ހެލިކޮޕްޓަރެއް ވެއްޓި، ސައުދީ ޕްރިންސަކު އަވަހާރަވެއްޖެ
5 ނޮވެމްބަރު 2017 | އާދީއްތަ 21:50ހެލިކޮޕްޓަރު ވެއްޓިފައިވަނީ ސައުދީގެ ދެކުނުން ޔަމަނާއި ގުޅޭ ސަރަޙައްދީ ރޮނގުގެ ކައިރިއަށް
ހެލިކޮޕްޓަރު ވެއްޓުމުގެ ހާދިސާގައި އަވަހާރަވެފައިވަނީ ސައުދީ ޕްރިންސް މަންސޫރު ކަމަށް ރިޕޯޓްތައް ބުނޭ
ސައުދީ އަރަބިއްޔާގެ ދެކުނުން ޔަމަނުގެ ބޯޑަރު ކައިރިއަށް ހެލިކޮޕްޓަރެއް ވެއްޓި، އެއިން ދަތުރުކުރި ސައުދީ ޝާޙީ އާއިލާގެ ޕްރިންސަކު އަވަހާރަވެފައިވާ ކަމަށް ސައުދީ ގައުމީ ޓީވީއިން ބުނެފި އެވެ.
ސައުދީ ޕްރިންސް މަންސޫރު ބިން މޮގްރެން އަވަހާރަވި ޚަބަރު އާއްމުކޮށްފައިވަނީ ސައުދީ ނިއުސް ޗެނަލް އަލް އެޚްބަރިޔާ އަދި އަލް އަރަބިއްޔާ އިންނެވެ. ޕްރިންސް މަންސޫރު ބިން މޮގްރެން ހުންނެވީ ސައުދީ އަރަބިއްޔާގެ ދެކުނުގެ ފަރުބަދަމަތީގެ އާސިރް ޕްރޮވިންސްގެ ގަވަރުނަރުގެ ނައިބުގެ މަގާމުގައެވެ.
ޕްރިންސް މަންސޫރު ދަތުރު ކުރެއްވި ހެލިކޮޕްޓަރުގައި އިތުރު އޮފިޝަލުންތަކެއްވެސް ތިއްބެވި ކަމަށް އަލް އެޚްބަރިޔާ އިން ރިޕޯޓްކުރި ނަމަވެސް، އޮފިޝަލުންގެ ނަމާއި، ހެލިކޮޕްޓަރު ވެއްޓުނު ސަބަބު އެ ޗެނަލް އިން ހާމަކޮށްފައެއްނުވެއެވެ.
ހެލިކޮޕްޓަރު ވެއްޓުމުގެ ހާދިސާ ހިނގުމުގެ ކުރިން ޕްރިންސް މަންސޫރު ވަނީ، އިތުރު ބަޔަކާއެކު ހެލިކޮޕްޓަރަކަށް އަރާވަޑައިގަންނަވާ ވީޑިއޯ އެއް ޓްވީޓް ކުރައްވާފައެވެ. އާދީއްތަ ދުވަހުގެ ބޮޑު ބައެއް ޕްރިންސް މަންސޫރު ހޭދަކުރެއްވީ އާސިރް ޕްރޮވިންސްގައި ހިންގާ ތަރައްޤީގެ ބައެއް މަޝްރޫޢުތައް ބައްލަވާލެއްވުމުގައެވެ.
ޕްރިންސް މަންސޫރަކީ ސައުދީ އަރަބިއްޔާގެ ކުރީގެ ވަލީއަޙުދު ޕްރިންސް މުގްރިން އަލް ސައުދުގެ ދަރިކަލެކެވެ.
