ޔޫއެފާ ޗެމްޕިއަންސް ލީގުގެ ގްރޫޕް ސްޓޭޖުގައި އަންގާރަ ދުވަހުގެރޭ ނަޕޯލީއާ މެންޗެސްޓަރ ސިޓީ ބައްދަލުކުރާ މެޗު ކާމިޔާބު ކުރެވޭނެ ކަމަށް ނަޕޯލީގެ ކޯޗު މައުރިޒިއޯ ސައްރި ބުނެފިއެވެ.

ނޫސްވެރިންނާއި ވާހަކަ ދައްކަމުން ސައްރި ބުނީ، މި ގްރޫޕްގެ ފެވަރިޓުންގެ ގޮތުގައި އޮތް ސިޓީގެ އިތުރުން ދެން މި ގްރޫޕްގައި ހިމެނޭ ޓީމްތައްވެސް ބަލިކުރުމުގެ ފެންވަރު ނަޕޯލީ ޓީމުގައި އެބަހުރި ކަމަށެވެ.

"މި ގްރޫޕްގެ ފެވަރިޓުންގެ ގޮތުގައި އޮތް މެންޗެސްޓަރ ސިޓީގެ އިތުރުން ދެން މި ގްރޫޕްގައި ހިމެނޭ އެހެން ޓީމްތައްވެސް ބަލި ކުރެވޭ ފެންވަރު ނަޕޯލީ ޓީމްގައި އެބަހުރި" ސައްރި ބުންޏެވެ.

މިފަހަރުގެ ޗެމްޕިއަންސް ލީގުގެ އެންމެ ވަރުގަދަ އެއް ގްރޫޕްގެ ގޮތުގައި ގިނަބަޔަކު ސިފަކުރަމުންދާ މި ގްރޫޕްގައި ނަޕޯލީއާ ސިޓީގެ އިތުރުން ދެން ހިމެނެނީ ޔުކްރެއިންގެ ޝަކްތަރ ޑޮނެސްކް އާއި ނެދަލޭންޑްސްގެ ފޭނޫޑްއެވެ.

މި ގުރޫޕުގެ ފޭވަރިޓުންގެ ގޮތުގައި ބެލެވިފައިވާ ސިޓީ ވަނީ ގުރޫޕް ސްޓޭޖުގައި މިހާތަނަށް ކުޅުނު ދެމެޗުންވެސް މޮޅުވެފައެވެ. އެހެން ކަމުން ސިޓީ އޮތީ 6 ޕޮއިންޓާއެކު ގުރޫޕު އެފްގެ އެއްވަނާގައެވެ. އަދި މިރޭ ސިޓީއާ ދެކޮޅަށް ނިކުންނަ ނަޕޯލީ ގުރޫޕު ސްޓޭޖުގައި މިހާތަނަށް ދެމެޗު ކުޅެފައިވާއިރު، މޮޅުވެފައިވަނީ އެންމެ މެޗަކުންނެވެ. އަނެއް މެޗުން ވަނީ ބަލިވެފައެވެ.

 ޝަކްތަރ ޑޮނެސްކް އަދި ނަޕޯލީ އަށް އެއްވަރަކަށް ޕޮއިންޓް ލިބޭއިރު، ގޯލްގެ ތަފާތުން ގުރޫޕުގެ ދެވަނާގައި އޮތީ ޝަކްތަރ ޑޮނެސްކް އެވެ. ނަޕޯލީ އޮތީ ތިންވަނާގައެވެ. މި ގުރޫޕުގެ އެންމެ ފުލުގައި އޮތީ ކުޅުނު ދެމެޗުންވެސް ބަލިވެ ޕޮއިންޓެއް ނުލިބި އޮތް ފޭނޫޑްއެވެ.

ޔޫއެފާ ޗެމްޕިއަންސް ލީގުގައި މިހާތަނަށް ނަޕޯލީ އަދި ސިޓީ ދެފަހަރެއްގެ މަތިން ވަނީ ބައްދަލުކޮށްފައެވެ. އެއީ 2011 ވަނަ އަހަރުގައެވެ. އޭގެ ތެރެއިން އެއް މެޗު އެއްވަރުވެގެން ނިމުނުއިރު އަނެއް މެޗުގައި ނަޕޯލީން ވަނީ ސިޓީގެ މައްޗަށް ކުރި ހޯދާފައެވެ.

ނަޕޯލީއާއި ސިޓީ ބައްދަލުކުރާ މި މެޗް ކުޅޭނީ ނަޕޯލީގެ ދަނޑުގައި މިރޭ ރާއްޖެ ގަޑިން 23:45 ގައެވެ.