ނިއުއާއެކު ހަދާފައިވާ އެއްބަސްވުން އިންމަ އާކޮށްފި
14 ޑިސެމްބަރު 2017 | ބުރާސްފަތި 12:20ނިއުގެ ގިނަ ކުޅުންތެރިން ވަނީ އެ ޓީމާ އެކު ހަދާފައިވާ އެއްބަސްވުން އާކޮށްފައި
އިމްރާން މުހައްމަދު: މިއީ އިންމަ ނިއުއަށް ކުޅޭ ފަސްވަނަ އަހަރު
ނިއު ރޭޑިއަންޓް ސްޕޯޓްސް ކްލަބާ އެކު ހަދާފައިވާ ކޮންޓްރެކްޓް ތަޖުރިބާކާރު ގޯލްކީޕަރު އަދި އެ ޓީމުގެ ކެޕްޓަން އިމްރާން މުހައްމަދު (އިންމަ) އާކޮށްފިއެވެ.
ސީޒަންގެ މެދުތެރެއިން ނިއުއާ ގުޅުނު ގައުމީ ޓީމުގެ ގޯލްކީޕަރު މުހައްމަދު ފައިސަލް ވެސް ވަނީ އިންމައާ އެކު އެ ޓީމުގެ ކޮންޓްރެކްޓް އާކޮށްފައެވެ. ސީޒަންގެ ވަކި ހިސާބަކުން އިންމައަށް އަނިޔާވެ ފުރަތަމަ އެގާރައިން ފުރުސަތު ގެއްލުނު ނަމަވެސް އޭނާ އަންނަނީ އަނިޔާއިން އެނބުރި އައިސް ނިއުގެ ފުރަތަމަ އެގާރައިން ޖާގަ ހޯދަމުންނެވެ.
މި ދެ ކުޅުންތެރިން ވެސް ނިއުގައި މަޑުކުރަން ނިންމުމާ އެކު އަންނަ ސީޒަނުގައި އެ ޓީމުގެ ގޯލު ބަލަހައްޓާނެ ކުޅުންތެރިޔަކު ހޯދުމުގައި ކޯޗަށް އުނދަގޫތަކަކާ ކުރިމަތިވެގެންދާނެއެވެ.
ނިއުގެ ދެ ކީޕަރުންގެ އިތުރުން އަކްރަމް އަބްދުލް ޣަނީ (އަކޫ) އާއި ރިލްވާން ވަހީދު (ރިލޭ) އާއި ހަސަން އަދުހަމް (ސަޑޭ) އާއި އަހުމަދު އަބްދުﷲ (ލިލީ) އާއި މިދުހަތު ފަހުމީ އާއި އެ ޓީމުގެ ސްޕެއިންގެ މިޑްފީލްޑަރު ކަންޑޭލާ ވެސް ވަނީ އެ ޓީމާ އެކު ހަދާފައިވާ ކޮންޓްރެކްޓް އާކޮށްފައެވެ.
ހަމައެހެންމެ ސީޒަނުގެ މެދުތެރެއިން އަލީ ފާސިރު (ސެންޓޭ) އާއި އިބްރާހިމް ރަޝީދުގެ އިތުރުން ހަމްޒާ މުހައްމަދު ވަނީ އެ ކުޅުންތެރިން ނިއުއާ އެކު ހަދާފައިވާ ކޮންޓްރެކްޓް ދިގު މުއްދަތަކަށް އާކޮށްފައެވެ. ނިއުގެ ކޯޗު އޮސްކާ ބްރޫޒޯން ވެސް ވަނީ އަންނަ އަހަރުގެ ނިޔަލަށް އެ ޓީމާ އެކު ހަދާފައިވާ އެއްބަސްވުން އާކޮށްފައެވެ.
ނިއުގެ އެއްބަސްވުން އާނުކޮށް ތިބީ ގައުމީ ޓީމުގެ ކެޕްޓަން އަލީ އަޝްފާގް (ދަގަނޑޭ) އަދި އިބްރާހިމް ފަޒީލް (އޮއްޕޮ) އެވެ. ބެލެވޭ ގޮތުގައި މި ދެ ކުޅުންތެރިން ވެސް ވަރަށް އަވަހަށް ނިއުގައި މަޑުކުރަން ނިންމައި އެއްބަސްވުމުގައި ސޮއި ކުރާނެއެވެ.
ނިއުއިން ވަނީ މި ސީޒަނުގެ މިހާތަނަށް ދެ ތައްޓެއް ކާމިޔާބުކޮށްފައެވެ. އެގޮތުން އުރީދޫ ދިވެހި ޕްރިމިއާ ލީގާއި އެފްއޭ ކަޕްގެ ޗެމްޕިއަންކަން އެ ޓީމުން ހޯދިއިރު ތިންވަނަ ތައްޓެއް ކާމިޔާބު ކުރުމުގެ ފުރުސަތު ނިއުއަށް އަދި އެބައޮތެވެ. ޕްރެޒިޑެންޓްސް ކަޕްގެ ފައިނަލުގެ ޖާގައެއް ވެސް ނިއުއަށް ވަނީ ލިބިފައެވެ.
އަންނަ ސީޒަނުގެ އޭއެފްސީ ކަޕުން ވެސް ނިއުއަށް ޖާގަ ލިބިފައިވާއިރު އެ ޓީމުން އެންމެ އިސްކަމެއް ދީގެން ކުރަމުން އަންނަ ކަމަކީ މި ސީޒަނުގައި އެ ޓީމަށް ކުޅުނު ކުޅުންތެރިން އެ ޓީމުގައި މަޑުކުރުވުމެވެ. މީގެ އިތުރުން އޭއެފްސީ ކަޕްއިން ރަނގަޅު ނަތީޖާއެއް ހޯދުމަށް ނިއުއިން އަންނަނީ ސްކޮޑް ވަރުގަދަ ކުރުމަށް އާ ކުޅުންތެރިން ހޯދުމުގެ މަސައްކަތް ވެސް ކުރަމުންނެވެ.
