ފިނި މޫސުމުގައި ފަތުރުވެރިކަން ހީނަރުވިޔަ ނުދިނުމަށްޓަކައި، ޓްރެވަލް އޭޖެންސީތަކުން ނަގާ ޓެކްސް ފަސްކުރިކަން މުއިއްޒު ސަރުކާރުން ރަސްމީކޮށް ކަށަވަރުކޮށްދޭން ޖެހޭ: ރިޕޯޓު

ފިނި މޫސުމުގައި ރާއްޖޭގެ ފަތުރުވެރިކަން ހީނަރުވިޔަ ނުދިނުމަށްޓަކައި، ޓްރެވަލް އޭޖެންސީތަކުން ނަގާ ޓެކްސް ފަސްކުރިކަން މުއިއްޒު ސަރުކާރުން ރަސްމީކޮށް ކަށަވަރުކޮށްދޭން ޖެހޭ ކަމަށް ރިޕޯޓުތައް ބުނެފި އެވެ.

ރާއްޖެއަށް ޒިޔާރަތްކުރާ ފަތުރުވެރިންގެ އެންމެ ބާރުބޮޑު ދުވަސްވަރު ކަމަށްވާ ފިނި މޫސުމާ ދިމާކޮށް، ރާއްޖެއިން ބޭރުގެ ޓްރެވަލް ކުންފުނިތަކުން ނަގަން ނިންމި 17 އިންސައްތައިގެ ޓެކުހާ މެދު އުފެދުނު ނުތަނަވަސްކަމާއެކު، ސަރުކާރުން އެ ނިންމުން ފަސްކުރަން އުޅޭ ކަމުގެ އިޝާރާތެއް ވަނީ ދީފަ އެވެ.

ޚަބަރުތައް ބުނާގޮތުން، ރާއްޖެއިން ބޭރުގެ ޓްރެވަލް އެޖެންސީތަކާއި، ޓުއާ އޮޕަރޭޓަރުން އަދި ބުކިންގް ޕްލެޓްފޯމްތަކުން ނަގަން ނިންމި ޓޫރިޒަމް ގުޑްސް އެންޑް ސާވިސަސް ޓެކްސް (ޓީ.ޖީ.އެސް.ޓީ) ފެށުން، 2027 ވަނަ އަހަރުގެ އޭޕްރިލް މަހުގެ 1 ވަނަ ދުވަހާ ހަމައަށް ފަސްކުރުމަށް ސަރުކާރުން ވަނީ ނިންމާފަ އެވެ.

ރާއްޖޭގައި ދާއިމީ އޮފީހެއް ނުވަތަ ވިޔަފާރިއެއް ގާއިމުކޮށްފައި ނުވާ ބޭރުގެ ކުންފުނިތަކުން ވިއްކާ ފަތުރުވެރިކަމުގެ ޚިދުމަތްތަކުން، މިހާރުވެސް ރާއްޖޭގައި ނަގަމުންދާ ޖީ.އެސް.ޓީ ނެގުމަށް ދިވެހި ސަރުކާރުން ވަނީ ރާވާފަ އެވެ.

މި ނިންމުން ބަދަލުކުރަން ސަރުކާރަށް މަޖުބޫރުވީ، އޮކްޓޫބަރު 1 އިން ފެށިގެން މި ޓެކްސް ނަގަން ފަށައިފިނަމަ ރާއްޖޭގެ ޗުއްޓީތަކުގެ އަގު އިންތިހާއަށް ބޮޑުވެދާނެ ކަމަށް ބުނެ ޔޫރަޕްގެ ފަތުރުވެރިކަމުގެ ސިނާއަތުން ދިން އިންޒާރުތަކާ ގުޅިގެންނެވެ.

އިނގިރޭސިވިލާތުގެ އެސޯސިއޭޝަން އޮފް ބްރިޓިޝް ޓްރެވަލް އެޖެންޓްސް (އޭ.ބީ.ޓީ.އޭ) އާއި، ފްރާންސްގެ އެސް.އީ.ޓީ.އޯ އަދި ޖަރުމަނުގެ ޓްރެވަލް އެސޯސިއޭޝަން (ޑީ.އާރް.ވީ) އިން ވަނީ ސީދާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް އިލްތިމާސްއެއް ހުށަހަޅާފަ އެވެ. އެ ޖަމިއްޔާތަކުން ބުނެފައިވަނީ މި ފިޔަވަޅަކީ ބައިނަލްއަގުވާމީ ފަތުރުވެރިކަމުގެ ދާއިރާގެ ފަރާތްތަކާ އެކަށީގެންވާ މަޝްވަރާއެއް ކުރުމެއް ނެތި ނިންމާފައިވާ ނިންމުމެއް ކަމަށެވެ.

ފަތުރުވެރިކަމާ ބެހޭ ޖަމްއިއްޔާތަކުން މިހެން ބުނެފައިވާއިރު، ޚުދު ރައީސުލްޖުމްހޫރިއްޔާ ވިދާޅުވެފައިވަނީ މި ޓެކްސް ތައާރަފް ކުރީ ކަމާ ބެހޭ ފަރާތްތަކުގެ މަޝްވަރާއާއި ދިރާސާތަކުގެ މައްޗަށް ބިނާކޮށްގެން ކަމުގަ އެވެ.

ދިވެހި މީޑިއާތަކުން ރިޕޯޓްކޮށްފައިވާ ގޮތުގައި، މި ޓެކްސް ނެގުން ފަސްކުރިކަން ފަތުރުވެރިކަމާ ބެހޭ ވަޒީރު މިނިސްޓަރު މުޙައްމަދު އަމީން އިއުލާން ކުރެއްވީ ސިނާއަތުގެ އިސް ބޭފުޅުން ބައިވެރިވެވަޑައިގެންނެވި ގައުމީ ފެންވަރުގެ ފަތުރުވެރިކަމުގެ ހަރަކާތެއްގަ އެވެ.

