ގާޒީ ބާރީ ރިޝްވަތު ނެންގެވިކަން ސާބިތުކުރާނެ އެއްވެސް ހެއްކެއް ނުލިބުނު: އޭސީސީ
ބެއްލެވި މައްސަލަތަކުގައި ރިޝްވަތު ނެންގެވި ކަމަށް ބުނާ މައްސަލައެއް
ކްރިމިނަލް ކޯޓުގެ ކުރީގެ އިސްގާޒީ އަދި މިހާރުގެ ޖުވެނައިލް ކޯޓުގެ ގާޒީ ބާރީ، އުއްތަމަފަނޑިޔާރާއެކު
ކްރިމިނަލް ކޯޓުގެ ކުރީގެ އިސްގާޒީ އަބްދުލް ބާރީ ޔޫސުފް އެ ކޯޓުގެ ފަނޑިޔާރު ކަމުގައި ހުންނަވައިގެން ބައްލެވި މައްސަލަތަކުގައި ރިޝްވަތު ނެންގެވި ކަމަށް ބުނާ މައްސަލަ ސާބިތުކުރާނެ އެއްވެސް ހެއްކެއް ނުލިބުނު ކަމަށް ބުނެ، އެއީ ކޮރަޕްޝަން އެކުލެވިގެން ނުވާ މައްސަލައެއް ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ކަނޑައަޅައިފި އެވެ.
އޭސީސީއިން އެގޮތަށް ކަނޑައަޅާފައިވަނީ ގާޒީ ބާރީ ބައްލަވާ މައްސަލަތަކުގައި އެ މައްސަލަތަކާ ގުޅޭ ފަރާތްތަކުގެ އަތުން ރިޝްވަތު ނަންގަވާ ކަމަށް ބުނެ އަމިއްލަ ފަރާތަކުން ހުށަހެޅި މައްސަލައެއް ބެލުމަށް ފަހުގަ އެވެ.
ކޮމިޝނުގެ ނިންމުމުގައި ބުނެފައި ވަނީ، ދިވެހިރާއްޖޭގެ ފަނޑިޔާރުންގެ ޤާނޫނުގެ 65 ވަނަ މާއްދާގައިވާ ގޮތުން ފަނޑިޔާރުން ކޮންމެ އަހަރަކު އެއް ފަހަރު މިލްކިއްޔާތުގައިވާ މުދަލާއި ފައިސާގެ ހިސާބުތަކާއި، އަރަންޏާއި ދަރަނި ހާމަކޮށް ޖުޑީޝަލް ސަރވިސް ކޮމިޝަން (ޖޭއެސްސީ) އަށް ހުށަހަޅަންޖެހޭއިރު، 2010، 2011، 2012 ވަނަ އަހަރު ގާޒީ ބާރީ އެ ކޮމިޝަނަށް ހުށަހަޅުއްވާފައިވާ ބަޔާންތަކުގައި ހާމަކޮށްފައިނުވާ ފައިސާގެ މުޢާމަލާތުތަކެއް ގާޒީ ބާރީގެ އެކައުންޓް ސްޓޭޓްމަންޓްތައް ބެލިބެލުމުން ފާހަގަކުރެވުނު ކަމަށެވެ.
އެހެންނަމަވެސް، އެ ފައިސާއަކީ ގާޒީ ބާރީ ބައްލަވަމުން ގެންދެވި މައްސަލައަކާ ގުޅިގެން ލިބިފައިވާ ފައިސާއެއްތޯ ބެލުމަށް، އެ ފައިސާ ޖަމާކޮށްފައިވާ ފަރާތްތަކުގެ ކުށުގެ ރެކޯޑް ސާފުކުރިއިރު، އެ ފަރާތްތަކާ މެދު ތުހުމަތުކުރެވޭ ޖިނާޢީ މައްސަލައެއް ދިވެހިރާއްޖޭގެ ޖިނާއީ މައްސަލަތަކާ ބެހޭ އެއްވެސް މުއައްސަސާއެއްގައި ނެތްކަން ފާހަގަކުރެވިފައިވާ ކަމަށް ވެސް ބުނެފައި ވެއެވެ.
ކޮމިޝަނުން ބުނީ މި މައްސަލައާ ގުޅިގެން ބަޔާންދީފައިވާ ފަރާތްތަކުގެ ބަހުން ގާޒީ ބާރީގެ އެކައުންޓަށް ޖަމާކޮށްފައިވާ ފައިސާއަކީ މި މައްސަލައިގެ ޝަކުވާގައި ބަޔާންކޮށްފައިވާ ފަދަ ރިޝްވަތުގެ ފައިސާއެއް ކަން ސާބިތު ކުރާނެ އެއްވެސް ހެއްކެއް ނުވަތަ ޤަރީނާއެއް ލިބިފައިނުވާތީ، މިމައްސަލައިގައި، ކޮރަޕްޝަން ހުއްޓުވުމާއި މަނާކުރުމުގެ ޤާނޫނުގައި ބުނާ ފަދަ ކޮރަޕްޝަންގެ ޢަމަލެއް ހިންގާފައިވާ ކަމަށް މިކޮމިޝަންގެ ތަޙްޤީޤަށް ބެލެވެން ނެތް ކަމަށެވެ.
އެހެންކަމުން މި މައްސަލައަކީ ކޮރަޕްޝަނުގެ ކުށެއް އެކުލެވިގެންނުވާ މައްސަލައެއްކަމަށް ކަނޑައަޅައި، އޭސީސީ އިން ވަނީ މައްސަލަ ނިންމާފަ އެވެ.
ކްރިމިނަލް ކޯޓުގެ އިސްގާޒީގެ މަގާމުގައި ހުންނަވަނިކޮށް، ޖޭއެސްސީ އިން ވަނީ ޖުލައި މަހުގެ 11 ވަނަ ދުވަހު ގާޒީ ބާރީ ޖުވެނައިލް ކޯޓަަށް ބަދަލުކޮށްފަ އެވެ. ގާޒީ ބާރީ ޖުވެނައިލް ކޯޓަށް ބަދަލުކުރީ ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ މައްޗަށް ކުރި ދައުވާގެ ޝަރީއަތަށް ދައުލަތުގެ ވަކީލުން ހާޒިރުނުވުމުން ދައުވާ ބާތިލްކޮށް ފޮނުވާލިތާ ގިނަ އިރުތަކެއް ނުަވަނީހެވެ.
