މިހާތަނަށް ރިލީޒްކޮށްފައިވާ ފިލްމް ޓްރެއިލާތަކުގެ ތެރެއިން އެއް ދުވަސްތެރޭ އެންމެ ގިނަ މީހުން ބެލި ފިލްމް ޓްރެއިލާގެ ރެކޯޑު މާވެލްގެ 'އެވެންޖާސް އިންފިނިޓީ ވޯ' އިން މުގުރާލައިފިއެވެ.

މި ފިލްމްގެ ޓްރެއިލާ ރިލީސްކުރިތާ 24 ގަޑިއިރު ނުވަނީސް 200 މިލިއަނަށްވުރެ ގިނަ މީހުންވަނީ މި ޓްރެއިލާ ބަލާފައެވެ. މާވެލް ސްޓޫޑިއޯސްއިން ބުނެފައިވަނީ އެކިއެކި ސޯޝަލް ނެޓްވޯކްތައް މެދުވެރިކޮށް މިހާތަނަށް 230 މިލިއަނަށްވުރެ ގިނަ މީހުން މި ޓްރެއިލާ ބަލާފައިވާ ކަމަށެވެ.

މީގެ ކުރިން މި ރެކޯޑު އޮންނަނީ މިއަހަރު ނެރުނު ބިރުވެރި ފިލްމެއް ކަމަށްވާ 'އިޓް: ޗެޕްޓާ ވަން' އަތުގައެވެ. މިއީ ސްޓީވަން ކިންގްގެ ފޮތަކަށް ބިނާކޮށް އުފެއްދި ފިލްމްއެކެވެ. މި ފިލްމްގެ ޓްރެއިލާއަށް 24 ގަޑިއިރު ތެރޭ 197 މިލިއަން ވިއުސް ލިބުނުއެވެ.

މި ފިލްމަކީ މާވެލް ސިނަމެޓިކް ޔުނިވާސްގެ 19 ވަނަ ފިލްމަށްވާއިރު މި ފިލްމުން މާވެލް ސިނަމެޓިކް ޔުނިވާސްގައި ހިމެނޭ މަޝްހޫރު ހުރިހާ ކެރެކްޓާއެއް ފެނިގެންދާނެއެވެ. އެގޮތުން 'އެވެންޖާސް' އަދި 'ގާޑިއަންސް އޮފް ދަ ގެލެކްސީ' ގެ އިތުރުން 'ޑޮކްޓާރ ސްޓްރޭންޖު' ފަދަ ފިލްމްތަކުން ފެނިގެންދިޔަ މުހިންމު ހުރިހާ ކެރެކްޓާއެއް ފެންނާނެއެވެ.

އަންނަ އަހަރުގެ މޭ މަހުގެ ހަތަރު ވަނަ ދުވަހު ރިލީޒް ކުރުމަށް ހަމަޖެހިފައިވާ 'އެވެންޖާސް: އިންފިނިޓީ ވޯރ' ވެގެންދާނީ ރެކޯޑުތައް މުގުރާލާނެ ފިލްމަކަށް ކަމަށް ގިނަ ބަޔަކު ގަބޫލްކުރެއެވެ.