ވިއެޓްނާމުގައި މިހާރު ކުރިއަށްދާ އޭޝިއާ-ޕެސިފިކް އިކޮނޮމިކް ކޯޕަރޭޝަން (އޭޕެކް) ސަމިޓްގެ ހާވާސާގައި އެމެރިކާގެ ރައީސް ޑޮނަލްޑް ޓްރަމްޕް އާއި ރަޝިއާގެ ރައީސް ވްލަޑީމިއާ ޕޫޓިން ބައްދަލު ކުރައްވާނެ ކަމަށް ދެކެވޭ ވާހަކަތައް އެމެރިކާ އިން ދޮގުކޮށްފިއެވެ. 

ވައިޓް ހައުސްގެ ޕްރެސް ސެކްރެޓަރީ ސާރާ ހަކަބީ ސޭންޑާސް ހުކުރު ދުވަހު ވިދާޅުވީ ރަޝިއާގެ ރަައީސް އާއި އެމެރިކާގެ ރައީސްގެ ބައްދަލުވުމެއް ބާއްވަން ނިންމާފައި ނުވާ ކަމަށާއި އެފަދަ ބައްދަލުވުމެއް ނުބާއްވަނީ ބައްދަލުވުމެއް ޝެޑިއުލް ކުރަން ދެފަރާތައްވެސް ދަތިތަކެއް ހުރުމުން ކަމަށެވެ.  އެހެންނަމަވެސް ރަސްމީ ބައްދަލުވުމެއް ދެގައުމުގެ ރައީސުން ނުބޭއްވިއަސް ދެގައުމުގެ ރައީސުން ބައްދަލުވެއްޖެނަމަ ކުޑަ ވަގުތުކޮޅަކަށް ވާހަކަ ދެއްކުން އެކަށީގެންވާ ކަމަށް ވައިޓް ހައުސްގެ ޕްރެސް ސެކްރެޓަރީ ވިދާޅުވިއެވެ.

ވައިޓްހައުސް އިން މިހެންބުނެފައިވާއިރު ރަޝިއާގެ ނިއުސް އެޖެންސީތަކަށް ކްރެމްލިންގެ ތަރުޖަމާނު ޔޫރީ އުޝަކޯވް ވިދާޅުވެފައި ވަނީ  ދެ ރައީސުން ބައްދަލު ކުރައްވާނެ ކަމަށާއި ގަޑިވެސް ކަނޑައެޅިފައިވާ ކަމަށެވެ. އެހެންނަމަވެސް އޭނާ ބައްދަލުވުމުގެ ގަޑިއެއް ހާމަ ނުކުރައްވައެވެ.

ރައީސް ޓްރަމްޕް ގެންދަވަނީ އޭޝިއާގެ ގައުމުތަކަށް ހާއްސަ ދަތުރުފުޅެއް ކުރައްވަމުންނެވެ. އެމެރިކާ އާއި ރަޝިއާގެ މިހާރުގެ ދެ ރައީސުން އެންމެ ފުރަތަމަ ބައްދަލު ކުރައްވާފައި ވަނީ މިދިޔަ ޖުލައި ގައި ބޭއްވުނު ޖީ-20 ސަމިޓުގައެވެ. އެހެންނަމަވެސް އެމެރިކާގެ ކޮންގްރެސްއިން އޭގެފަހުން އައު ދަތިކުރުމުގެ ފިޔަވަޅުތައް އެޅުމުގެ ސަބަބުންނާއި ރަޝިއާއިން އެގައުމުގެ ތިބޭ އެމެރިކާ ޑިޕްލޮމޭޓުންގެ އަދަދު ދަށްކުރުމަށް ނިންމުމުގެ ސަބަބުން ދެގައުމުގެ ގުޅުން ވަނީ ހީނަރުވެފައެވެ.