ބާސާ ދޫކޮށްލަން ބޭނުންވާ ވާހަކަ ނޭމާ ބުނީ މެސީގެ ކައިވެނި ހަފްލާގައި: ޒަވީ
20 އޮކްޓޯބަރު 2017 | ހުކުރު 18:38ޖުލައި މަހު ބޭއްވި މެސީގެ ކައިވެނީގެ ހަފްލާގައި ބާސާ ދޫކޮށްލަން ބޭނުންވާ ކަމަށް ނޭމާ ބުނި
ޒަވީ އާއި ނޭމާ އެކުގައި: ދެ ސީޒަނުގައި މި ދެ ކުޅުންތެރިން ވަނީ ބާސާގައި އެއްކޮށް ކުޅެފައި
ސްޕެއިންގެ ބާސެލޯނާ ދޫކޮށް އެހެން ޓީމަކަށް ބަދަލުވާން ބޭނުންވާ ވާހަކަ ނޭމާ ބުނީ ލިއޮނެލް މެސީގެ ކައިވެނި ހަފްލާގައި ކަމަށް ބާސެލޯނާގެ ކުރީގެ ކުޅުންތެރިޔާ ޒަވީ ހަނާންޑޭޒް ބުނެފިއެވެ.
ބީބީސީ ވޯލްޑް ސާވިސްއާ ވާހަކަ ދައްކަމުން ބާސާއަށް އެންމެ ގިނަ މެޗު ކުޅުނު ކުޅުންތެރިޔާގެ ރެކޯޑު އޮންނަ ޒަވީ ބުނެފައި ވަނީ ޖުލައި މަހު ބޭއްވި މެސީގެ ކައިވެނީގެ ހަފްލާގައި ބާސާ ދޫކޮށްލަން ބޭނުންވާ ކަމަށް ނޭމާ ބުނެފައިވާ ކަމަށެވެ. އަދި އެއީ ކީއްވެގެންތޯ ސުވާލުކުރުމުން ޖަވާބުގައި ނޭމާ ބުނެފައި ވަނީ އޭނާ ބާސާއަށް ކުޅެން ހިތްހަމަނުޖެހޭ ކަމަށާއި ޔޫރަޕުގައި އާ ތަޖުރިބާތަކެއް ކުރަން ބޭނުންވާ ކަމަށެވެ. އެގޮތުން ޕީއެސްޖީއަށް ބަދަލުވާން ނިންމި ކަމަށް ނޭމާ އޭރު ބުނި ކަމަށް ޒަވީ ބުނެފައި ވެއެވެ.
ނޭމާ ވަނީ އޭނާގެ މި އުއްމީދު ހަގީގަތަކަށް ހަދައި މިދިޔަ ހޫނު މޫސުމުގެ ޓްރާންސްފާ މާކެޓުގައި ދުނިޔޭގެ ރެކޯޑު ފީއެއް ކަމަށްވާ 222 މިލިއަން ޔޫރޯއަށް ބާސާ ދޫކޮށް ޕީއެސްޖީއަށް ބަދަލުވެފައެވެ. ނޭމާ ނެތްތަން ފޫ ބެއްދުމުގެ ގޮތުން ބާސާއިން ވަނީ ބޮރޫޝިއާ ޑޯޓްމަންޑަށް ކުޅުނު ފްރާންސްގެ ޒުވާން ފޯވާޑް އުސްމާން ޑެމްބެލޭ އެ ޓީމަށް ގެނެސްފައެވެ.
ހަމަ މި ހޫނު މޫސުމުގެ ޓްރާންސްފާ މާކެޓުގައި ޕީއެސްޖީއިން ވަނީ ނޭމާގެ އިތުރުން މޮނާކޯއަށް ކުޅެމުން އައި ފްރާންސްގެ ޒުވާން ފޯވާޑް ކިލިއަން އެމްބާޕޭގެ ސޮއި ވެސް ހޯދާފައެވެ. އެގޮތުން ޕީއެސްޖީއިން އެމްބާޕޭގެ ސޮއި ހޯދާފައި ވަނީ 180 މިލިއަން ޔޫރޯގެ ލޯނު އެއްބަސްވުމެއްގެ ދަށުންނެވެ.
ޒަވީ ބުނެފައި ވަނީ މި ސީޒަނަށް ޕީއެސްޖީ ވަރަށް ބޮޑަށް ތައްޔާރުވެފައިވާ ކަމަށާއި އެ ޓީމުގެ ސްކޮޑުގައި ތިބީ ހުސް މޮޅު ކުޅުންތެރިން ކަމަށެވެ. އެގޮތުން ނޭމާ އާއި އެމްބާޕޭގެ ސަބަބުން ޕީއެސްޖީއަށް ޗެމްޕިއަންސް ލީގު ކާމިޔާބު ކުރުމުގެ ވަރަށް ބޮޑު ފުރުސަތެއް އެބައޮތް ކަމަށް ޒަވީ ބުނެފައި ވެއެވެ.
އޭނާގެ ކެރިއަރާއި ބެހޭ ވާހަކަތަށް ހިއްސާކުރަމުން ޒަވީ ބުނެފައި ވަނީ އޭނާގެ ކެރިއަރުގެ ކުރީކޮޅު މެންޗެސްޓާ ޔުނައިޓެޑަށް އޭނާ ގެންދަން އެ ޓީމުން މަސައްކަތް ކުރި ކަމަށެވެ. އެގޮތުން އެ ޓީމުގެ އޭރުގެ ކޯޗު ސާ އެލެކްސް ފާގަސަންގެ ކޮއްކޮ މާޓިން ފާގަސަން އޭނާއާއި މަޝްވަރާ ކުރިކަމަށާއި އެހެނަސް އޭނާ ނިންމީ ބާސާގައި މަޑުކުރަން ކަމަށެވެ. އެއީ ބާސާއަކީ ދުނިޔޭގެ އެންމެ މޮޅު ޓީމު ކަމަށް ވެފައި އޭނާ އާއި ބާސާއާ ދެމެދުވާ ގުޅުމުގެ ސަބަބުން ކަމަށް ވެސް ޒަވީ ބުނެފައި ވެއެވެ.
ޤަތަރުގެ އަލް ސައްދުއާ 2015 ވަނަ އަހަރު ގުޅުމުގެ ކުރިން ޒަވީ ވަނީ ބާސާގައި 17 އަހަރު ހޭދަކޮށްފައެވެ. މި އަހަރުތަކުގެ ތެރޭގައި އޭނާ ވަނީ ބާސާއާ އެކު ގިނަ ކާމިޔާބީތަކެއް ހާސިލްކޮށްފައެވެ.
