ފަތުރުވެރިކަމުގެ ސިނާއަތުގައި ހުރި ގޮންޖެހުންތަކަށް ހައްލު ހޯދުމަށް ސަރުކާރުގެ ވަޒީރުން އެ ދާއިރާގެ އިސްވެރިންނާ ބައްދަލުކުރައްވައިފި
5 އޮކްޓޯބަރު 2026 | ހޯމަ 20:32ފަތުރުވެރިކަމުގެ ސިނާއަތަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމަށާއި 2027 ވަނަ އަހަރުގެ އަމާޒުތަކަށް ވާސިލުވުމަށްޓަކައި، ސަރުކާރުގެ ވަޒީރުންނާއި ދާއިރާގެ އިސް ވިޔަފާރިވެރިން މުހިންމު މަޝްވަރާތަކެއް ބާއްވައިފި. މި ބައްދަލުވުމުގައި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުކުރެވޭނެ ގޮތްތަކާ ގުޅޭގޮތުން ވެސް ވަނީ މަޝްވަރާކޮށްފައި
ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން އާއި ކަމާގުޅޭ އެހެނިހެން ވުޒާރާތަކުގެ ވަޒީރުންނާ އެކު، ފަތުރުވެރިކަމުގެ ސިނާއަތުގެ އިސް ބޭފުޅުންނާ ހޯމަ ދުވަހު ބައްދަލުކުރެއްވުން | ޓޫރިޒަމް މިނިސްޓްރީ
ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން އާއި، ކަމާގުޅޭ އެހެނިހެން ވުޒާރާތަކުގެ ވަޒީރުންނާ އެކު، ފަތުރުވެރިކަމުގެ ސިނާއަތުގެ އިސް ބޭފުޅުންނާ ހޯމަ ދުވަހު ބައްދަލުކުރައްވައިފި އެވެ.
ޓޫރިޒަމް މިނިސްޓްރީން ބުނީ، މި ބައްދަލުކުރެއްވުމަކީ ފަތުރުވެރިކަމުގެ ދާއިރާގެ ކުރިއެރުމަށް ސިލްސިލާކޮށް ބާއްވަމުން އަންނަ މަޝްވަރާތަކުގެ ތެރެއިން ބޭއްވުނު މުހިންމު ބައްދަލުކުރެއްވުމެއް ކަމަށެވެ.
މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރެވުނީ ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުކުރުމަށާއި، 2027 ވަނަ އަހަރަށް ސަރުކާރުން ކަނޑައަޅާފައިވާ އަމާޒުތަކަށް ވާސިލުވުމަށް ކުރަންޖެހޭ މަސައްކަތްތަކުގެ އިތުރުން، މިހާރު މި ސިނާއަތަށް ކުރިމަތިވެފައިވާ ގޮންޖެހުންތަކަށް އަވަސް ހައްލުތަކެއް ހޯދުމާ ގުޅޭގޮތުން ކަމަށް ޓޫރިޒަމް މިނިސްޓްރީން ބުނެ އެވެ. މި ބައްދަލުކުރެއްވުމުގައި ސިނާއަތުގެ ތަޖުރިބާކާރުންގެ ލަފަޔާއި މަޝްވަރާގެ މަތިން މުހިންމު ލަނޑުދަނޑިތަކަކަށް އެއްބަސްވެވުނު ކަމަށް ވެސް ބުނެފައިވެ އެވެ. އަދި މިއީ ފަތުރުވެރިކަން ކުރިއެރުވުމަށްޓަކައި ކަމާގުޅޭ ފަރާތްތަކާ ގާތުން މަސައްކަތްކުރުމަށް ސަރުކާރުންދޭ ހާއްސަ އަހަންމިއްޔަތުކަން ހާމަވެގެންދިޔަ ކަމެއް ކަމަށް ބުނެފައިވެ އެވެ.
