ރާއްޖޭގެ ކަނޑުގެ ސަރަހައްދަށް ވަން ލަންކާގެ ދެ މަސް ބޯޓެއް އަތުލައިގަނެފި
މި ދެ ބޯޓު ފެނިފައިވަނީ ވ. އަތޮޅުގެ އިރުން
ކޯސްޓްގާޑު ބޯޓް
ރާއްޖޭގެ އިގްތިސާދީ ކަނޑުގެ ސަރަހައްދުގައި މަސްވެރިކަން ކުރަމުންދިޔަ ބޭރުގެ ދެ މަސް ބޯޓެއް ކޯސްޓްގާޑުގެ ބެލުމުގެ ދަށަށް ގެނެސްފައިވާ ކަމަށް އެމްއެންޑީއެފް އިން ބުނެފި އެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އަންގާރަ ދުވަހުގެ އިރުއޮއްސުނު ވަގުތު ކޯސްޓްގާޑުގެ ބެލުމުގެ ދަށަށް ގެނައި މި ދެ މަސް ބޯޓަކީ ސްރީލަންކާގެ ދެ މަސް ބޯޓެވެ. ދިގުމިނުގައި 13 މީޓަރުގެ މިއިން ކޮންމެ ބޯޓެއްގައި ފަސް މީހުން ތިބި ކަމަށް އެމްއެންޑީއެފް އިން ބުނެ އެވެ.
މި ދެބޯޓު ފެނިފައިވަނީ ވ.އަތޮޅުގެ އިރުން މަސްވެރިކަން ކުރަމުންދަނިކޮށް، އެސަރަހައްދުގައި ޕެޓްރޯލް ކުރަމުންދިޔަ އެމްއެންޑީއެފް ކޯސްޓްގާޑްގެ އުޅަނދަކަށް ކަމަށް އެމްއެންޑީއެފް އިން ބުނެ އެވެ.
މި ދެ މަސް ބޯޓު މާލެ ގެނައުމުގެ މަސައްކަތް އެމްއެންޑީއެފް ކޯސްޓްގާޑުން އަންނަނީ ކުރަމުންނެވެ. އަދި މި ދެ ބޯޓު ރާއްޖޭގެ އިގްތިސާދީ ކަނޑުގެ ސަރަހައްދުގައި މަސްވެރިކަންކުރަމުންދިޔަ މައްސަލަ، ސަރުކާރުގެ ކަމާ ގުޅުންހުރި އިދާރާތަކާ ގުޅިގެން ތަހުގީގު ކުރަމުންދާ ކަމަށް ވެސް އެމްއެންޑީއެފް އިން ބުނެ އެވެ.
