މަޖިލީހުގެ މިއަދުގެ ޖަލްސާ ބޭއްވީ ހަމައެކަނި ޕިޕީއެމް މެންބަރުންނަށް، އިދިކޮޅު މެންބަރުންނަކަށް ނާންގާ!
ޖަލްސާއެއް އޮތިއްޔާ ހުރިހާ މެންބަރުންނަށްވެސް އަންގަން ޖެހޭނެ
ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެންބަރު އަބުދުﷲ ޝާހިދު
ރައްޔިތުންގެ މަޖިލީހުގައި ބުދަ ދުވަހު ބޭއްވި 5 މިނެޓްގެ ޖަލްސާ އޮތްކަން އެންގީ ހަމައެކަނި ޕީއެމް މެންބަރުންނަށް ކަމަށާއި އިދިކޮޅު އެއްވެސް މެންބަރަކަށް ޖަލްސާ އޮތްކަން އަންގާފައި ނުވާކަމަށް ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެންބަރު އަބުދުﷲ ޝާހިދު ވިދާޅުވެއްޖެއެވެ.
ރާއްޖެޓީވީން ބުދަ ދުވަހު ގެނެސްދިން ޚާއްސަ ކަވަރޭޖްގައި ވާހަކަފުޅު ދައްކަވަމުން ޝާހިދު ވިދާޅުވީ، ޖަލްސާއެއް އޮތިއްޔާ ހުރިހާ މެންބަރުންނަށް ވެސް އަންގަވަން ޖެހޭނެ ކަމަށާއި އެކަން ކުރަންވާނީ ވަކި ސިޔާސީ ފިކުރަކަށް ބެލުމެއްނެތި ކަމަށެވެ.
ޝާހިދު ވިދާޅުވީ، ޖަލްސާއެއް އޮތްކަން އެނގިވަޑައިގަތީ ދޫދޫމަތިން ތޯތޯ ވާހަކައެއްގެ ގޮތުގައި ކަމަށެވެ. އަދި ޕީޕީއެމްގެ ވައިބާ ގްރޫޕްގައި އެޕާޓީގެ ޕީޖީ ލީޑަރު އަހުމަދު ނިހާން ލިޔުއްވާފައިވާ ލިޔުއްވުމަކާއި ހަވާލާދީ ޖަލްސާއެއް އޮންނާނެ ކަމަށް ނޫސްތަކުގައި ވެސް ލިޔެފައިވަނިކޮށް ފެނިވަޑައިގެެންނެވި ކަމަށް ވިދާޅުވިއެވެ.
"ނިހާނު ވިދާޅުވިކަމަށް އޮތީ ނޫސްތަކުގައި ޕިޕީއެމްގެ ޖަލްސާއެއް މިއަދު 2.30 ގައި އޮންނާނެއޭ، ޕިޕީއެމް ހުރިހާ މެންބަރުން ތައްޔާރުވެވަޑައިގަންނަވާށޭ. ޝާހިދު ވިދާޅުވިއެވެ.
މަޖިލީހުގައި އަމަލުކުރަން އޮންނަ ގޮތަކީ މަޖިލީހުގައި އެޖެންޑާއެއް އޮތްކަމުގައި ވަނީނަމަ އެކަން އަމީން އާންމު މަޖިލީހުގެ މެންބަރުންނަށް އެންގެވުން ކަމަށް ޝާހިދު ވިދާޅުވިއެވެ.
ޓީވީ ހުޅުވާލެއްވުމުން ރައްޔިތުންގެ މަޖިލިސް ކުރާގޭ ކަހަލަ ތަނެއްގައި މަސީހު ކަހަލަ ބޭފުޅަކު އިންނަވައިގެން، އަދި މަޖިލީހުގެ އަމީން އާންމުއާ ވެސް ވަރަށް ވައްތަރު ބޭފުޅަކު އިންނަވައިގެން ޖަލްސާ އެއް ކުރިއަށް ގެންދާތީ އެއީ ހަމަ ހަގިގީ ރައްޔިތުންގެ މަޖިލީހުގެ ޖަލްސާއެއް ތޯ ސާފުކޮށްދެއްވުމަށް އަމީން އާންމަށް މެސެޖަކުން ދެެންނެވި ކަމަށް ޝާހިދު ވިދާޅުވިއެވެ. އެހެންނަމަވެސް އަމީންއާންމު އެ މެސެޖަށް ޖަވާބު ދެއްވައިފައިނުވާ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ މިއަދު މަޖިލީހުގައި ބޭއްވުނު ޖަލްސާއަކީ މަޖިލީހުގެ ތެރެއިން ސަރުކާރުން ބޭނުންވާ ބަޔަކަށް އަންގައިގެން، ތެޅިފޮޅިގަނެގެން ކޮންމެވެސް ކަހަލަ ޖަރީމާއެއް ހިންގުމަށް ބޭއްވި ޖަލްސާއެއްކަމަށް ވެދާނެ ކަމަށެވެ..
