ސައުދީ އަރަބިއްޔާ އިން ރޮބޮޓަކަށް ރަށްވެހިކަން ދީފި

އިންސާނެއްގެ ސިފައިގައި އުފައްދާފައިވާ ރޮބޮޓަކަށް ސައުދީ އަރަބިއްޔާ އިން އެގައުމުގެ ރަށްވެހިކަން ދީފިއެވެ.

ސައުދީން ރޮބޮޓަކަށް ރަށްވެހިކަން ދިނުމުން، އެގައުމު ވެގެން ގޮސްފައި ވަނީ މިހާތަނަށް ތާރީޚުގައި ވެސް މިފަދަ ކަމެއް ކުރި ފުރަތަމަ ގައުމަށެވެ.

ސޯފިޔާގެ ނަމުން ނަން ދީފައިވާ މި އަންހެން ރޮބޮޓް އުފައްދާފައި ވަނީ ހެންސަން ރޮބޮޓިކްސް އިންނެވެ. ސޯފިޔާ އަށް ރަށްވެހިކަން ލިބުނުކަން ހާމަކޮށްފައި ވަނީ، ސައުދީގައި ބޭއްވި ފިއުޗާ އިންވެސްޓްމަންޓް އިނީޝިއޭޓިވް ކޮންފަރެންސެއްގައި ބޭއްވި ޕެނަލް ޑިސްކަޝަނެއްގައި، އޭނާ އަމިއްލައަށެވެ.

ރަށްވެހިކަން ދިން ރޮބޮޓްގެ ރަށްވެހިކަމާ ބެހޭ ތަފްސީލީ މައުލޫމާތުތަކެއް އެއްވެސް ފަރާތަކުން ހާމަކޮށްފައެއް ނުވެއެވެ.

ސޯފިޔާ އުފެއްފި ހެންސަން ރޮބޮޓިކްސްގެ ފައުންޑާ ޑޭވިޑް ހެންސަން ވިދާޅުވެފައި ވަނީ ސޯފިއާ އުފައްދާފައި ވަނީ އިންސާނުންގެ ގައިގައި ހުންނަ ތިން ސިފައެއްގެ މައްޗަށް ބިނާކޮށް ކަމަށެވެ. އެއީ އުފެއްދުންތެރިކަމާއި، އަނެކާގެ އިހްސާސްތައް ދެނެގަތުމާއި އަދި ރަހުމުކުުރުމުގެ މައްޗަށް ކަމަށެވެ.

ސޯފިޔާގެ މޫނު ޑިޒައިންކޮށްފައި ވަނީ އިނގިރޭސި ވިލާތުގެ ކުރީގެ އެކްޓްރެސްއެއް ކަމަށްވާ އޯޑްރޭ ހެޕްބާންއާ ވައްތަރުކޮށެވެ.