މި ބައްދަލުކުރެއްވުމުގައި ފަތުރުވެރިކަމުގެ ދާއިރާގެ އެންމެ ތަޖުރިބާކާރު އަދި ފުންނާބުއުސް ވިޔަފާރިވެރިން ބައިވެރިވެވަޑައިގެންނެވި އެވެ. އޭގެ ތެރޭގައި ކްރައުން ކުންފުނީގެ ޗެއަރޕާސަން ހުސައިން އަފީފް (ޗަމްޕާ އަފީފް)، ސަން ސިޔާމް ގްރޫޕުގެ ވެރިޔާ އަހްމަދު ސިޔާމް މުހައްމަދު އަދި ވިލާ ކުންފުނީގެ މެނޭޖިންގ ޑިރެކްޓަރ އިބްރާހީމް ސިޔާދު ޤާސިމް ހިމެނިވަޑައިގަންނަވަ އެވެ.
ފަތުރުވެރިކަމާ ބެހޭ ވަޒީރާއި ކަމާ ގުޅުން ހުރި އެހެން މިނިސްޓްރީތަކުން، އިންޑަސްޓްރީގެ އިސްވެރިންނާ މި ބައްދަލުކުރެއްވީ ޓޫރިސްޓުންނަށް ރާއްޖެއިން ބުކިން ހަދައިދޭ އޮންލައިން ބުކިންގ ޕްލެޓްފޯމްތަކާއި، ބޭރުގެ ޓުއާ އޮޕަރޭޓަރުންނާއި ޓްރެވަލް އެޖެންޓުންގެ އަތުން ޓީޖީއެސްޓީ ނަގާ ގޮތަށް ގާނޫނަށް ގެނައި ބަދަލުތަކަށް އިތުރު އިސްލާހުތަކެއް ގެންނަން ސަރުކާރުން ނިންމާފައިވާ ދަނޑިވަޅެއްގަ އެވެ.
ޓެކްސްއާ ބެހޭ ގާނޫނަށް މިދިޔަ މަހު ގެނެވުނު އިސްލާހު ތަސްދީގުކުރުމާ ގުޅިގެން، ރާއްޖޭގެ ފަތުރުވެރިކަމުގެ ދާއިރާގެ ބޭފުޅުންނާއި ބޭރުގެ ޓުއާ އޮޕަރޭޓަރުންގެ ފަރާތުން ބޮޑެތި ކަންބޮޑުވުންތަކަކާއި ޝަކުވާތަކެއް ވަނީ ފެންމަތިވެފަ އެވެ. އަދި މި ބަދަލުތަކާ ގުޅިގެން ޔޫރަޕްގެ ބައެއް ޓުއާ އޮޕަރޭޓަރުން ރާއްޖެއަށް ބުކިން ހެދުން މެދުކަނޑާލާފައިވާކަން ވެސް ވަނީ ފާހަގަކުރެވިފަ އެވެ.
ގާނޫނަށް މިފަދަ ބަދަލެއް ގެނައުމުގެ މައިގަނޑު މަގުސަދަކީ އޯފްޝޯ ބުކިން ޕްލެޓްފޯމްތަކާއި ރާއްޖެއިން ބޭރުގެ އެޖެންޓުން ދޭ ހިދުމަތްތަކުން ޖީއެސްޓީ ނެގޭނެ އުސޫލުތައް އެކަށައަޅައި، ޓެކްސް ނެގުމުގެ ނިޒާމު އިތުރަށް ހަރުދަނާކުރުމަށް ކަމަށް ބުނެފައިވާއިރު، މި ބަދަލުތަކާއެކު ޓެކްސް ނަގަން ފަށައިފިނަމަ، ބޭރުގެ ޓްރެވަލް އެޖެންޓުންގެ އަތުން ލިބޭނެ ކަމަށް ލަފާކުރާ 299.3 މިލިއަން ރުފިޔާ އާއި ފޮރިން ޓުއާ އޮޕަރޭޓަރުން ދައްކާނެ ކަމަށް ބެލެވޭ 1.3 ބިލިއަން ރުފިޔާއާއެކު، ދައުލަތުގެ އާމްދަނީއަށް އަހަރަކު ގާތްގަނޑަކަށް 1.6 ބިލިއަން ރުފިޔާ އިތުރުވާނެ ކަމަށް ވަނީ ލަފާކޮށްފަ އެވެ.
