ކ. މާލެ
|
10 ނޮވެންބަރ 2017 | ހުކުރު 14:36
 ޕީޕީއެމްގެ ޕީޖީ ގުރޫޕްގެ ލީޑަރު އަހުމަދު ނިހާން ހުސެއިން މަނިކު
ޕީޕީއެމްގެ ޕީޖީ ގުރޫޕްގެ ލީޑަރު އަހުމަދު ނިހާން ހުސެއިން މަނިކު
ޓްވިޓަރ
އަސްތާ! ޖަލްސާ
ނަޝީދާ އެކު ސައްލާކުރަން މައުމޫން ލަދުގަންނަން ޖެހޭނެ: ނިހާން
 
ނޮވެމްބަރު 3 ގައި ރައީސް މައުމޫނު، ދޮންނަ މެޝިންގެ ފޮށިގަނޑެއްގައި އޮންނެވި ކަމަށް އެއްބަސްވެވަޑައިގަތީތޯ ނިހާން ސުވާލު އުފެއްދެވި
 
ރާއްޖެއަށް ޣައްދާރުވީ މީހުންނާ އެކު ގާތް ގުޅުމެއް މައުމޫނު ބާއްވަވާ ކަމަށް ވިދާޅުވި

ކުރީގެ ރައީސް މައުމޫން އަބްދުލް ގައްޔޫމް މިހާރު ސައްލާކޮށް މަޝްވަރާކުރައްވަނީ އެމަނިކުފާނުގެ ވެރިކަން ވައްޓާލަން ބަޣާވާތްކުރި ގައުމަށް ގައްދާރުވީ މީހުންނާ ގުޅުން އޮންނަ ބަޔަކާ އެކު ކަމަށާއި އެކަމަކީ އެމަނިކުފާނު ލަދުގަންނަންޖެހޭނެ ކަމެއް ކަމަށް ޕީޕީއެމްގެ ޕީޖީ ގުރޫޕްގެ ލީޑަރު އަހުމަދު ނިހާން ހުސެއިން މަނިކު ވިދާޅުވެއްޖެ އެވެ.

ކާނިވާ ސަރަހައްދުގައި "އަސްތާ"ގެ ނަމުގައި ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުން ނިހާނު ވަނީ އިދިކޮޅު ލީޑަރުން ނަސްރު ދުވަހުގެ ޒިކުރާ އާކުރައްވާފައިނުވާތީ އެކަމާ ފާޑުވިދާޅުވެފަ އެވެ. ނިހާނު ވިދާޅުވީ، އެ ދުވަހުގެ ބަޣާވާތުގައި ބައިވެރިވި ބައެއް މީހުންނަށް ކުރީގެ ރައީސް މުހައްމަދު ނަޝީދުގެ ވެރިކަމުގައި އިސް މަގާމުތައް ދީފައިވާ ކަމަށެވެ.


ރައީސް ނަޝީދު، ނަސްރުގެ ދުވަސް ފާހަގަނުކުރައްވާކަން ފާހަގަކުރައްވައި  ނިހާން ވަނީ އެ ދުވަސް އެމަނިކުފާނުގެ ވެރިކަމުގައި ފާހަގަކުރެއްވީ ވަރަށް "ފެންކޮށް" ކަމަށް ވިދާޅުވެފަ އެވެ. އަދި، އެ ދުވަހަކީ ނުވާ ކަމެއްގެ ގޮތުގައި ދައްކަން އެމްޑީޕީގެ ސަރުކާރުން މަސައްކަތް ކުރެއްވި ކަމަށް ވިދާޅުވިއެވެ.

ނިހާނު ވަނީ ކުރީގެ ރައީސް މައުމޫން އަބްދުލްގައްޔޫމަށް ވަރަށް ބޮޑަށް ފާޑު ވިދާޅުވެފައެވެ. ނިހާނު ވިދާޅުވީ، މި އަހަރުގެ ނަސްރުގެ ދުވަހު ރައީސް މައުމޫން ވެސް ކުރެއްވީ އެންމެ ޓްވީޓެއް ކަމަށެވެ. އެވަރުން އެމަނިކުފާނު ވެސް ފުއްދަވާލެއްވީ ކަމަށެވެ.

"މިއަދު ހިތާމައިގެ ފިޔަވަޅު މަތީގައި އަޅުގަނޑުމެން ތިބެން މިޖެހެނީ ރައީސް މައުމޫން ހަމަ ގަބޫލުފުޅު ކުރެއްވީތޯއޭ، ތިމަން މަނިކުފާނު ގަބޫލުކުރެއްވީތޯއޭ، ތިމަން މަނިކުފާނަކީ ހަމަ ދޮންނަ މެޝިންގެ ފޮށިގަނޑެއްގައި އޮންނެވި ބޭފުޅެއްތޯއޭ، އެހެންވެގެންތޯއޭ އިންނަވަނީ ގޮސް، ކެނެރީގޭ ނަޝީދާއި އޭނާއާ ގުޅުންހުރި މިޖަހަލާތުގެ އަމަލު ހިންގި މީހުންނާއެކު އެއް ސައްލާއެއް ކުރަން އިންނަވަން ރައީސް މައުމޫން ލަދުފުޅު ގަންނަވަންޖެހޭނެ ކަމީ ޝައްކެއް އޮތް ކަމެއް ނޫން، އަޅުގަނޑުމެން މިފަހުރުވެރި ވަތަނަށްޓަކައި މި ވާހަކަ ކޮންމެ ތާކު ތަކުރާރުކޮށް އެބަ ދައްކަންޖެހޭ،" ނިހާނު ވިދާޅުވި އެވެ.
ނިހާނު ވިދާޅުވީ، ކުރީގެ ރައީސް މުހައްމަދު ނަޝީދުގެ ވެރިކަމުގައި ރާއްޖެއަށް ޣައްދާރުވީ މީހުންނާ އެކު ގާތް ގުޅުމެއް ބޭއްވިއިރު ވެރިކަމުގައި ރާއްޖެއަށް ވަނީ އެތައް ގެއްލުންތަކެއް ވެސް ދީފައި ކަމަށެވެ. އޭގެ ތެރެއިން އެއް ކަމަކީ ޖީއެމްއާރްއަށް ރާއްޖޭގެ މައި އެއާޕޯޓް ދިނުން ކަމަށް ވިދާޅުވިއެވެ. އޭގެ ސަބަބުން އެތައް ގެއްލުމެއް ރާއްޖެ އުފުލަންޖެހުނު ކަމަށާއި، އެކަންކަމުން ރާއްޖެ ސަލާމަތް ކޮށްދެއްވީ ރައީސް އަބްދުﷲ ޔާމީން ކަމަށް އޭނާ ވިދާޅުވިއެވެ. އެހެންކަމުން އަންނަ ރިޔާސީ އިންތިހާބުގެ ވޯޓު ކަރުދާހުގައި ރައީސް ޔާމީންގެ ނަން ނެތިއްޔާ ރައްޔިތުން ދެރަވާނެ ކަމަށް ވެސް ނިހާނު ވިދާޅުވި އެވެ.
ނިހާން ވިދާޅުވީ، ރައީސް މައުމޫންގެ ވެރިކަމުގައި ރާއްޖެއަށް ގެނައި އިސްލާމީ ރިވެތި އުސޫލުތައް ރައީސް ނަޝީދުގެ ވެރިކަމުގައި ނައްތާލާފައިވާ ކަމަށެވެ. ދީނާ ދުރު އެތައް ކަމެއް ކުރެއްވި ކަމަށެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަލީ ޔޫސުފް
0%
0%
0%
60%
0%
40%
ކޮމެންޓް