ނަމަވެސް، މިކަމުގައި އޮތް އެންމެ ބޮޑު މައްސަލައަކީ، ޓެކްސް ނެގުން ފަސްކުރިކަން ސަރުކާރުން އަދި ރަސްމީކޮށް ކަށަވަރުކޮށްދީފައި ނުވުމެވެ.

މީގެ ސަބަބުން ބޭރުގެ ޓްރެވަލް ކުންފުނިތައް ތިބީ ވަރަށް ބޮޑު ނުތަނަވަސްކަމެއްގެ ތެރޭގަ އެވެ. ސަބަބަކީ މި ޓެކްސް ނެގުމަށް ކަނޑައަޅާފައިވާ ގާނޫނަށް އޮކްޓޫބަރު 1 ވަނަ ދުވަހުން ފެށިގެން އަމަލުކުރަން ފަށާފައިވާތީ އެވެ.

އޭ.ބީ.ޓީ.އޭ ގެ ޑައިރެކްޓަރ އޮފް އިންޑަސްޓްރީ ރިލޭޝަންސް ސޫޒަން ޑިއަރ، އޮންލައިން ނޫސް ޓްރެވަލް މޯލްއަށް ވިދާޅުވީ، ބޭރުގެ ޓްރެވަލް ކުންފުނިތަކުން ނަގާ އާ ޓެކްސް ފަސްކޮށްފައިވާ ކަމަށް ރާއްޖޭގެ ޓޫރިޒަމް މިނިސްޓަރު ވިދާޅުވި ކަމުގެ މައުލޫމާތު ލިބިފައިވާ ކަމަށެވެ.

އެހެންކަމުން، އެ ޖަމިއްޔާއިން މިހާރު މަސައްކަތް ކުރަމުންދަނީ މިކަމުގެ ރަސްމީ ކަށަވަރުކަމެއް ހޯދުމަށާއި، ދެން ކަންތައް ވާނެ ގޮތުގެ ސާފު މައުލޫމާތު ހޯދުމަށެވެ.

ޔޫރަޕްގެ ޓުއާ އޮޕަރޭޓަރުންގެ ކަންބޮޑުވުން ހަމައެކަނި ޓެކްސްގެ ބޮޑުމިނަކަށް ނޫނެވެ. އެ ފަރާތްތަކުން ވަނީ ބައިނަލްއަގުވާމީ ކުންފުނިތަކަށް މިހާ ކުޑަ ދުވަސްކޮޅެއްގެ ނޯޓިސްއެއް ދިނީ ކީއްވެގެންތޯ ސުވާލު އުފައްދައި، މި ފިޔަވަޅުގެ ސަބަބުން އެޖެންޓުންނަށް ކުރާނެ އަސަރު ސާފުކޮށްދިނުމަށް އެދިފަ އެވެ.

ރާއްޖެއަކީ މިހާރުވެސް މަތީ ފަންތީގެ މަންޒިލެއްގެ ގޮތުގައި މަޝްހޫރުވެފައިވާ ތަނެކެވެ. ރާއްޖެއަށް ޒިޔާރަތްކުރާ ފަތުރުވެރިން އަތުން ހުރުމާއި، ދަތުރުފަތުރުގެ ޚަރަދުތަކަށް އެތައް ހާސް ޑޮލަރެއް ހޭދަވެ އެވެ. މީގެ އިތުރަށް 17 އިންސައްތައިގެ ޓެކުހެއް އިތުރުވުމުން، ބޭރުގެ ކުންފުނިތަކަށް މަޖުބޫރުވާނީ އަގުތައް އުފުލުމަށް ނުވަތަ ރާއްޖެ އިޝްތިހާރު ކުރުމާ މެދު އަލުން ވިސްނުމަށެވެ.

މި ނުރައްކާ އެންމެ ބޮޑީ އިންޑިއާ ކަނޑުގެ ގައުމުތަކަށް ފަތުރުވެރިންގެ ޑިމާންޑް އެންމެ ބޮޑުވާ ފިނި މޫސުމުގެ ދުވަސްވަރުގަ އެވެ.

މިނިސްޓަރު އަމީން ވިދާޅުވި ގޮތުގައި، 2025 ވަނަ އަހަރު ރާއްޖެއަށް ރެކޯޑް އަދަދެއް ކަމަށްވާ 2.25 މިލިއަން ފަތުރުވެރިން ޒިޔާރަތްކުރާނެ ކަމަށް ބެލެވެ އެވެ. އަދި މިއަހަރުގެ މިހާތަނަށް އެއް މިލިއަން ފަތުރުވެރިން ވަނީ އުންމީދު ކުރި ވަރަށް ވުރެ އަވަހަށް ރާއްޖެ އައިސްފަ އެވެ.

ނަމަވެސް، އަގުތައް ބޮޑުވުމުގެ ސަބަބުން ފަތުރުވެރިން އައުން މަދުވާން ފަށައިފިނަމަ، މިފަދަ ޓެކުހެއް ނެގުމުގެ ބޭނުމެއް ނޯންނާނެ އެވެ. ހާއްސަކޮށް، "ވިޒިޓް މޯލްޑިވްސް އިޔަރ 2027" އަށް ސަރުކާރުން ތައްޔާރުވަމުންދާއިރު، މިއީ މުއިއްޒު ސަރުކާރުން ދުނިޔެއަށް ދެވޭ ވަރަށް ފުށުއަރާ މެސެޖެކެވެ.