރީގެ އެއްބަސްވުމާ ގުޅިގެންނެވެ.

އިންޑިއާގެ އެކްސްޓާނަލް އެފެއާޒް މިނިސްޓްރީ އިން ބޭއްވި ނޫސްވެރިންގެ ބައްދަލުވުމެއްގައި އެކްސްޓާނަލް އެފެއާޒް މިނިސްޓްރީގެ ސްޕޯކްސް ޕާސަން ރަވީން ކުމާރު ވިދާޅުވީ އިންޑިއާއާއި ދިވެހިރާއްޖެއާ ދެމެދު އޮތް ގުޅުމަކީ ވަރަށް ބަދަހި ގުޅުމެއް ކަމަށެވެ. އެގޮތުން އިންޑިއާގެ ރައްޔިތުންނާ ދިވެހިންނަކީ ވެސް ވަަރަށް ބަދަހި ގުޅުމަކުން ގުޅިފައިވާ ބައެއް ކަމަށް ރަވިން ކުމާރު ވިދާޅުވިއެވެ.

ރަވިން ކުމާރު ވިދާޅުވީ ދިވެހިރާއްޖޭގައި ޑިމޮކްރެސީ ހަރުދަނާ ކުރުމަށާއި، ދިވެހިރާއްޖޭގެ ތަަރައްގީއާއި ކުރިއެރުމަށް އަބަދުވެސް އިންޑިއާގެ އެއްބާރުލުން އެންމެ ފުރިހަމަ އަށް ލިބޭނެ ކަމުގެ ޔަގީންކަން އަރުވާ ކަމަށެވެ. އަދި ދިވެހިރާއްޖޭގައި ހަމަޖެހުން ގާއިމް ވެފައި އޮތުމަކީ އިންޑިއާއިން އަބަދުވެސް އެދޭ ގޮތް ކަމަށާއި އެކަމަށްޓަކައި އިންޑިއާއިން ކޮށްދޭން ޖެހުނު ކޮންމެ ކަމެއްވެސް ކޮށްދެއްވާނެ ކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީގެ ސްޕޯކްސް ޕާސަން ވިދާޅުވިއެވެ.

ރަވިން ކުމާރު ވިދާޅުވީ އިންޑިއާއިން އަބަދުވެސް ދެކެނީ ދިވެހިރާއްޖެއަކީ އިންޑިއާގެ އެންމެ ގާތް އެކުވެރިއެއްގެ ގޮތުގައި ކަމަށެވެ. އެހެން ކަމުން އިންޑިއާއިން އެންމެ ފުރަތަމަ ދިވެހިރާއްޖެ އިސް ކުރާ ގޮތަށް ދިވެހިރާއްޖެއިން އެންމެ ފުރަތަމަ އިންޑިއާ އިސް ކުރާނެ ކަމަށް އުންމީދު ކުރައްވާ ކަމަށް ކުމާރު ވިދާޅުވިއެވެ.

މީގެ އިތުރުން ދިވެހިރާއްޖެ އާއި ޗައިނާއާ ދެމެދު ސޮއިކުރި މިނިވަން ވިޔަފާރީގެ އެއްބަސްވުމާ ގުޅޭ ގޮތުން އިންޑިއާއިން ދެކެނީ ކިހިނެއްތޯ ނޫސްވެރިއަކު ސުވާލު ކުރުމުން ރަވިން ކުމާރު ވިދާޅުވީ އެ އެއްބަސްވުމަށް އިންޑިއާއިން މަރުހަބާ ކިޔާ ކަމަށާއި އެއްބަސްވުމާ ގުޅޭ ގޮތުން އެއްޗެއް ދަންނަވަން އެނގޭނީ އެއްބަސްވުން ދިރާސާ ކުރުމަށް ފަހުގައި ކަމަށެވެ. އަދި ސަރަހައްދުގެ ހަމަޖެހުމަށް އެއްވެސް ގޮތަކަށް ބުރުލެއް ނާރާނަމަ ދެ ގައުމުން ވެސް ދެ ގައުމުގެ ތަރައްގީ އާއި ކުރިއެރުމަށްޓަކައި ކުރާ މަސައްކަތުގައި އެއްބާރުލުން ދޭން ޖެހޭނެ ކަމަށް ރަވިން ކުމާރު ވިދާޅުވިއެވެ.