އާސިން އަންހެން ކުއްޖަކު ވިހައިފި

ބޮލީވުޑްގެ ބަތަލާ އާސިން އަށް ވެސް އަންހެން ކުއްޖަކު ލިބިއްޖެއެވެ. އޭނާއަށް އަންހެން ދަރިއަކު ލިބުނީ އަންގާރަދުވަހުގެ ހެނދުނެވެ.

އާސިން އަށް އަންހެންކުއްޖަކު ލިބުނު އިރު ކުރީގެ ބަތަލާ އީޝާ ޑިއޯލަށް ވެސް ވަނީ މިދިޔަ ހުކުރު ދުވަހުގައި އަންހެން ކުއްޖަކު ލިބިފައެވެ.

އާސިން އަށް ކުއްޖަކު ލިބުނުކަމަށް އާންމު ކޮށްފައި ވަނީ އޭނާގެ ފިރިމީހާ ރާހުލް ޝަރްމާ އާއި ދެމީހުން ނެރުނު ސްޓޭޓްމަންޓެއްގައެވެ. އެސްޓޭޓްމަންޓުގައި ބުނެފައި ވަނީ އެދެމަފިރިންނަށް އަންގާރަދުވަހު އަންހެންކުއްޖަކު ލިބިއްޖެ ކަމަށާއި އެދެމަފިރިން ތިބީ އެކަމާ ވަރަށް އުފަލުން ކަމަށެވެ. އެއުފަލުގައި ބައިވެރިވެ އެއާއިލާއަށް ތަހުނިޔާ ފޮނުވި ހުރިހާ ފަރާތްތަކަށް ޝުކުރު އަދާކުރާކަމަށް އެ ސްޓޭޓްމަންޓުގައި ވަނީ ބުނެފައެވެ.

އާސިން ކުޅެފައިވާ ފިލްމުތަކުގެ ތެރޭގައި "ގަޖިނީ"، "ލަންޑަން ޑްރީމްސް"، "ރެޑީ"، "ހައުސްފުލް 2" އަދި "އޯލްއިޒް ވެލް" ހިމެނެއެވެ. ރާހުލް އާއި އާސިން ކައިވެނި ކޮށްފައިވަނީ މިދިޔަ އަހަރުއެވެ. ރާހުލްއަކީ އިންޑިއާގެ ބިޔަ ކުންފުންޏެއް ކަމަށްވާ މައިކްރޮމެކްސްގެ އެއް ފައުންޑާއެވެ. ކައިވެނި ކުރުމަށް ފަހު އޭނާ ފިލްމެއްގެ މަސައްކަތުން ފެނިފައެއް ނުވެއެވެ.