"ރާޒީ" ގެ ޝޫޓިން ނިންމާލައިފި

އާލިއާ ބަޓް އާއި އޭނާގެ އަސްލު މަންމަ ސޯނީ ރަޒްދާން އެއް ފިލްމަކުން ފެނިގެންދާ ފިލްމު "ރާޒީ" ގެ ޝޫޓިން ނިންމާލައިފިއެވެ.

އަންނަ އަހަރުގެ މެއި މަހުގެ 11 ވަނަ ދުވަހުގައި ރިލީޒްކުރަން ހަމަޖެހިފައިވާ މި ފިލްމުގެ ޝޫޓިން ނިންމާލާފައިވާކަން އިއުލާން ކޮށްފައިވަނީ އާލިއާ އޭނާގެ އިންސްޓަގްރާމް މެދުވެރިކޮށެވެ. ޖަންގްލީ ޕިކްޗާސް އާއި ކަރަން ޖޯހަރުގެ ދަރްމާ ޕްރޮޑަކްޝަންސް އިން ޕްރޮޑިއުސްކުރާ މި ފިލްމަކީ "ކޯލިން ސެހްމަތް" ނަމަކަށް ކިޔާ ފޮތަކަށް ބިނާކޮށް އުފައްދާ ފިލްމެކެވެ.

ފިލްމުގައި ޕާކިސްތާނުގެ ސިފައިންގެ މީހަކާއި ކަޝްމީރުގެ އަންހެނަކު ކައިވެނިކޮށްގެން އުޅޭއިރު އަންހެން މީހާއަކީ އިންޑިއާގެ ޖާސޫސީ އިދާރާގެ ޖާސޫސެކެވެ. އާލިއާ ފެނިގެންދަނީ އެ އަންހެން މީހާގެ ރޯލުންނެވެ.

އަލިއާގެ މަންމަގެ ރޯލު މި ފިލްމުން ފެނިގެންދަނީ އޭނާގެ އަސްލު މަންމަ ސޯނީ ރަޒްދާނެވެ. "ރާޒީ" ގައި އާލިއާގެ ކޯ އެކްޓަރަކީ "މަސާން" ގެތަރި ވިކީ ކޯޝަލް އެވެ. މިއީ ދެ ތަރިންގެ ޖޯޑު ސްކްރީނުން ފެންނާނެ ފުރަތަމަ ފިލްމެވެ. ފިލްމުގައި އާލިއާގެ ފިރިމީހާގެ ރޯލުން ފެނިގެންދާ ވިކީ ކޯޝަލްއަކީ ޕާކިސްތާނުގެ މިލިޓަރީ އޮފިސަރެކެވެ.