ސިޔާސީ ވާދައިގެ ނަތީޖާއަކީ ދާޚިލީ ހަނގުރާމައަކަށް ވެގެން ނުވާނެ ކަމަށާއި ތަފާތު ވިސްނުން ތަކުގައިވެސް ގައުމީ އިންތައް ކަނޑައެޅެންވާނެ ކަމަށް ރައީސުލްޖުމުހުރިއްޔާ އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
ރައީސް ޔާމީން މިހެން ވިދާޅުވެފައި މިވަނީ ސިޔާސީ ގޮތުން އެމަނިކުފާނާ ދެކޮޅު އަދި އެމަނިކުފާނުގެ ސަރުކާރުގެ ތެރެއިންވެސް އެމަނިކުފާނާ ޚިޔާލް ތަފާތު ސިޔާސީ ގިނަ ބޭފުޅުންގެ މައްޗަށް ދައުވާ ކުރެވި ބައެއް ބޭފުޅުން ޖަލަށްލާފައިވާ ދަނޑިވަޅެއްގައި މިއަހަރުގެ ޖުމްހޫރީ ދުވަހުގެ މުނާސަބަތުގައި ޤައުމާ މުޚާތަބު ކުރައްވާ ދެއްކެވި ވާހަކަފުޅުގައެވެ.
ޖުމްހޫރީ ދުވަސް ފާހަގަކުރުމަށް ހޮނިހިރު ދުވަހުގެ ރޭ ދަރުބާރުގޭގައި ބޭއްވި ޚާއްސަ ޖަލްސާގައި ރައީސް ޔާމީން ވިދާޅުވީ ގައުމަށް ތެދުވެރި ވަފާތެރި ދަރިން ތަކެއް ގޮވައިގެން ގައުމު ބިނާ ކުރުމުގެ މަސައްކަތް ކުރާއިރު ކުރިމަތިވާ ގޮންޖެހުންތައް މަދު ނޫން ކަމަށާއި ގައުމު ބިނާ ކުރުމުގެ މަސައްކަތުން އެކަކުވެސް ބާކީވެގެންނުވާނެ ކަމަށެވެ.
އެމަނިކުފާނު ވިދާޅުވީ ތަފާތު ވިސްނުމުގެ ތެރެއިން ގައުމީ ފެންވަރުގެ ހަމަނުޖެހުމެއް ނުގެނައުމަށް އަޒުމު ކަނޑައަޅައި، އެކަމަށް ހުރިހާ އެންމެންވެސް ފާޅުގައި މަސައްކަތް ކުރަން ވާނެ ކަމަށެވެ.
"ގައުމު ބިނާ ކުރުމުގެ މަސައްކަތުން ހަމަ އެކަކުވެސް ބާކީވެގެން ނުވާނެ. އަޅުގަނޑުމެންގެ ތެރޭގައި ހުރި ސިޔާސީ ޚިޔާލު ތަފާތު ވުމަކީ ގައުމު ހަނަގުރާމައަކަށް ވިޔަ ނުދީ ގައުމުގެ ތަރައްގީގެ މަސައްކަތުގައި އެންމެން ބައިވެރިވާންވާނެ،" ރައީސް ޔާމީން ވިދާޅުވިއެވެ.
އެމަނިކުފާނު ވިދާޅުވީ އެ ގައުމެއްގެ ސަގާފަތާއި ބީރައްޓެރި ފިކުރުތައް އެ ގައުމެއްގައި ފަތުރައިގެން ބޭރުގެ ބަޔެއްގެ ފިކުރާވާ މީހުންނަށް ވެރިކަމަށް އައުމަށް ދުނިޔޭގެ އެކި ކަންކޮޅުތަކުގައި މަގުފަހިކޮށްދީފައި އެބަހުރި ކަމަށެވެ. އަދި އެތައް ގަރުނެއްގެ ތާރީހެއް ލިބިފައިވާ ގައުމުތައް ސުންނާފަތިކޮށް ނެތިކޮށްފައި އެބަހުރި ކަމަށާއި ފިކުރީ ހަނގުރާމަތަކުގެ ވިސްނުންތައް ފެތުރުމަށް ގައުމުގައި ކުރެވޭ މަސައްކަތަށް ސަމާލުވެ ތިބުމަށް ދިވެހި ރައްޔިތުންގެ ކިބައިން ރައީސް ޔާމީން ވަނީ އެދިވަޑައިގެންފަ އެވެ.
ރައީސް ޔާމީން ވިދާޅުވީ ގައުމުތަކުގެ އިމާރާތްތަކާ ދެކޮޅަށް ދެވޭ ހަމަލާތައް ހަމަ ލޮލަށް ފެނުނަސް، ދައުލަތުގެ މުއައްސަސާތަކާ ދެކޮޅަށް ދޭ ހަމަލާތައް އަބަދު ނުފެންނާނެ ކަމަށެވެ. އެގޮތުން ދައުލަތުގެ މުއައްސަސާތަކަށް ކޮންމެ ދުވަހަކުހެން ހަމަލާތައް އަންނަމުންދާ ކަމަށާއި އެހެންވެ ދިވެހި ދުސްތޫރީ އޮނިގަނޑު ވަރުގަދަ ކުރުމަކީ މުހިންމު ކަމެއް ކަމަށް އެ މަނިކުފާނު ވިދާޅުވި އެވެ.
ދުސްތޫރީ އޮނިގަނޑުގައި ހުރި ފުރިހަމަ ނުވާ ކަންތައްތަކާއި މުއައްސަސާތަކުގައި ހުރި ބަލިކަށިކަން އަދި އިޖުތިމާއީ ފޭރާމުގައި ހުރި ބާތަކުގެ ނާޖާއިޒު ފައިދާ ނަގައިގެން ގައުމިއްޔަތު އިތުރަށް ބަލިކަށި ކުރަން ޖާގަ ނުދެއްވާނެ ކަމަށް ވެސް ރައީސް ޔާމީން ވިދާޅުވި އެވެ.
