ނިމުނު ނޮވެމްބަރު މަހު މީރާއަށް އާމްދަނީގެ ގޮތުގައި 910 މިލިއަން ރުފިޔާ ލިބިއްޖެ
މިދިޔަ އަހަރުގެ ނޮވެމްބަރު މަހާއި އަޅާބަލާއިރު މީރާއަށް އާމްދަނީގެ ގޮތުގައި ލިބުނު މިންވަރު ވަނީ 10 އިންސައްތަ ދަށްވެފަ
ދައުލަތުގެ ޓެކްސް އިދާރާ، މޯލްޑިވްސް އިންލޭންޑް ރެވެނިއު އޮތޯރިޓީ - އާމްދަނީގެ ގޮތުގައި އެ އިދާރާއަށް ވަނީ 910 މިލިއަން ރުފިޔާ ލިބިފަ
ނިމުނު ނޮވެމްބަރު މަހު މީރާއަށް އާމްދަނީގެ ގޮތުގައި 910 މިލިއަން ރުފިޔާ ލިބިއްޖެ އެވެ.
ދައުލަތުގެ ޓެކްސް އިދާރާ، މޯލްޑިވްސް އިންލޭންޑް ރެވެނިއު އެތޯރިޓީ (މީރާ) އިން އާންމުކޮށްފައިވާ ނޮވެމްބަރު މަހުގެ ތަފާސް ހިސާބުތައް ދައްކާގޮތުން މިދިޔަ އަހަރުގެ ނޮވެމްބަރު މަހާއި އަޅާބަލާއިރު މީރާއަށް އާމްދަނީގެ ގޮތުގައި ލިބުނު މިންވަރު ވަނީ 10 އިންސައްތަ ދަށްވެފަ އެވެ. އެގޮތުން މިދިޔަ އަހަރުގެ ނޮވެމްބަރު މަހު އާމްދަނީގެ ގޮތުގައި 1 ބިލިއަނަށް ވުރެ ގިނައިން ލިބިފައިވެއެވެ. ނަމަވެސް މި އަހަރުގެ ނޮވެމްބަރު މަހު ލިބޭނެ ކަމަށް ލަފާކުރި އާމްދަނީއަށް ވުރެ އިތުރަށް ލިބިފައިވާ ކަމަށާއި، އެގޮތުން އިތުރަށް 7.5 އިންސައްތަ އާމްދަނީގެ ގޮތުގައި ލިބިފައިވާ ކަމަށް ރިޕޯޓްގައި ބުނެފައިވެއެވެ.
ތަފާސް ހިސާބުތައް ދައްކާގޮތުން މިދިޔަ މަހު މީރާއަށް އެންމެ ބޮޑު އާމްދަނީއެއް ލިބިފައިވަނީ މުދަލާއި ޚިދުމަތުގެ އަގުން ނަގާ ޓެކްސް އިންނެވެ. އެގޮތުން ޖީއެސްޓީގެ ގޮތުގައި 64.7 އިންސައްތަ އާމްދަނީގެ ގޮތުގައި ލިބިފައިވާކަމަށް ރިޕޯޓުގައި ބުނެފައިވެއެވެ.
އޭގެއިތުރުން ބީޕީޓީގެ ގޮތުގައި 12 އިންސައްތަ ލިބިފައިވާއިރު، ގްރީން ޓެކްސްގެ ގޮތުގައި 6.9 އިންސައްތަ ލިބިފައިވެއެވެ.
