ކުރީގެ ޔޫގޯސްލާވިއާގެ ވެރިން ހިންގާފައިވާ ޖަރީމާތަކުގެ ޝަރީޢަތްތައް ކުރާ އދގެ ޓްރަބިއުނަލްގެ އަޑު އެހުމެއްގައި ހުރެ ކްރޮއޭޝިއާގެ ކުރީގެ އަސްކަރީ ކޮމާންޑަރު ސްލޮބޮޑާން ޕްރަޖަކް ޒަހަރު ބޮއެފިއެވެ.

ނެދަލޭންޑްސްގެ ދަހޭގްގައި ހުންނަ އދގެ ކޯޓުގައި ޝަރީޢަތް ކުރިއަށްދަނިކޮށް ތިމަންނަ "މި ބޮނީ ޒަހަރޭ" ބުނެ އަމިއްލައަށް ޒަހަރު ބޮއެގެން މަރުވި ޕްރަޖަކްއަކީ ބޮސްނިއާ ދަރިކޮޅުގެ މުސްލިމުންނާއި ދެކޮޅަށް ޤަތުލު އާއްމު ހިންގި ކްރޮއޭޝިއާގެ އަސްކަރިއްޔާގެ އެންމެ އިސް އެއް ކޮމާންޑަރެވެ. ޒަހަރު ބުއިމަށް ފަހު ގޮނޑި މައްޗަށް ވެއްޓި އޮވެ އޭނާ ބުނީ އޭނާއަކީ ހަނގުރާމައިގެ ޖަރީމާ ހިންގި ކުށްވެރިއެއް ނޫން ކަމަށެވެ. ޕްރަޖަކްގެ މައްޗަށް 20 އަހަރުގެ ޖަލު ހުކުމެއް އިއްވާފައިވާއިރު، ބުދަ ދުވަހު އޮތީ އެމައްސަލައިގެ އިސްތިއުނާފުގެ އަޑު އެހުމެކެވެ. 1992ވަނަ އަހަރާއި 1995ވަނަ އަހަރާއި ދެމެދު ހިނގި ހަނގުރާމައިގައި ބޮސްނިއާގެ އެތައް ހާސް މުސްލިމުންނަކަށް އަނިޔާދީ މަރާލި މައްސަލައިގައި ޕްރަޖަކްއާއި އޭރުގެ ކްރޮއޭޝިއާގެ އަސްކަރީ އަދި ސިޔާސީ 6 ލީޑަރެއްގެ މައްޗަށް ކުށް ސާބިތުވެ ގިނަ އަހަރުތަކަކަށް ޖަލަށްލުމަށް ހުކުމްކޮށްފައި ވަނީ 2013ވަނަ އަހަރުއެވެ.

މިމައްސަލައަކީ ކުރީގެ ޔޫގޯސްލާވިއާ ދައުލަތުގެ ދަށުގައި ހުރި ޤައުމުތަކުން ހިންގި ހަނގުރާމައިގެ ޖަރީމާތައް ތަހުޤީޤްކުރުމަށް އެކުލަވާލި އދގެ ޚާއްސަ ޓްރައިބިއުނަލްގެ އެންމެ ފަހުގެ މައްސަލައެވެ. މި ޓްރައިބިއުނަލް އަންނަ މަހު އުވާލާ ގޮތަށް ވަނީ ހަމަޖެހިފައިއެވެ. 1993ވަނަ އަހަރު ޔޫގޯސްލިއާ މައްސަލައިގެ ތެރޭގައި އުފެއްދި މި ޓްރައިބިއުނަލްއިން ވަނީ ސަރބިއާގެ ކުރީގެ އަސްކަރީ ކޮމާންޑަރު ޖެނެރަލް ރަޓްކޯ މިލަޑިޗްގެ މައްޗަށް ހަނގުރާމައިގައި ޤަތުލުއާއްމު ހިންގި މައްސަލަ ސާބިތުވާކަމަށް ކަނޑައަޅާފައެވެ.

ޕްރަޖަކް ޒަހަރު ބުއިމާއި ގުޅިގެން ޓްރައިބިއުނަލްގެ މައްސަލަ މިހާރު ވަނީ މެދުކަނޑާލާފައެވެ. އަދި އޭނާ ބުއި ޒަހަރު އަޅާފައިވާ ފުޅިއާއި ފެންބޯން ގެންގުޅުނު ތަށި ކޯޓުން ބޭރަށް ނުގެންދިޔުމަށް ފަނޑިޔާރުވަނީ އަމުރުކުރައްވާފައެވެ.