އައިފޯން 8 އަދި 8 ޕްލަސް ދިރާގުން ބާޒާރަށް ނެރެފި

އެޕަލް ކުންފުނިން އެންމެ ފަހުން ނެރުނު އައިފޯން، އައިފޯން 8 އާއި 8 ޕްލަސް ރާއްޖޭގެ ބާޒާރަށް ނެރެފިއެވެ.

ދިރާގުގެ ހެޑް އޮފީހުގައި ހުކުރު ދުވަހު މެންދުރު ފަހު 14:00 އިން ފެށިގެން އައިފޯން 8 އަދި 8 ޕްލަސްއަށް ޕްރިއޯޑާތައް ނަގާފައިވާ ފަރާތްތަކަށް ވަނީ ފޯނު ހަވާލުކޮށްފައެވެ.

ދިރާގުގެ ވެބްސައިޓުން އޮންލައިންކޮށް ފޯނަށް އޯޑަރު ކުރެވޭއިރު، 12 މަސް ދުވަހަށް ބަހާލައިގެން އިންސްޓޯލްމަންޓަށް ފައިސާ ދެއްކޭނެ ޕްލޭން އަކާއި އެއްކޮށް ފައިސާ ދައްކާފައި ފޯން ގަތުމުގެ ޕްލޭންއެއް ދިރާގުން ވަނީ ތަޢާރަފްކޮށްފައެވެ.

އެގޮތުން އިންސްޓޯލްމަންޓް ޕްލޭނަށް ފޯން ނަގާއިރު ދައްކަން ޖެހެނީ، 2،999 ރުފިޔާ އެވެ. އަދި ހަ މަސްދުވަހުގެ ތެރޭގައި ކޮންމެ މަހަކަށް ފަސް ޖީބީ ޑޭޓާ މުޅިން ހިލޭ ދިރާގުން ދޭނެއެވެ.

އައިފޯން 8ގެ 64 ޖީބީގެ ފޯނަކަށް 999 ރުފިޔާ ދައްކަން ޖެހޭއިރު، 256 ޖީބީގެ ފޯނަކަށް މަހަކު ދައްކަން ޖެހެނީ 1،279 ރުފިޔާއެވެ.

އައިފޯން 8 ޕްލަސްގެ 64 ޖީބީ ފޯނަށް މަހަކު 1،179 ރުފިޔާ ދައްކަން ޖެހޭ އިރު، 256 ޖީބީގެ ފޯނަކަށް މަހަކު ދައްކަން ޖެހެނީ 1،449 ރުފިޔާއެވެ.

އެކީ ފައިސާ ދައްކާފައި ފޯނު ނަގާ ނަމަ، އައިފޯން 8ގެ 64 ޖީބީ ވިއްކަނީ 14،899 ރުފިޔާއަށެވެ. އަދި 256 ޖީބީގެ ފޯނެއް ވިއްކަނީ 18،199 ރުފިޔާއަށް ކަމަށްވާއިރު އައިފޯން 8 ޕްލަސްގެ 64 ޖީބީ 16،999 ރުފިޔާއަށެވެ. 256 ޖީބީ ވިއްކަނީ 19،999 ރުފިޔާއަށެވެ.

އެކީ ފައިސާ ދައްކާފައި ފޯން ގަތަސް، ދިރާގުން ހަ މަސްދުވަސް ވަންދެން ކޮންމެ މަހަކު ފަސް ޖީބީގެ ޑާޓާ ހިލޭ ދޭން ވަނީ ނިންމައިފައެވެ.

އައިފޯން 8 އާއި 8 ޕްލަސްގެ އެންމެ ފާހަގަކޮށްލެވޭ އެއް ފީޗާއަކީ މި ފޯނުގައި 12 މެގަޕިކްސެލްގެ ކެމެރާއެވެ.