ސޯމާލިއާގައި މިދިޔަ ހޮނިހިރު ދުވަހުދިން ބޮމުގެ ހަމަލާއަކީ މިހާތަނަށް ދިން އެންމެ ނުރައްކާތެރި ބޮމުގެ ހަމަލާކަމަށް ބުނަމުންދާއިރު އެ ހަމަލާއަކީ އަލް ޝަބާބުން ދިން ހަމަލާއެއްކަމަށް އެ ގައުމުގެ ރައީސް ތުހުމަތު ކުރައްވައިފިއެވެ.
ވެރިރަށް މޮގަދިޝޫގައި ދިން މި ހަމަލާގައި 300 އަށްވުރެ ގިނަ މީހުންވަނީ މަރުވެފައެވެ.
ރައީސް މުޙައްމަދު ޢަބްދުﷲ ފަރްމޮޖޯ އަލްޖަޒީރާގައި ވިދާޅުވީ، ހަނގުރާމަވެރި އެ ޖަމާއަތުގެ "އިނގިލީގެ ނިޝާން" ހަމަލާއިން ފެންނަން ހުރިއިރު އެބާވަތުގެ ހަމަލާ މީގެ ކުރިންވެސް އެ ޖަމާއަތުން ދީފައިވާކަމަށެވެ.
"މިހިރީ އެމީހުންގެ އިނގިލީގެ ނިޝާން، މިއީ އެމީހުން ކުރި ކަމެއް" ބައިނަލްއަޤުވާމީ މުޖުތަމައުގެ އެހީތެރިކަމަށް ގޮވާލެއްވުމުގެ ކުރިން ފަޖްމޯރޯ ވިދާޅުވިއެވެ.
އެ ގައުމުގެ ދެކުނަކީ އަލް ޝަބާބުގެ ބާރުގަދަ ސަރަހައްދެކެވެ.
"އެމީހުންގެ މޮޔަ ފިކުރު އަދި އެމީހުންގެ ސިޔާސީ ފިކުރު ކުރިއެރުވުމުގައި މިތަނުގައި އެމީހުންނަށް ކުރިއެރުން ލިބިއްޖެނަމަ އެމެރިކާއާއި ޔޫރަޕުގެ ޒުވާނުންނަށް މި ފިކުރު ޕްރޮމޯޓް ކުރުމަށް އެމީހުންނަށް ފަސޭހަވާނެ" އޭނާ ވިދާޅުވިއެވެ.
ހޮނިހިރު ދުވަހު ދިން ހަމަލާގެ ޒިންމާ އަލް ޝަބާބުން ނަގާފައި ނުވާއިރު ސޯމާލިއާގެ ރައީސް ވިދާޅުވެފައިވަނީ މި ހަމަލާ ދީފައިވަނީ އެ ޖަމާއަތުން ކަމާމެދު ޝައްކެއްވެސް ނެތްކަމަށެވެ.
ވެރިރަށް މޮގަދިޝޫގެ ކާރުބާރޫ ބޮޑު ސަރަހައްދެއްގައި ދިން މި ހަމަލާ ދީފައިވަނީ ގޮވާތަކެތި އަރުވާ ފުރާފައި އޮތް ލޮރީއެއް ހޮޓަލެއްގެ ދޮރުމަތީގައި ގޮއްވާލައިގެންނެވެ.
މިއީ 2007 ވަނަ އަހަރު ސޯމާލިއާގެ އަލް ޝަބާބުން ހަމަނުޖެހުން ހިންގަން ފެށިފަހުން އެ ގައުމުގައި ދެވުނު އެންމެ ގެއްލުން ބޮޑު ޓެރެރިސްޓް ހަމަލާއެވެ.
މައި ހަމަލާދެވުނު ސަރަހައްދުގައި ހުރި ސޯމާލިއާގެ ބީބީސީ ރިޕޯޓަރ ބުނެފައިވަނި ސަފާރީ ހޮޓާ ވެއްޓި އެތަނުގެ ބައިތަކުގެ ދަށުގައި އެތައް ބަޔަކު ތާށިވެފައިވާކަމަށެވެ.
