އައިއެސް އާދެކޮޅު ހަނގުރާމަ ނިމުނުކަން އިރާޤުގެ ބޮޑުވަޒީރު އިއުލާން ކުރައްވައިފި

އިސްލާމިކް ސްޓޭޓް (އައިއެސް) އާދެކޮޅަށް ކުރާ ހަނގުރާމަ ނިމުނުކަން އިރާޤްގެ ބޮޑުވަޒީރު ހައިދަރު އަލް އަބާދީ އިޢުލާން ކުރައްވައިފި އެވެ.

އިރާޤުގެ ވެރިރަށް ބަގްދާދުގައި ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އަބާދީ ވިދާޅުވީ، އިރާޤާއި ސީރިއާ ގުޅޭ ސަރަހައްދީ ބޯޑަރުގެ ފުރިހަމަ ކޮންޓްރޯލް އިރާޤުގެ ސަލާމަތީ ފައުޖުތަކުތަކުން ހޯދާފައިވާ ކަމަށާއި، އެއާއެކު އިސްލާމިކް ސްޓޭޓާއި ދެކޮޅަށް ކުރި ހަނގުރާމަ ނިމުނުކަން އިޢުލާން ކުރާ ކަމަށެވެ.

ދުޝްމަނުން ބޭނުންވީ އިރާޤުގެ މަދަނިއްޔާތު ކަތިލުމަށް ކަމަށާއި، އެހެން ނަމަވެސް އެއްބައިވަންތަކަމާއި ރޭވުންތެރިކަމާއިއެކު ދުޝްމަނުން ބަލިކޮށް، މަދު ދުވަސްކޮޅެއްގެ ތެރޭގައި ކާމިޔާބު ހޯދާފައިވާ ކަމަށް އަބާދީ ވިދާޅުވި އެވެ.

2014 ވަނަ އަހަރު އިސްލާމިކް ސްޓޭޓުން އީރާޤަށް ވެރިވުމަށްފަހު، އިރާޤުގެ ގާތްގަނޑަކަށް ތިން ބައިކުޅަ އެއް ބަޔަށްވުރެ ބޮޑު ސަރަޙައްދެއް އެމީހުންގެ ބާރުގެ ދަށަށް ގެންދިޔައެވެ.

އިރާޤުގެ ދާޚިލީ ހަނގުރާމައިގެ ފައިދާ ނަގައި، ވެރިރަށް ބަޤްދާދުގެ ހުޅަނގާއި އުތުރުގެ ސަރަޙައްދުތަކުގެ ކޮންޓްރޯލް އައިއެސް އިން ހޯދައި، ހަނގުރާމައިގެ ކިއްލާތަކަކަށް ބަދަލުކޮށް ބޮޑު ސަރަހައްދެއް ސުންނާފަތި ކޮށްފައިވެއެވެ. އެހެންނަމަވެސް އެމެރިކާ އިސްވެ އޮވެ އުފެއްދި އައިއެސް އާދެކޮޅު ކޯލީޝަނުން ވައިގެ މަގުން ފެށި ކެމްޕެއިނާއެކު، ހަނގުރާމަވެރިން ބަލިވެ، އައިއެސްގެ ބާރުގެ ދަށުގައި ހުރި އަވަށްތަކުގެ ކޮންޓްރޯލް މަޑުމަޑުން ދިޔައީ ހޯދަމުންނެވެ.

އަބާދީ ވިދާޅުވީ، އައިއެސް ހަނގުރާމާގައި އިރާޤަށް ފާއިތުވި ތިން އަހަރުގެ ތެރޭގައި 100 ބިލިއަން ޑޮލަރަށްވުރެ ބޮޑު ގެއްލުމެއް ލިބިފައިވާ ކަމަށެވެ. އަދި އެއީ ހަމައެކަނި އެގައުމުގެ އިޤްތިޞާދާއި އުމްރާނީ ވަޞީލަތްތަކަށް ލިބުނު ގެއްލުމުގެ އަގު ކަމަށް އަބާދީ ވިދާޅުވި އެވެ.