ބަޑިގުދަނާއި ތިޖޫރިއާ ގާނޫނު އަސާސީގެ ރައްކާތެރިކަން މިއަދު މިވަނީ ގެއްލިފައި: އިންތި
ރައްޔިތުންގެ އެއްވެސް ރައްކާތެރިކަމެއް ނެތް
މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ
މިސަރުކާރުން އަމަލު ކުރަމުންދާ ގޮތުން ބަޑިގުދަނުގެ ރައްކާތެރިކަމާއި ތިޖޫރީގެ ރައްކާތެރިކަމާއި ގާނޫނު އަސާސީގެ ރައްކާތެރިކަން ގެއްލިފައިވާ ކަމަށް، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ(އިންތި) ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްވަމުން، މެންބަރު އިންތި ވިދާޅުވީ، މި ސަރުކާރު އައުމަށް ފަހު ރައްޔިތުންނަށް އެއްވެސް ވަރަކަށް އިންސާފު ލިބެމުންދާ މަންޒަރު ނުފެންނަ ކަމަށާއި މިއަދު މިފެނިގެން ދަނީ ކޮރަޕްޝަނާއި ފަސާދައިން ފުރިފައިވާ ސަރުކާރެއް ކަމަށެވެ.
"އެންމެހައި ޖަމިއްޔާ ޖަމާއަތްތަކާއި، ކޮމަންވެލްތާއި، އދ އާ ޑިމޮކްރެޓިކް ބޮޑެތި ގައުމުތަކާއި، މިހެން ގޮސް މުޅި ދުނިޔެ، އެއްބަސްވެފައިވަނީ ސިޔާސީ ފަރާތްތަކުން ހިފާ ހައްޔަރު ކޮށްފައިވަނީ ރޯނުބައިކޮށް ކަމަށް. ދިވެހި ރާއްޖޭގައި ވެރިކަން ކުރައްވާފައިވާ ބޭފުޅަކަށްވެސް ރައްކާތެރިކަމެއް މިގައުމުގައި ނެތް. އެގޮތުން ރައީސް މުހައްމަދު ނަޝީދުގެ މައްޗަށް ނުހައްގު ދައުވާއެއް ހިންގާ، ނުހައްގު ޝަރީއަތެއް ވަނީ ހިންގާފަ،" އިންތި ވިދާޅުވި އެވެ.
ހުދުމުހުތާރު ވެރިކަމެއް ބިނާ ކުރުމަށްޓަކާއި ކުރައްވަމުން ގެންދަވާ މަސައްކަތްތައް މިވެރިކަން ފެށުނީއްސުރެ ފެންނަމުންދާ ކަމަށް އިންތި ވިދާޅުވި އެވެ. ރައީސް އަބްދުﷲ ޔާމީން އެންމެ އިސްކަމެއް ދެއްވަނީ ތިޖޫރިއަށް ވާގޮތް ބެއްލެވުމަށް ކަމަށާއި ދައުލަތުގެ ފައިސާ ހުސްވެ، ތިޖޫރި ވަޅުގަނޑަކަށް ވެއްޓިގެންދާތަން ކިޔައިދޭނެ ބަޔަކު ތިބުމަކީ މި ސަރުކާރުން ބޭނުންވާނެ ކަމެއް ނޫން ކަމަށް އޭނާ ވިދާޅުވި އެވެ.
" މިކަންކަން މިގޮތަށް ދާއިރުގައި ސިޔާސީ ފަރާތްތައް ދޫކޮށްލާފައި ހުރުމަކީ ސަރުކާރަށް ވަރަށް ނުރައްކާތެރި ކަމަކަށްވާނެ ނޫންތޯ. ސަރުކާރު ޖަވާބުދާރީ ކުރުވުމުގެ މަސައަކަތް ކުރުމަކީ ވަރަށް ނުރައްކާތެރި ކަމެއް. މިކަމަށްޓަކައި ސިޔާސީ ލީޑަރުން ޖަލަށް ލައިގެން އުޅުއްވަނީ،" އިންތި ވިދާޅުވި އެވެ.
އިންތި ވިދާޅުވީ، އިދިކޮޅު ސިޔާސީ ޕާޓީތަކުގެ ޖަލްސާއަށް ދާ މީހުންގެ އަދަދާއި ސަރުކާރުން ބާއްވާ ޖަލްސާތަކުގައި ބައިވެރިވާ މީހުންގެ އަދަދުތައް އަޅާ ކިޔާ އިރު ސަރުކާރުން ބާއްވާ ޖަލްސާތަކަށް މީހުން ގެންދަނީ ގަދަކަމުން ބިރުދައްކައިގެން ކަމަށެވެ. އަދި އެގޮތަށް ގެންދާ ގެންދިއުމުގެ ސަބަބުން ރައްޔިތުންގެ އިތުރު ނަފްރަތު ރައީސް ޔާމީނަށް ލިބިގެންދާނެ ކަމަށް އޭނާ ވިދާޅުވި އެވެ. އެކަން ލޯކަލް ކައުންސިލް އިންތިހާބުން ވެސް ފެނިގެން ގޮސްފައިވާ ކަމަށް އިންތި ވިދާޅުވި އެވެ. މިގޮތަށް ޖަލްސާތަކަށް މީހުން ގެނެސް ތާއީދޭ ކިޔާ ވާހަކަ ދެއްކުމަކީ އަމިއްލަ ނަފްސަށް އޮޅުވާލުން ކަމަށް އިންތި ވިދާޅުވި އެވެ.
މިގޮތަށް އަމިއްލަ ނަފްސަށް އޮޅުވާލާނީ މޮޔައިން ކަމުގައި ފާހަގަކުރައްވާ އިންތި ވިދާޅުވީ، އިދިކޮޅު ފަރާތްތަކުން ބާއްވާ ޖަލްސާތަކަށް މީހުން ނުދަނީ ސަރުކާރަށް އެމީހުންގެ މޫނު ފެނިއްޖެ ނަމަ ވަޒީފާއިން ކަނޑާލާނެ ކަމުގެވެސް ބިރު އޮތުމާވެސް އެކު ކަމަށެވެ. އަދި އެއްވެސް މަޖުބޫރު ކަމެއް ނެތި އަމިއްލަ ޖީބުން ހަރަދުކޮށްގެން ގިނަ ބަޔަކު ގުޅިފައިވާ ސިޔާސީ ޕާޓީތަކުގެ ޖަލްސާތަކަށް ޖަމާވާއިރު އިދިކޮޅު ފަރާތްތަކަށް މާލޭގައިވެސް ޖަލްސާއެއް ބޭއްވުމުގެ ފުރުސަތު ނުދޭކަން އިންތި ފާހަގަކުރެއްވި އެވެ.
