ޝަރީޢަތް ނިމެންދެން ފާރިސް ބަންދުކުރި މައްސަލައިގެ އިސްތިއުނާފުގެ މައްސަލަ ތިން ދުވަސް ތެރޭގައި ނިންމައި ދިނުމުގެ އަމުރަކަށް އެދިއްޖެ
ފާރިސްގެ އިސްތިއުނާފުގެ މައްސަލަ ބަލާ ބެންޗު މިހާރު ވަނީ އުވިފައި
އަހުމަދު ފާރިސް މައުމޫން
ރައްޔިތުންގެ މަޖިލީހުގެ މެމްބަރަކަށް ރިޝްވަތު ދިނުމުގެ ތުހުމަތުގައި ޝަރީޢަތް ނިމެންދެން ބަންދު ކޮށްފައިވާ ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސްގެ މައްސަލައާ ގުޅިގެން ހައިކޯޓަށް ހުށަހަޅާފައިވާ އިސްތިއުނާފުގެ މައްސަލަ ތިން ދުވަސް ތެރޭގައި ނިންމައިދިނުމުގެ އަމުރަކަށް ފާރިސްގެ ފަރާތުން ސުޕްރީމް ކޯޓުގައި އެދިއްޖެއެވެ.
ފާރިސްގެ ގާނޫނީ ވަކީލުންގެ ޓީމުގެ ފަރާތުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ފާރިސްގެ ގާނޫނީ ވަކީލް އިބްރާހިމް ޝަމީލް ވިދާޅުވީ ފާރިސްގެ ފަރާތުން ސްޕްރީމް ކޯޓަށް ހުށަހެޅި މައްސަލައިގައި އެދިފައި ވާނީ އެ މައްސަލަ ކުރިން ބެލި ބެންޗުން އެ މައްސަލަ ތިން ދުވަސް ތެރޭގައި ނިންމައިދިނުމުގެ އަމުރަކަށް ކަމަށެވެ.
ފާރިސްގެ ވަކީލް ވިދާޅުވީ އިސްތިއުނާފް މައްސަލައިގެ ބެންޗް ބަދަލުކޮށް، ހައި ކޯޓުގެެ ދެކުނު ގޮފީގެ ފަނޑިޔާރަކު އެ ބެންޗަށް އައްޔަން ކޮށްފައިވާއިރު ދެކުނު ގޮފީގެ ފަނޑިޔާރުން މާލޭގައި މަސައްކަތް ކުރުމުގެ މުއްދަތު މިހާރު ހަމަވެފައިވާ ކަމަށެވެ. ސުޕްރީމް ކޯޓުން ހަމަޖައްސާފައިވާ ގޮތުން ދެކުނު ގޮފީގެ ފަނޑިޔާރުން މާލޭގައި މަސައްކަތް ކުރައްވާނީ ތިން މަހަށް ކަމަށް ވަކީލް ވިދާޅުވިއެވެ. އެހެން ކަމުން އެ ބެންޗް މިހާރު އުވިފައިވާ ކަމަށާއި އެ ބެންޗަށް މިހާރު ފާރިސްގެ މައްސަލަ ބެލިދާނެ ކަމަށް ގަބޫލު ނުކުރައްވާ ކަމަށް ވަކީލް ވިދާޅުވިއެވެ.
ޝަރީޢަތް ނިމެންދެން ފާރިސް ބަންދު ކޮށްފައިވާ މައްސަލައާ ގުޅޭ ގޮތުން ވާހަކަ ދައްކަވަމުން ފާރިސްގެ ވަކީލް ވިދާޅުވީ ފާރިސް ބަންދުގައި ހުންނަން ޖެހޭނެ ގާނޫނީ އެއްވެސް ސަބަބެއް ނެތް ކަމަށާއި ފާރިސް މިހާރު ވެސް ހުންނަން ޖެހޭނީ މިނިވަނެއްގެ ގޮތުގައި ކަމަށެވެ. އަދި ފާރިސްގެ މައްޗަށް ތުހުމަތު ކުރާ ރިޝްވަތުގެ ކުށަކީ ޖިނާއީ ބޮޑު ކުށެއް ނޫން ކަމަށް ހައި ކޯޓުން ނިންމާފައިވާއިރު ޖިނާއީ ކުދި ކުށްތަކުގައި 15 ދުވަހަށް ވުރެ ދިގު މުއްދަތަކަށް ބަންދުގައި ނުބެހެއްޓޭނެ ކަމަށް ހައި ކޯޓުން ނިންމާފައިވާ ކަމަށް ފާރިސްގެ ގާނޫނީ ވަކީލް ވިދާޅުވިއެވެ. އެހެން ކަމުން ފާރިސް މިހާރު ބަންދުގައި ބަހައްޓާފައި ވަނީ ގާނޫނާ ހިލާފަށް ކަމަށް ވަކީލް ވިދާޅުވިއެވެ.
ފާރިސްގެ ވަކީލް ވިދާޅުވީ ގާނޫނާ ހިލާފަށް ފާރިސް ބަންދުކޮށްފައިވާ މައްސަލައިގައި ފާރިސްގެ ފަރާތުން ދައުލަތުގެ އެކި އިދާރާތަކަށް ތަކުރާރުކޮށް ޝަކުވާ ހުށަހަޅާފައިވާނެ ކަމަށާއި ނަމަވެސް ދައުލަތުގެ އެއްވެސް އިދާރާއަކުން ގާނޫނީ ޒިންމާ ނަގަން ބޭނުން ނުވާ ކަމަށެވެ. އަދި ފެނިގެން ދަނީ ގާނޫނާ ހިލާފު އަމަލުތަކަށް އިދާރާތަކުން ތަރުހީބުދޭ މަންޒަރު ކަމަށް ވެސް ޝަމީލް ވިދާޅުވި އެވެ.
ފާރިސް ބަންދުގައި ހުންނަތާ 150 ދުވަސްވެ އޭނާގެ އެތައް ހައްގުތަކެއް ގެއްލެމުންދާއިރު އެކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ފިޔަވަޅު ނާޅާ ކަމަށް ބުނެ އެ ކޮމިޝަނަށް ވެސް ޝަމީލް ފާޑު ވިދާޅުވި އެވެ. ފާރިސްގެ ފަރާތުން އެޗްއާރުސީއެމަށް ހުށަހެޅި މައްސަލައެއްގައި، ފާރިސްގެ އިންސާނީ ހައްގެއް ގެއްލިފައިވާ ކަމަށް ނުބެލެވޭ ކަމަށް އެ ކޮމިޝަނުން ޖަވާބު ދީފައިވާ ކަމަށާއި އެކަމަކު އެކަށީގެންވާ ސަބަބެއް ނެތި ބަންދު ކުރުމަކީ އިންސާނީ ހައްގެއް ގެއްލުން ކަމަށް ނުވަނީތޯ ޝަމީލް ސުވާލު އުފެއްދެވި އެވެ.
