ސައުދީގެ އަބަހާ އެއާޕޯޓަށް ދިން ޑްރޯން ހަމަލާއެއްގައި އެކަކު މަރުވެއްޖެ

ސައުދި އަރަބިޔާގެ އަބަހާ އެއާޕޯޓަށް ދިން ޑްރޯން ހަމަލާއެއްގައި އެކަކު މަރުވެއްޖެއެވެ.

އަލް އަރަބިޔާއިން ބުނީ، ޑްރޯން ހަމަލާ ދީފައިވަނީ އަބާ އެއާޕޯޓުގެ ޕާކިންގ އޭރިޔާއާ ދިމާލުގައި ކަމަށާއި، އެކަކު މަރުވެފައިވާ ކަމަށެވެ. އަދި މަރުވީ ސީރިޔާ ރައްޔިތެއް ކަމަށްވެސް އެ ނޫހުން ބުނެފައިވެއެވެ.

މި ހަމަލާގައި ހަތް މީހުން ޒަހަމްވެފައިވާއިރު، ބެލެވޭގޮތުގައި މިއީ ޔަމަނުގެ ސަރުކާރާ ދެކޮޅަށް ހަނގުރާމަކުރަމުންދާ ހޫޘީން ދިން ހަމަލާއެކެވެ.

ހޫޘީން ވަނީ މިދިޔަ މަހުވެސް އަބަހާ އެއާޕޯޓަށް ހަމަލާދީފައެވެ. އެ ހަމަލާގައި 26 ޒަހަމުވެފައިވާއިރު، އެ ހަމަލާގެ ރައްދެއްގެ ގޮތުގައި ސައުދީ ކޯލިޝަނުން ވަނީ ޔަމަނުގެ ވެރި ރަށް ސަންއާއަށް ވައިގެ ހަމަލާތަކެއް ދީފައެވެ.

ފަހަކަށް އައިސް ހޫޘީން ވަނީ އެމީހުން ޑްރޯން ހަމަލާތައް އިތުރުކޮށް ސައޫދީ އަމާޒުތަކަށް ހަމަލާދިނުން އިތުރުކޮށްފައެވެ. އަދި ޔަމަނުގައި ސައޫދީން ކުރާ ހަނގުރާމަ ހުއްޓާނުލަނީސް ހަމަލާތައް ނުހުއްޓާނެކަމުގެ އިންޒާރުވެސް ޙޫޘީން ވަނީ ދީފައެވެ.