އަލް-ދުހައިލްގެ އެއްބަސްވުން މަންޒުކިޗް އުވާލައިފި

ގަތަރުގެ އަލް-ދުހައިލް އާއެކު ހަދާފައިވާ އެއްބަސްވުން ކްރޮއޭޝިއާ ފޯވާޑް މާރިއޯ މަންޒުކިޗް އުވާލައިފިއެވެ.

އުމުރުން 34 އަހަރުގެ ފޯވާޑް ގަތަރު ލީގަށް ބަދަލުވީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ. މަންޒުކިޗް ދުހައިލަށް ބަދަލުވީ ދެ އަހަރާ ބައިގެ އެއްބަސްވުމެއްގެ ދަށުންނެވެ.

އެކަމަކު ހަ މަސް ފަހުން މަންޒުކިޗް ވަނީ އެ ކްލަބުގެ އެއްބަސްވުން އުވާލިކަން ހާމަކޮށްފައެވެ. އޭނާ ކުރި ޓްވީޓެއްގައި ބުނީ ދުހައިލް އާއެކު ހަދާފައިވާ އެއްބަސްވުން އުވާލީ ދެ ފަރާތް އެކަމަށް އެއްބަސްވެގެން ކަމަށާއި، އެ ޓީމަށް ކާމިޔާބީއަށް އެދޭ ކަމަށެވެ.

ދުހައިލްގައި ހޭދަކުރި ހަ މަހުގެ ތެރޭގައި މަންޒުކިޗް އެ ކްލަބަށް ކުޅެދީފައިވަނީ އެންމެ 10 މެޗެވެ. އަދި މި މެޗުތަކުގައި އޭނާއަށް ކާމިޔާބުކުރެވިފައިވަނީ އެންމެ ދެ ލަނޑެވެ.

އިޓަލީގެ ޔުވެންޓަސް ދޫކޮށް މިދިޔަ އަހަރުގެ ޑިސެމްބަރު މަހުގެ ތެރޭގައި މަންޒުކިޗް ދުހައިލްއަށް ބަދަލުވީ މި ސީޒަނުގައި އޭނާއަށް ޔުވެންޓަސްގެ ކޯޗު މައުރީޒިއޯ ސާރީ ފުރުސަތު ނުދޭތީއެވެ.

ކްރޮއޭޝިއާގެ ޑީނަމޯ ޒެގްރެބާއި ޖަރުމަންގެ ވޮލްފްސްބާގާއި ބަޔާން މިއުނިކާއި ސްޕެއިނުގެ އެތުލެޓިކޯ މެޑްރިޑަށް ކުރިން ކުޅުނު މަންޒުކިޗް ޔުވެންޓަސްއާ ގުޅުނީ 2015 ވަނަ އަހަރެވެ. އޭނާ ވަނީ އެ ޓީމަށް 162 މެޗުން 44 ލަނޑު ޖަހާފައެވެ. އަދި ވަނީ ޔުވެންޓަސް އާއެކު އިޓާލިއަން ލީގު ހަތަރު ފަހަރު އަދި އިޓާލިއަން ކަޕް ތިން ފަހަރު ކާމިޔާބުކޮށްފައެވެ.