މިއަހަރުގެ ތިން ވަނަ ކުއާޓާގައި ދަށު ކޯޓްތަކަށް ހުށަހެޅުނު މައްސަލަތައް 36 ޕަސެންޓަށް އިތުރު ވެއްޖެ
މިއަހަރުގެ ތިން ވަނަ ކުއާޓާގައި ދަށު ކޯޓްތަކަށް 5799 މައްސަލަ ހުށަހަޅާފައިވޭ
ޖުޑިޝަލް އެޑްމިނިސްޓްރޭޝަން
މިއަހަރުގެ ތިންވަނަ ކުއާޓާގައި ދަށު ކޯޓުތަކަށް ހުށަހެޅުނު މައްސަލަތަކުގެ އަދަދު ، 2016 ވަނަ އަހަރުގެ ތިންވަނަ ކުއާޓާގައި ދަށުކޯޓުތަކަށް ހުށަހެޅުނު މައްސަލަތަކަށް ވުރެ 36 ޕަސެންޓް މައްސަލަ އިތުރުވެފައވާ ކަމަށް " ޝަރުޢީ ކޯޓްތަކުގެ ކޭސް މެނޭޖްމަންޓް ރިޕޯޓް" އިން ދައްކައިފިއެވެ.
ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން ނެރެފައިވާ " ޝަރުޢީ ކޯޓްތަކުގެ ކޭސް މެނޭޖްމަންޓް ރިޕޯޓް" ގައި ބުނެފައިވާ ގޮތުގައި 2016 ވަނަ އަހަރުގެ ތިންވަނަ ކުއާޓާގައި 4263 މައްސަލަ ހުށަހަޅާފައިވާއިރު، މިއަހަރުގެ މިމުއްދަތުގެ ތެރޭގައި 5799 މައްސަލަ ދަށު ކޯޓުތަކަށް ހުށަހަޅާފައިވެއެވެ. މިއީ 2016 ވަނަ އަހަރުގެ ތިންވަނަ ކުއާޓާ އަޅާބަލާއިރު 1536 މައްސަލައިގެ އިތުރުވުމެކެވެ.
މިއަހަރުގެ ތިންވަނަ ކުއާޓާގައި ދަށުކޯޓުކަށް ހުށަހެޅުނު މައްސަލަތަކުގެ އަދަދު އިތުރުވެގެން ގޮސްފައިވަނީ، މި މުއްދަތުގެ ތެރޭގައި ސުޕީރިއަރ އަދި މެޖިސްޓްރޭޓު ކޯޓުތަކަށް ހުށަހެޅުނު މައްސަލަތަކުގެ އަދަދު އިތުރު ވުމާ ގުޅިގެންނެވެ. އެގޮތުން 2016 ވަނަ އަހަރުގެ ތިންވަނަ ކުއާޓަރ އަޅާބަލާއިރު މިއަހަރުގެ ތިންވަނަ ކުއާޓަރގައި ސުޕީރިއަރ ކޯޓުތަކަށް 57 ޕަސެންޓް މައްސަލަ އަދި މެޖިސްޓްރޭޓު ކޯޓުތަކަށް 22 ޕަސެންޓް މައްސަލަ އިތުރަށް ހުށަހެޅިފައިވެއެވެ.
މިއަހަރުގެ ތިންވަނަ ކުއާޓާގައި ދަށު ކޯޓުތަކުން ނިންމި މައްސަލަތަކުގެ އަދަދު، 2016 ވަނަ އަހަރުގެ ތިންވަނަ ކުއާޓާގައި ނިންމި މައްސަލަތަކުގެ އަދަދަށް ވުރެ 5 ޕަސެންޓް މައްސަލަ މަދުވެފައިވެއެވެ.
އެގޮތުން 2016 ވަނަ އަހަރުގެ ތިންވަނަ ކުއާޓާގައި ދަށުކޯޓުތަކުން ޖުމުލަ 4707 މައްސަލަ ނިންމާފައި ވާއިރު، 2017 ވަނަ އަހަރުގެ ތިންވަނަ ކުއާޓާގައި ދަށުކޯޓުތަކުން ޖުމުލަ ނިންމާފައިވަނީ 4493 މައްސަލަ އެވެ. މިއީ 2016 ވަނަ އަހަރުގެ ތިންވަނަ ކުއާޓާގައި ނިންމި މަސައްލަތަކުގެ އަދަދަށް ވުރެ 214 މައްސަލައިގެ މަދުވުމެކެވެ.
ޑީޖޭއޭގެ ރިޕޯޓުގައި ބުނެފައިވާ ގޮތުގައި މިއަހަރުގެ ތިންވަނަ ކުއާޓާގައި ދަށުކޯޓުތަކުން ނިންމި ޖުމުލަ މައްސަލަތަކުގެ އަދަދު މަދުވިކަމުގައިވިޔަސް، މި މުއްދަތުގެ ތެރޭގައި ސުޕީރިއާރ ކޯޓުތަކުން ނިންމި މައްސަލަތަކުގެ އަދަދު ވަނީ އިތުރުވެގެން ގޮސްފައެވެ. ތިންވަނަ ކުއާޓާގައި ނިންމި މައްސަލަތަކުގެ އަދަދު މަދުވެފައިވަނީ މެޖިސްޓްރޭޓު ކޯޓުތަކުން ނިންމި މައްސަލަތަކުގެ އަދަދު މަދުވުމާ ގުޅިގެންނެވެ.
އެގޮތުން 2016 ވަނަ އަހަރުގެ ތިންވަނަ ކުއާޓާއާ އަޅާބަލާއިރު، މިއަހަރުގެ ތިންވަނަ ކުއާޓާގައި ސުޕީރިއާރ ކޯޓުތަކުން ނިންމި މައްސަލަތަކުގެ އަދަދު 5 ޕަސެންޓް އިތުރުވެފައިވެއެވެ. އެހެން ނަމަވެސް މެޖިސްޓްރޭޓު ކޯޓުތަކުން ނިންމި މައްސަލަތަކުގެ އަދަދު ވަނީ 12 ޕަސެންޓް މަދުވެފައެވެ.
މިހަރުގެ ތިންވަނަ ކުއާޓާގައި ދަށު ކޯޓުތަކުގައި ނުނިމިހުރި މައްސަލަތަކުގެ އަދަދު 2016 ވަނަ އަހަރުގެ ތިންވަނަ ކުއާޓާގައި ނުނިމި ހުރި މައްސަލަކަށް ވުރެ 35 ޕަސެންޓް މައްސަލަ އިތުރުވެފައިވެއެވެ. 2016 ވަނަ އަހަރުގެ ތިންވަނަ ކުއާޓާގައި ކޯޓުތަކުގައި 6969 މައްސަލަ ނުނިމި ހުރި އިރު ، މިއަހަރުގެ ސެޕްޓެމްބަރު މަހުގެ ނިޔަލަށް ނުނިމި ހުރި މައްސަލަތަކުގެ އަދަދު ވަނީ 9376 މައްސަލައަށް މަތިވެފައެވެ.
