ކާނަލް ނާޒިމް ދޫކޮށްލުމަށް ޢަދާލަތުން އަނެއްކާ ވެސް ގޮވާލައިފި
6 ނޮވެމްބަރު 2017 | ހޯމަ 17:11އިޖުރާއަތްތައް ފުރިހަމަކޮށް، ނާޒިމް ވަގުތުން މިނިވަންކުރަން ޖެހޭ
ކާނަލް ނާޒިމް އަނބުރާ ޖަލަށް ގެންދަނީ
ޖަލަށް ލާފައިވާ ކުރީގެ ޑިފެންސް މިނިސްޓަރ ކާނަލް (ރިޓަޔަޑް) މުހައްމަދު ނާޒިމް ދޫކޮށްލުމަށް އަދާލަތު ޕާޓީން އަނެއްކާ ވެސް ގޮވާލައިފިއެވެ.
ކާނަލް ނާޒިމް ޖަލަށްލިތާ 1000 ދުވަސް ފުރުމާ ގުޅިގެން ޢަދާލަތު ޕާޓީން ނެރުނު ބަޔާނެއްގައި ބުނީ ކާނަލް ނާޒިމްގެ ގެއިން ފެނުނު ހަތިޔާރަކީ އެމަނިކުފާނާ ގުޅުމެއް އޮތް އެއްޗެއް ނޫން ކަމަށް ރައީސް އަބްދުﷲ ޔާމީނާ އެންމެ އަރިސްކޮށް މަސައްކަތްކުރެއްވި ކުރީގެ ނައިބު ރައީސް އަހުމަދު އަދީބު އަބްދުލްޣަފޫރު ހާމަކުރައްވައި، ސުޕްރީމް ކޯޓަށް ސިޓީއެއް ފޮނުއްވަފާއިވާއިރު، ކާނަލް ނާޒިމް ޖަލުގައި ބަންދުކޮށްގެން ގެންގުޅެން ޖެހޭ އެއްވެސް ސަބަބެއް އޮތް ކަމަށް ނުދެކޭ ކަމަށެވެ. އެހެން ކަމުން ޤާނޫނީ އޮނިގަނޑުގެ ތެރެއިން ފުރިހަމަކުރަން ޖެހޭ އިޖުރާއަތްތައް ފުރިހަމަކޮށް، ކާނަލް ނާޒިމް މިނިވަންކުރުމަށް ކަމާ ގުޅޭ އެންމެހާ އިދާރާތަކަށް ގޮވާލާ ކަމަށް އަދާލަތު ޕާޓީން ނެރުނު ބަޔާނުގައި ވަނީ ބުނެފައެވެ.
އަދާލަތު ޕާޓީގެ ބަޔާނުގައި ބުނީ ކާނަލް ނާޒިމް ހައްޔަރުކުރެވުނު ހިސާބުން ފެށިގެން އެޕާޓީ އާއި، ޚާއްސަކޮށް އެޕާޓީގެ ރައީސް ޝެއިޚް އިމްރާން ޢަބްދުﷲ ކާނަލް ނާޒިމްގެ ދިފާއުގައި ވާހަކަ ދައްކަވަމުން ގެންދެވީ، މައްސަލަ ހިނގައިދިޔަ ގޮތުންނާއި އަދި އެމައްސަލައާ ގުޅިގެން ލިބިފައިހުރި ކަށަވަރު މައުލޫމާތަށް ބަލާއިރު، އެކަމަކީ ރޭވުމެއްގެ ދަށުން ދިވެހި ދައުލަތުގެ މުއައްސަސާތައް ނަހަމަ ގޮތުގައި ބޭނުންކޮށްގެން ކާނަލް ނާޒިމް ފްރޭމްކޮށް ޖަލަށްލުމަށް ހިންގާފައިވާ ޤާނޫނާ ޚިލާފް ބޮޑު ޖަރީމާއެއް ކަމަށް އެއްވެސް ޝައްކެއް ނެތް މިންވަރަށް އެނގޭތީ ކަމަށެވެ.
ކާނަލް ނާޒިމް ހައްޔަރުކުރިތާ 1000 ދުވަސްވުމާ ގުޅިގެން ޢަދާލަތު ޕާޓީން ނެރުނު ބަޔާން
ކާނަލް ނާޒިމް ދިރިއުޅުއްވި އެޕާޓްމަންޓަށް ފުލުހުން ވަދެފައި ވަނީ2015 ވަނަ އަހަރުގެ ޖެނުއަރީ މަހުގެ 18 ވަނަ ދުވަހުގެ ރޭގެ ދަންވަރުގެ ވަގުތެއްގައެވެ. އޭރު އެމަނިކުފާނަކީ ދިވެހި ރާއްޖޭގެ ދިފާޢީ ވަޒީރެވެ. އަދި އެރޭ ފުލުހުން އެގެއަށް ވަން އިރު އެގޭތެރެއިން ފިސްތޯލައަކާއި ތިން ވަޒަން ފެނުނު ކަމަށް ބުނެ ކާނަލް ނާޒިމް ވަނީ ޖަލަށްލާފައެވެ. ކާނަލް ނާޒިމް ހައްޔަރުކޮށްފައި ވަނީ ޤާނޫނާ ޚިލާފަށް ކަމަށް އދ. ގެ ވޯކިންގ ގްރޫޕް އޮން އާބިޓްރަރީ ޑިޓެންޝަނުން ނިންމައި، ނާޒިމް ދޫކޮށްލުމަށް ސަރުކާރަށް އަންގާފައި ވެއެވެ.
