މުގާބޭގެ އިތުބާރު ނެތްކަމުގެ މައްސަލަ އޮތީ ކުރިއަށް: ޒާނޫ-ޕީއެފް
ގިނަ ބަޔަކު އުއްމީދުކޮށްގެން ތިބީ އާދިއްތަ ދުވަހުގެރޭ މުގާބޭ އިސްތިއުފާ ދެއްވާނެކަމަށް
ޓީވީ މެދުވެރިކޮށް މުގާބޭ ރައްޔިތުންނާއި މުޚާޠަބުކުރައްވާއިރު، ހަރާރޭގެ ކެފޭއެއްގައި ބަޔަކު ޓީވީ އިން އެމަންޒަރުތައް ބަލަނީ
ވެރިކަމުން އިސްތިއުފާ ދެއްވުމަށް ދެކޮޅު ހެއްދެވި ނަމަވެސް ޒިމްބާބްވޭގެ ރައީސް ރޮބަޓް މުގާބޭގެ އިތުބާރު ނެތްކަމުގެ މައްސަލަ ޤާނޫނު ހަދާ މަޖިލިސް ތެރެއިން ކުރިއަށް ގެންދާނެ ކަމަށް ވެރިކަން ކުރާ ޒާނޫ-ޕީއެފް ޕާޓީއިން ބުނެފިއެވެ. މިދިޔަ ހަފްތާގައި ޒިމްބާބްވޭގެ އަސްކަރިއްޔާއިން މުގާބޭ ގޭބަންދުކުރުމަށް ފަހު ޒާނޫ-ޕީއެފް ޕާޓީއިން ވަނީ މުގާބޭގެ ބާރު ޕާޓީތެރެއިން ކަނޑުވާލާފައެވެ. އަދި އާދިއްތަ ދުވަހު ބޭއްވި ޕާޓީގެ ސެންޓްރަލް ކޮމިޓީއިން ވަނީ މުގާބޭ ޕާޓީގެ ވެރިކަމުން ދުރުކޮށް، އެމަޤާމަށް އެމަރސަން ނަންގަގްވާ އައްޔަން ކޮށްފައެވެ. ނަންގަގްވާއަކީ ނައިބު ރައީސްކަމުގައި ހުންނަވަނިކޮށް މީގެ ދެހަފްތާ ކުރިން މަޤާމުން ދުރުކުރެވުނު ބޭފުޅެކެވެ. މުގާބޭގެ ނައިބުކަމުން ނަންގަގްވާ ވަކިކުރެއްވީ މުގާބޭގެ އަނބިކަނބަލުން ގްރޭސް މުގާބޭ ޒިމްބާބްވޭގެ ވެރިކަމަށް ވަޑައިގަތުމަށް ކުރެއްވި މަސައްކަތަށް މަގުފަހިކުރެއްވުމަށެވެ.
ޒާނޫ-ޕީއެފްއިން އާދިއްތަ ދުވަހު ބުނީ ހޯމަ ދުވަހުގެ މެންދުރުގެ ކުރިން މުގާބޭ އިސްތިއުފާ ދެއްވަން ޖެހޭނެ ކަމަށެވެ. އެހެން ނޫންނަމަ މަޤާމުން ދުރުކުރުމަށް އިތުބާރު ނެތްކަމުގެ ވޯޓެއް ނަގާނެކަމުގެ އިންޒާރު ޤާނޫން ހަދާ މަޖިލީހުގައި ހިމެނޭ މެމްބަރުން ވަނީ ދެއްވާފައެވެ. އެހެން ނަމަވެސް އާދިއްތަ ދުވަހުގެ ރޭ ޤައުމީ ޓީވީ މެދުވެރިކުރައްވައި މުގާބޭ ދެއްކެވި ވާހަކަފުޅުގައި ވިދާޅުވީ އަންނަ މަހު ބާއްވާ ޒާނޫ-ޕީއެފްގެ ކޮންގްރެސްގެ ރިޔާސަތު ބަލަހައްޓަވާނެ ކަމަށެވެ. ޓީވީ މެދުވެރިކުރައްވައި ދެއްކެވި ވާހަކަފުޅުގައި އިސްތިއުފާ ދެއްވުމާއި ގުޅޭ ވާހަކައެއް މުގާބޭ ނުދައްކަވައެވެ.
ޒާނޫ-ޕީއެފްއިން މިހާރު ތައްޔާރު ވަމުންދަނީ އެޕާޓީއިން އުއްމީދުކުރި ގޮތަށް މުގާބޭ އިސްތިއުފާ ނުދެއްވުމާއި ގުޅިގެން ދެން އެޕާޓީއިން އަޅަން ޖެހޭ ފިޔަވަޅުތައް އެޅުމަށެވެ. ގިނަ ބަޔަކު އިއްމީދުކޮށްގެން ތިބީ އާދިއްތަ ދުވަހުގުރޭ މުގާބޭ އިސްތިއުފާ ދެއްވާނެ ކަމަށެވެ.
