12 ވަނަ ގައުމީ ބާސްކެޓްބޯލް ލީގުގެ ދެވަނަ ޑިވިޝަނުގައި އެލްކިއު ސްޕޯޓްސްއާއި އެޗްޑީސީ ކުޅުނު މެޗުތަކުން އެ ދެ ޓީމުވެސް މޮޅުވެއްޖެއެވެ.  

ކީން ސްޕޯޓްސް އާއި ދެކޮޅަށް ކުޅުނު މެޗު އެލްކިއު ސްޕޯޓްސް އިން ކާމިޔާބު ކޮށްފައިވަނީ 69 ޕޮއިންޓް، 31 ޕޮއިންޓްއިންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެލްކިއު ސްޕޯޓްސް ކްލަބްގެ ޖާޒީ ނަމްބަރު 10 އަހުމަދު ނާއިފް ރަޝީދެވެ. މި މެޗުގައި އެލްކިއު ސްޕޯޓްސްއަށް އެންމެ ގިނަ ޕޮއިންޓް ހޯދައިދިނީވެސް 17 ޕޮއިންޓާއެކު ނާއިފްއެވެ. ކީން ސްޕޯޓްސްއަށް އެންމެ ގިނަ ޕޮއިންޓް ހޯދައިދިން ކުޅުންތެރިޔަކީ 10 ޕޮއިންޓާއެކު އެ ޓީމުގެ ޖާޒީ ނަމްބަރު 9 ޝައިހާން އަހުމަދު ނާޝިދްއެވެ.

މި މުބާރާތުގައި އެޗްޑީސީއިން ވަނީ 67 ޕޮއިންޓް 42 ޕޮއިންޓް އިން ރެޑްވިންގްސް ބިސީ ބަލިކޮށްފައެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެޗްޑީސީގެ ޖާޒީ ނަމްބަރު 5 އިސްމާއިލް ޝިހާމްއެވެ. 16 ޕޮއިންޓާއެކު އެޗްޑީސީއަށް އެންމެ ގިނަ ޕޮއިންޓް ހޯދައިދިން ކުޅުންތެރިޔަކީ އެ ޓީމުގެ ޖާޒީ ނަމްބަރު 12 އާސިފް އިބްރާހިމްއެވެ. އަދި ރެޑްވިންގްސް ބީސީއަށް 11 ޕޮއިންޓާއެކު އެންމެ ގިނަ ޕޮއިންޓް ހޯދައިދިން ކުޅުންތެރިޔަކީ އެ ޓީމުގެ ޖާޒީ ނަމްބަރު 7 ހަސަން މުއާން އަލީއެވެ.

ކޮންމެ އަހަރަކު އެއްފަހަރު ބާސްކެޓްބޯލް އެސޯސިއޭޝަނުން އިންތިޒާމުކޮށްގެން ބާއްވާ މި މުބާރާތުގެ ފިރިހެން ދެވަނަ ޑިވިޝަނުގައި މި އަހަރު ބައިވެރިވެފައިވަނީ ފަސް ޓީމަކުންނެވެ. އެއީ އެލްކިއު ސްޕޯޓްސް، ކީން ސްޕޯޓްސް، ކްލަބް އެޗްޑީސީ، ރެޑްވިންގްސް ބީސީގެ އިތުރުން ސްޓިންޖާސް ބީސީއެވެ.