ގުދުސްގެ މައްސަލަ: އޯއައިސީގެ ހާއްސަ އާންމު ބައްދަލުވުމެއް ބާއްވަނީ
13 ޑިސެމްބަރު 2017 | ބުދަ 05:08މި ހާއްސަ އާންމު ބައްދަލުވުން ބޭއްވުމަށް ނިންމީ ތުރުކީގެ ރައީސް ރަޖަބް ތައްޔިބް އުރުދުޣާންގެ ގޮވާލެއްވުމަކަށް
ގުދުސްގައި ހުންނަ މަސްޖިދުލް އަގްސާ
ގުދުސްއަކީ އިޒްރާއިލްގެ ވެރިރަށް ގޮތުގައި ބަލައިގަންނަން އެމެރިކާގެ ޑޮނަލްޑް ޓްރަމްޕް ނިންމެވުމާއި ގުޅިގެން އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ހާއްސަ އާންމު ބައްދަލުވުމެއް ބާއްވަނަ ނިންމައިފިއެވެ.
އޯއައިސީގެ މި ހާއްސަ އާންމު ބައްދަލުވުން ބޭއްވުމަށް ނިންމީ ތުރުކީގެ ރައީސް ރަޖަބް ތައްޔިބް އުރުދުޣާންގެ ގޮވާލެއްވުމަކަށެވެ. އެގޮތުން ބުދަ ދުވަހުގެ ވަގުތެއްގައި މި ބައްދަލުވުން ފެށުމަށް ހަމަޖެހިފައިވާއިރު މި ބައްދަލުވުން ބޭއްވުމަށް ހަމަޖެހިފައިވަނީ ތުރުކީގެ ވެރިރަށް އިސްތަންބޫލްގައި ހުންނަ ލުތްފީ ކިރްދާރް ކޮންގްރެސް ސެންޓަރުގައެވެ.
މި ބައްދަލުވުމުގެ ރިޔާސަތު އުރުދުޣާން ބަލަހައްޓަވާއިރު، ސަމިޓް ހުޅުވުމުގެ ގޮތުން އެންމެ ފުރަތަމަ ތަގްރީރު ކުރަށްވާނީ އުރުދުޣާންއެވެ. އުރުދުޣާންގެ އިތުރުން އޯއައިސީގެ ސެކްރެޓަރީ ޖެނެރަލް ޑރ. ޔޫސުފް އަހުމަދު އަލް އޮޠްމަޢީންއާއި ފަލަސްތީނުގެ ރައީސް މަހުމޫދު އައްބާސްގެ އިތުރުން އުރުދުންގެ ރަސްގެފާނު އަބްދުﷲ ވެސް މި ބައްދަލުވުމުގައި ތަގްރީރު ކުރައްވާނެއެވެ.
މި ބޭފުޅުންގެ އިތުރުން އޯއައިސީގެ މެމްބަރު 57 ގައުމުގެ ތެރެއިން 22 ގައުމެއްގެ ލީޑަރުން މި ބައްދަލުވުމުގައި ބައިވެރިވެ ވަޑައިގަންނަވާނެއެވެ. އެގޮތުން މެލޭޝިއާގެ ބޮޑުވަޒީރު ނަޖީބް ރައްޒާކްއާއި ގަތަރުގެ އަމީރު ޝެއިހް ތަމީމް ބިން ހަމަދް އަލް ޘާނީއާއި ޕާކިސްތާނުގެ ބޮޑުވަޒީރު ޝާހިދް އައްބާސީގެ އިތުރުން އީރާންގެ ރައީސް ހަސަން ރޫހާނީ ބައިވެރިވެ ވަޑައިގަންނަވާނެއެވެ.
މި ބައްދަލުވުމުގެ އެޖެންޑާގެ ދަށުން އެމެރިކާގެ މި ނިންމުމަށް އިސްލާމީ ގައުމުތައް އެކުވެގެން އަމަލުކުރާނެ ގޮތެއް ހޯދުމުގެ އިތުރަށް، ގުދުސް ހިމާޔަތް ކުރުމުގެ ހާއްސަ ގަރާރެއްގައި ސޮއެ ކުރުން ހިމެނިފައިވެއެވެ.
މި ބައްދަލުވުމުގެ ހަވާސާގައި ހިމެނިގެން އޯއައިސީގެ މެމްބަރު ގައުމުތަކުގެ ހާރިޖީ ވަޒީރުންގެ ބައްދަލުވުމެއް ވެސް ބޭއްވުމަށް ވަނީ ނިންމާފައެވެ. މި ބައްދަލުވުން މެދެވެރިކޮށް ގުދުސްގެ ތާރިހީ އަދި ސިޔާސީ ހައިސިއްޔަތުގެ އިތުރުން ގާނޫނީ ހައިސިއްޔަތު ދެމެހެއްޓުމަށް ކުރެވެންހުރި ކަންކަމާއި ބެހޭގޮތުން މަޝްވަރާކުރުމަށް ވަނީ ނިންމާފައެވެ.
އޯއައިސީއިން ވަނީ ޓްރަމްޕް މި ނިންމެވުނު ކުއްވެރިކޮށް، މި ނިންމުމަކީ ބަލައިގަނެވޭނެ ނިންމުމެއް ނޫންކަމަށް ބުނެފައެވެ. މިއީ ގުދުސްގެ ތާރީހީ އަދި ސިޔާސީ ހައިސިއްޔަތު ގެއްލޭ ނިންމުމެއް ކަމަށާއި މި ނިންމުމަކީ ބައިނަލްލަގްވާމީ އެތަކެއް ގާނޫނުތަކާއި ގަރާރުތަކާއި ހިލާފް ނިންމުމެއް ކަމަށް އޯއައިސީއިން ވަނީ ބުނެފައެވެ.
މި ބައްދަލުވުން ވެގެންދާނީ އިސްލާމީ ގައުމުތަކަށް ވަރަށް މުހިންމު އަދި ހާއްސަ ބައްދަލުވުމަކަށެވެ.
