އޮބާމާ އާއި ހިލަރީ އަށް ފޮނުވި އެއްޗެހިތަކެއް އެމެރިކާގެ އޮފިޝަލުން ހުއްޓުވައިފި

އެމެރިކާގެ ކުރީގެ ރައީސް ބަރަކް އޮބާމާ އާއި ކުރީގެ ފޮރިން ސެކްރެޓަރީ ހިލަރީ ކްލިންޓަންގެ ގެކޮޅަށް ފެނުވި އެއްޗެހިތަކެއް އެއީ ގޮވާ ޒާތުގެ އެއްޗެހި ތަކެއްކަމަށް ބެލެވިގެން އެމެރިކާގެ އޮފިޝަލުން އެ ތަކެތި ހުއްޓުވައިފި ކަމަށް އޮފިޝަލުން ބުނެފިއެވެ.

އެމެރިކާގެ ސީކްރެޓް ސަރވިސް އިން ބުދަ ދުވަހު ބުނީ އެ ތަކެތި ފެނިފައި ވަނީ މެންހަޓަންގެ ސަރަހައްދެއް ކަމަށްވާ ވެސްޗެސްޓަރ ގައި ހުންނަ ކްލިންޓަންގެ ގެއަށް އެޑްރެސްކޮށް ބަންދުކޮށްފައި އޮތް އެއްޗަކުން ކަމަށެވެ.

ދެވަނަ ޕެކޭޖަކީ ވޮޝިންގޓަންގައި އޮބާމާ ދިރިއުޅުއްވާ އެޑްރެހަށް އޮތް އެއްޗެއެކެވެ.

ސީކްރެޓް ސަރވިސް އިން ނެރެފައިވާ ބަޔާނެއްގައި ބުނެފައި ވަނީ އެތަކެތި ސްކްރީން ކުރުމުގެ ތެރޭގައި ދެނެގަނެވިފައިވާ ކަމަށާއި އެ ތަކެއްޗަކީ ގެއްލުން ލިބިދާނެފަދަ ގޮވާޒާތުގެ އެއްޗަކަށް ވުމުން އެ ފަދަތަކެތި ގެންގުޅުމުގައި އަމަލުކުރަން އޮންނަ އުސޫލުން ނައްތާލާފައި ވާކަމަށެވެ.

މިތަކެތި ރައީސް ކްލިންޓަން އަދި އޮބާމާ އާ ހަމައަށް ފޯރާފައި ނުވާކަމަށާއި އަދި އެ ފަރާތްތައް ތިއްބެވީ ނުރައްކަލުގައި ނޫންކަމަށް ސީކްރެޓް ސަރވިސް އިން ބުނެއެވެ.

ސީކްރެޓް ސަރވިސްއިން ދަނީ އެ ޕާރުސަލްތައް ފޮނުވި ފަރާތްތައް ހޯދުމުގެ މަސައްކަތް ކުރަމުންނެވެ.