ހޫޘީން ބުނީ ދުބާއީ އެއާޕޯޓަށް ހަމަލާ ދިން ކަމަށް، އެއާޕޯޓުން ބުނަނީ ހަމަލާ ނުދޭ ކަމަށް!
1 އޮކްޓޯބަރު 2018 | ހޯމަ 02:21އެއާޕޯޓަށް ތިން ޑްރޯން ހަމަލާ ދިން ކަމަށް ހޫޘީން ބުނޭ
އަރުޝަމް އަބްދުލް ޢަޒީޒް | 1 އޮކްޓޯބަރު 2018 | ހޯމަ 02:21
ހޫޘީންގެ ހަނގުރާމަވެރިން
ދުބާއި އިންޓަނޭޝަނަލް އެއާޕޯޓަށް ހޫޘީން ހަމަލާ ދީފައިވާކަމުގެ ޚަބަރު އެ އެއާޕޯޓުން ދޮގުކޮށްފިއެވެ.
ޔަމަނުގެ ހަނގުރާމަވެރިންގެ ޖަމާއަތެއް ކަމަށްވާ ހޫޘީންގެ ޓީވީ ޗެނަލުން އާދީއްތަ ދުވަހު ބުނީ ދުބާއި އިންޓަނޭޝަނަލް އެއާޕޯޓަށް ހޫޘީން ތިން ޑްރޯން ހަމަލާ ދީފައިވާ ކަމަށެވެ. ނަމަވެސް އެ އެއާޕޯޓުން ބުނީ އެއްވެސް ކަހަލަ ހަމަލާއެއް އަމާޒުވެފައި ނުވާ ކަމަށާއި އެތަނުގެ މަސައްކަތް ކުރިއެކޭ ވެސް އެއްގޮތަށް ކުރިއަށް ދާކަމަށެވެ.
"އާދީއްތަ ދުވަހުގެ ހެދުނުގެ ވަގުތެއްގައި ދުބާއި އެއާޕޯޓަށް ހަމަލަ ދީފައިވާކަމުގެ ވާހަކަތަކެއް ވަނީ ފެތުރިފައި. ނަަމަވެސް އެ ކަހަލަ ކަމެއް ނުހިނގާ. އަދި ކުރިއެކޭ އެއްގޮތަށް ދުބާއި އެއާޕޯޓުން ދަނީ ޚިދުމަށް ދެމުން،" އެ އެއާޕޯޓުގެ ތަރުޖަމާން ވިދާޅުވިއެވެ.
މީގެ ދުވަސްކޮޅެއް ކުރިން ވެސް ހޫޘީންގެ ޓީވީ ޗެނަލުން ވަނީ އެ އެއާޕޯޓަށް ހަމަލާ ދީފައިވާ ކަމަށް ބުނެފައެވެ. އެ ފަހަރު ވެސް އެ ޚަބަރު އެއާޕޯޓުން ވަނީ ދޮގު ކޮށްފައެވެ.
