މުގާބޭގެ ބާރު ނިމުނުކަމުގެ އުފާ ފާޅުކުރަން ފަށައިފި
އަސްކަރިއްޔާއިން ދަނީ އެއްވުމަށް ތާއީދުކުރަމުން
ޒިމްބާބުވޭގެ ރައީސްކަމުގެ މަގާމުން ރޮބަރޓް މުގާބޭގެ ބާރުތައް ނިމުމަކަށް އަތުވެއްޖެ ކަމަށް ބުނެ އެ ގައުމުގެ އެކި ކަންކޮޅުގައި އުފާފާޅުކުރަން ފަށައިފިއެވެ.
ޒިމްބާބުވޭގެ ހަރޭރޭގެ މަގުތަކަށް އެންމެ ފުރަތަމަ މީހުން ޖަމާވާން ފެށީ މުގާބޭ އިސްތިއުފާދެއްވުމަށް ގޮވާލައެވެ. ބީބީސީގެ މުރާސިލު ބުނީ މުޒާހަރާއަށް ނުކުތް ފަރާތްތަކުން ވަނީ ސިފައިންނާ ސަލާމްކޮށް، ބައްދައި އުފާފާޅުކޮށްފައިވާ ކަމަށެވެ.
ބީބީސީގައި ވާހަކަދެއްކި ފިރެހެނަކު ވަނީ މިއަދަކީ "އާ ފެށުމެއް" ކަމަށް ބުނެފައެވެ.
މި އެއްވުމަށް އަސްކަރިއްޔާ އާއި ވެރިކަންކުރާ ޒަނޫ ޕީއެފް ޕާޓީން ވެސް ވަނީ ތާއީދުކޮށްފައެވެ.
ޒިމްބާބުވޭގެ މިނިވަން ކަމަށް ހަނގުރާމަކުރި ކުރީގެ ސިފައިންގެ ތެރެއިން މިދިޔަ އަހަރާ ހަމައަށް މުގާބޭއަށް ވަފާތެރިކަންމަތީ ތިބި ސިފައިން ވެސް ގެންދަނީ މުގާބޭ އިސްތިއުފާ ދެއްވަން ޖެހިވަޑައިގަންނަވާ ކަމަށް ބުނަމުންނެވެ.
އެއްވެފައިވާ މީހުން ގެންދަނީ އަސްކަރިއްޔާއިން ސުލްހަވެރި ގޮތަކަށް މައްސަލައިގެ ތެރެއަށް ވަދެފައި ވާތީ ޝުކުރު އަދާކުރާ ކަމަށް ގޮވަމުންނެވެ.
ވެރިކަންކުރާ ޒަނޫ ޕީއެފް ޕާޓީގެ 10 ގޮފީގެ ތެރެއިން މަދުވެގެން އަށް ގޮތްޕަކުން ހުކުރު ދުވަހު ވަނީ މުގާބޭ ރައީސްކަމުގެ މަގާމުންނާއި ޕާޓީގެ ސެކްރެޓަރީގެ މަގާމުން އިސްތިއުފާދެއްވުމަ ށްގޮވާލާފައެވެ.
އާއްމުކޮށް ނުފެންނަ ފަދަ ގޮތަކަށް ބްރޯޑްކާސްޓްކޮށްފައިވާ މި ބައްދަލުވުމުގައި އެތައް ސަރަހައްދެއްގެ ލީޑަރުން ދައުލަތުގެ ޓީވީގައި ވަނީ މުގާބޭ އިސްތިއުފާދެއްވަން ޖެހިވަޑައިގަންނަވާނެ ކަމަށް ވިދާޅުވެފައެވެ.
މީގެ އިތުރުން އެ ފަރާތްތަކުން ވަނީ މުގާބޭގެ އަނބިކަނބަލުން ގްރޭސް މުގާބޭ ޕާޓީން އިސްތިއުފާދެއްވައި ޕާޓީގެ ސެންޓްރަލް ކޮމިޓީއަށް ދާދި ފަހުން ނައިބު ރައީސްކަމުގެ މަގާމުން ވަކިކުރެއްވި އެމަސަން ނަންގަގްވާ ހަމަޖެއްސެވުމަށް ގޮވާލާފައެވެ. ނަންގަގްވާ ކުރިން ހުންނެވީ އެ މަގާމުގައެވެ.
ވެރިކަން ކުރާ ޕާޓީން މުޒާހަރާއަށް ތާއީދުކޮށްފައިވާއިރު އަސްކަރިއްޔާއިން ހުކުރުދުވަހު ނެރުނު ބަޔާނެއްގައި ޒިމްބާބްވޭ ޑިފެންސް ފޯސްއިން ބުނެފައި ވަނީ އެ ހިނގާލުމަކީ އެއްބައިވަންތަކަމުގެ ހިނގާލުމެއް ކަމަށެވެ. މީގެ އިތުރުން އަސްކަރިއްޔާއިން ވަނީ ހަމަނުޖެހުން ނުއުފެއްދުމަށާއި ރުޅިވެރިކަން އުފެދޭ ފަދަ ވާހަކަތައް ނުދެއްކުމަށް އިލްތިމާސްކޮށްފައެވެ.
ރައީސް މުގާބޭ މިދިޔަ ބުދަދުވަހުން ފެށިގެން ހުންނަވަނީ އަސްކަރިއްޔާގެ ބެލުމުގެ ދަށުން ގޭ ބަންދުގައެވެ.
