ސްޕެނިޝް ލަލީގާގެ ތާވަލުގެ އެންމެ ކުރީގައި އޮތް ދެ ޓީމު ކުޅުނު މެޗު އެއްވަރުވެގެން ނިމިއްޖެއެވެ.

ލަލީގާގެ އެންމެ ކުރީގައި މިވަގުތު އޮތް ދެ ޓީމު ކަމަށްވާ ބާސެލޯނާއާއި ވެލެންސިއާ ކުޅުނު މެޗު ނިމިފައިވަނީ 1-1 ގެ ނަތީޖާއަކުން އެއްވަރު ވެގެންނެވެ. ރީތި ފުޓްބޯޅައެއް ފެނިގެންދިޔަ މި މެޗުގެ ފުރަތަމަ ހާފުގައި ބާސާގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ. ފުރަތަމަ ހާފުގައި ބާސާއިން ލަނޑު ޖެހުމަށް ހުސް ގިނަ ފުރުސަތުތަކެއް ތަނަވަސް ކުރިއިރު ވެލެންސިއާއިން ވެސް ވަނީ ކައުންޓާ އެޓޭކުގައި ލަނޑު ޖެހުމަށް ފުރުސަތުތަކެއް ތަނަވަސް ކޮށްފައެވެ.

ބާސާއިން މި ހާފުގައި ލަނޑެއް ޖެހި ނަމަވެސް ރެފްރީ ނިންމީ އެއީ ލަނޑެއް ނޫން ކަމަށެވެ. އެގޮތުން މެސީ ފޮނުވާލި ބާރު ހަމަލާއެއް ވެލެންސިއާގެ ކީޕަރުގެ އަތުގައި ޖެހުމަށް ފަހު ގޯލުގެ ރޮނގު ހުރަސްކުރި ނަމަވެސް، ރެފްރީ ނިންމާފައިވަނީ ބޯޅަ ގޯލު ހުރަސް ނުކުރާ ކަމަށެވެ. އެހެން ނަމަވެސް ރިޕްލޭތަކުން ދައްކާ ގޮތުން ވެލެންސިއާ ކީޕަރު ބޯޅަ ސާފުކޮށްލުމުގެ ކުރިން އެ ބޯޅަ ގޯލުގެ ރޮނގު ހުރަސްކޮށް ތިން ފޫޓު އެތެރެއަށް ވަދެފައިވެއެވެ.

ރެފްރީގެ މި ގޯސް ނިންމުމާއެކު ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ވެލެންސިއާއިން ވަނީ ދެވަނަ ހާފުގައި ކުޅުން ރަނގަޅުކޮށް ލަނޑުޖެހުމަށް ފުރުސަތުތަކެއް ތަނަވަސް ކޮށްފައެވެ. ނަތީޖާއެއްގެ ގޮތުން މެޗުގެ 60 ވަނަ މިނެޓުގައި ހޯސޭ ގާޔާ ތަނަވަސްކޮށްދިން ފުރުސަތެއްގައި ރޮޑްރިގޯ ވަނީ ލަނޑެއް ޖަހައިދީ ވެލެންސިއާއަށް ލީޑު ނަގައިދީފައެވެ.

މި ލަނޑާއެކު ވެލެންސިއާގެ ސްޓޭޑިއަމްގައި ތިބި ސަޕޯޓަރުންގެ އަޑު އިތުރަށް ގަދަވެގެން ދިޔަ ނަމަވެސް މެސީ ތަނަވަސްކޮށްދިން ފުރުސަތަކުން ޖޯޑީ އަލްބާ ވަނީ ލަނޑެއް ޖަހައިދީ ބާސާއަށް މެޗުން ޕޮއިންޓެއް ހޯދައިދީފައެވެ.

ލަލީގާގައި ކުޅުނު އިތުރު މެޗުތަކަށް ބަލާލާއިރު، އެޓްލެޓިކޯ މެޑްރިޑް ވަނީ ރަށުން ބޭރުގައި 5-0ގެ ނަތީޖާއަކުން ލެވަންޓޭ ބަލިކޮށްފައެވެ. ޑިޕޯޓިވޯއާއި އެތްލެޓިކް ބިލްބާއޯ ބައްދަލުކުރި މެޗު ނިމިފައިވަނީ 2-2ގެ ނަތީޖާއަކުން އެއްވަރުވެގެންނެވެ. ހަމައެހެންމެ ރެއާލް ސޮސިއެޑާޑް އާއި ލަސް ޕަލްމާސް ބައްދަލުކުރި މެޗު ވެސް ނިމިފައިވަނީ 2-2 ގެ ނަތީޖާއަކުން އެއްވަރުވެގެންނެވެ.

މި މެޗު އެއްވަރުވުމާއި ވިދިގެން ލަލީގާގެ ޕޮއިންޓް ތާވަލަށް އެއްވެސް ބަދަލެއް އައިސްފައެއް ނުވެއެވެ. އެގޮތުން ކުޅުނު 13 މެޗުން ލިބުނު 35 ޕޮއިންޓާއެކު އެއްވަނައިގައި ބާސާ އޮތްއިރު ދެވަނައިގައި 31 ޕޮއިންޓާއެކު އޮތީ ވެލެންސިއާއެވެ. ތިންވަނައިގައި 27 ޕޮއިންޓް ހަމަކޮށް ލަނޑުގެ ތަފާތުން އެޓްލެޓިކޯ މެޑްރިޑް އޮތްއިރު ހަމަ އެ އަދަދަށް ޕޮއިންޓް އެއްކޮށް އެހެނަސް ލަނޑުގެ ތަފާތުން ހަތަރު ވަނަ ލިބެނީ ރެއާލް މެޑްރިޑަށެވެ.