އިޓާލިއަން ސެރީއޭގައި ކުޅުނު މެޗު ކާމިޔާބުކޮށް ތާވަލުގެ ކުރިޔަށް ޖެހިލުމަށް ޔުވެންޓަސްއިން ކުރަމުން އަންނަ އުއްމީދުތައް އެ ޓީމުން ދަމަހައްޓައިފިއެވެ.
ކްރޮޓޯންއާއި ދެކޮޅަށް އަމިއްލަ ދަނޑުގައި ކުޅުނު މެޗުން ޔުވެންޓަސް މޮޅުވެފައިވަނީ 3-0ގެ ނަތީޖާއަކުންނެވެ. ގިނަ ބަދަލުތަކާކާއެކު ނުކުތް ޔުވެންޓަސްގެ ޓީމުން ވަނީ ގިނަ ވަގުތު ބޯޅަ ހިފަހައްޓައިގެން ކުޅެ ލަނޑުޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ.
ޔުވެންޓަސްގެ ޓީމުން ފުރަތަމަ ހާފުގައި ކްރޮޓޯންގެ ގޯލާއި އަމާޒުކޮށް ގިނަ ހަމަލާތަކެއް ފޮނުވާލި ނަމަވެސް އެ ޓީމަށް މި ހާފުގައި ލަނޑު ޖެހިފައެއް ނުވެއެވެ.
ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި ޔުވެންޓަސްއިން ވަނީ އެ ޓީމުގެ ކުޅުން އިތުރަށް ވަރުގަދަ ކޮށްފައެވެ. އެގޮތުން އެ ޓީމުން އުފައްދަމުން ދިޔަ ހަމަލާތަކުގެ ނަތީޖާއަކަށް ވެގެންދިޔައީ މެޗުގެ 52 ވަނަ މިނެޓުގައި މާރިއޯ މަންޒުކިޗް ލަނޑެއް ޖަހައިދީ އެ ޓީމަށް ލީޑު ނަގައިދިނުމެވެ.
މި ލަނޑަށް ފަހު ޔުވެންޓަސްއިން ކުޅުން އިތުރަށް ވަރުގަދަ ކުރުމުގެ ނަތީޖާއަކަށް ވެގެންދިޔައީ 60 ވަނަ މިނެޓުގައި މަޓިއާ ޑެޝިގްލިއޯ ލަނޑެއް ޖަހައިދީ އެ ޓީމުގެ ލީޑު ފުޅާ ކޮށްދިނުމެވެ. ޔުވެންޓަސްގެ ތިންވަނަ ލަނޑު މެޗުގެ 71 ވަނަ މިނެޓުގައި ޖަހައިދިނީ އެ ޓީމުގެ ޑިފެންޑަރު މެހެދީ ބެނާޓިއާއެވެ.
އިޓާލިއަން ސެރީއޭގައި އިންޓަ މިލާންވަނީ ރަށުން ބޭރުގައި 3-1 ގެ ނަތީޖާއަކުން ކަގްލިއާރީ ބަލިކޮށްފައެވެ. މި މެޗުގައި އާޖެންޓީނާގެ ފޯވާޑް މައުރޯ އިކާޑީ އެ ޓީމަށް ދެ ލަނޑު ޖަހައިދިންއިރު މާސެލޯ ބޮރްޒޮވިޗް ވެސް ވަނީ ލަނޑެއް ޖަހައިދީފައެވެ. ކަގްލިއާރީގެ ލަނޑު އެ ޓީމަށް ޖަހައިދިނީ ލިއޮނާޑޯ ޕަވޮލޭޓީއެވެ.
ލީގުގެ އެއްވަނައިގައި އޮތް ނަޕޯލީ ވަނީ 1-0 ގެ ނަތީޖާއަކުން އުދިނޭޒީ ބަލިކޮށް އެއްވެސް މެޗަކުން ބަލިނުވުމުގެ ރެކޯޑު ދަމަހައްޓާފައެވެ. މި މެޗުގައި ޖެހި ހަމައެކަނި ލަނޑު ނަޕޯލީއަށް ޖަހައިދިނީ ޖޯޖީނިއޯއެވެ.
އިޓާލިއަން ސެރީއޭގައި ކުޅުނު އިތުރު މެޗުތަކައް ބަލާލާއިރު އޭސީ މިލާންއާއި ޓޮރީނޯ ކުޅުނު މެޗު ނިމިފައިވަނީ 0-0 ގެ ނަތީޖާއަކުން އެއްވަރުވެގެންނެވެ. ޖެނޯއާ އާއި ރޯމާ ކުޅުނު މެޗު 1-1ގެ ނަތީޖާއަކުން އެއްވަރުވިއިރު ލާޒިއޯ އާއި ފިއޮރެންޓީނާ ކުޅުނު މެޗު ވެސް ނިމިފައިވަނީ 1-1 ގެ ނަތީޖާއަކުން އެއްވަރުވެގެންނެވެ.
އިޓާލިއަން ސެރީއޭގެ އެއްވަނައިގައި 38 ޕޮއިންޓާއެކު ނަޕޯލީ އޮތްއިރު ދެވަނައިގައި 36 ޕޮއިންޓާއެކު އޮތީ އިންޓަ މިލާންއެވެ. ތިންވަނައިގައި 34 ޕޮއިންޓާއެކު ޔުވެންޓަސް އޮތްއިރު ހަތަރުވަނައިގައި 31 ޕޮއިންޓާއެކު އޮތީ ރޯމާއެވެ.
