މަރުގެ އަދަބު ތަންފީޒު ނުކުރެވިއްޖެނަމަ ރައީސް މުއިއްޒުވެސް ވާނީ ފިނޑިއަކަށް: ޝުޖާއު
16 ނޮވެމްބަރު 2026 | ހޯމަ 05:48ރާއްޖޭގައި މަރުގެ އަދަބު ތަންފީޒުކުރުމާ ގުޅޭ ބިލަށް މަޖިލީހުގައި ބަހުސްކުރައްވަމުން، މީގެ ކުރީގެ ސަރުކާރުތަކުން އެކަން ކޮށްފައިވަނީ ނަމެއްގައި ކަމަށް ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެ. ނަމަވެސް މި ސަރުކާރުން އެކަން ކުރާނެ ކަމުގެ ޔަގީންކަން އޮތްކަން ފާހަގަކުރައްވައި، މާތް ﷲ އަންގަވާފައިވާ ހުކުމްތައް ތަންފީޒު ނުކުރާނަމަ އެއީ އަނިޔާވެރިކަމެއްގެ ގޮތުގައި އޭނާ ސިފަކުރެއްވި

ބާރަށު ދާއިރާގެ މެންބަރު އިބްރާހީމް ޝުޖާއު | ރާއްޖެއެމްވީ
މަރުގެ ހުކުމް ތަންފީޒު ނުކުރެވިއްޖެނަމަ ރައީސް ޑރ. މުހައްމަދު މުއިއްޒު ވެސް ވެވަޑައިގަންނަވާނީ ފިނޑިއަކަށް ކަމަށް ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެ އެވެ.
ރައްޔިތުންގެ މަޖިލީހުގައި މަރުގެ އަދަބު ތަންފީޒު ކުރުމާ ގުޅޭ ބިލަށް ބަހުސް ކުރައްވަމުން ޝުޖާއު ވިދާޅުވީ މިދިޔަ ސަރުކާރުތަކުން މަރުގެ ހުކުމް ތަންފީޒު ކުރާ ވާހަކަ ދައްކާފައިވަނީ ނަމެއްގައި ކަމަށެވެ. އެހެންނަމަވެސް މި ސަރުކާރުން އެގޮތަށް ކަންކަން ނުކުރާނެކަމަށް އޭނާ ވިދާޅުވި އެވެ.
ޝުޖާއު ވިދާޅުވީ، ކިތަންމެ ރީތި ސޫޓެއް ލައިގެން ހުއްޓަސް، މާތް ﷲ އަންގަވާފައިވާ ހުކުމްތައް ތަންފީޒު ނުކުރާނަމަ އެމީހަކު ވާނީ ހަމަ އަނިޔާވެރިއަކަށް ކަމަށެވެ. މިއީ ދެބަސްވުމެއް އޮތް ކަމެއް ނޫން ކަމަށް އޭނާ ވަނީ ފާހަގަކުރައްވާފަ އެވެ.
ރައީސް މުއިއްޒު އަށް ވެސް މަރުގެ ހުކުމް ތަންފީޒު ނުކުރެވިއްޖެނަމަ، ރައީސް މުއިއްޒު ވެސް ވެވަޑައިގަންނަވާނީ ފިނޑިއަކަށް ކަމަށް ޝުޖާއު ވަނީ ވިދާޅުވެފަ އެވެ. އަދި މަރުގެ އަދަބު ތަންފީޒު ކުރުމާ ގުޅޭ ބިލެއް ސަރުކާރުން ހުށަހަޅާނީ ވެސް މިކަން ތަންފީޒު ކުރުމުގެ ކެރުންތެރިކަން ރައީސް މުއިއްޒުގެ ހުންނެވީމައި ކަމަށް އޭނާ ގަބޫލުކުރައްވާ ކަމަށް ވިދާޅުވި އެވެ.
މަރުގެ އަދަބު ތަންފީޒު ކުރުމާ ގުޅޭ ބިލަކީ މިހާރު ރައްޔިތުންގެ މަޖިލީހުގައި ބަހުސް ކުރަމުން އަންނަ މުހިންމު ބިލެކެވެ. މި ބިލު ފާސްވެއްޖެނަމަ، މަރުގެ ހުކުމް އިއްވާފައިވާ މީހުންގެ އަދަބު ތަންފީޒު ކުރުމުގެ މަގު ފަހިވެގެންދާނެ އެވެ.
ދިވެހިރާއްޖޭގައި މަރުގެ އަދަބު ތަންފީޒު ކުރުމުގެ މަސައްކަތް ކުރިއަށް ގެންދިއުމަކީ އެކި ސަރުކާރުތަކުން ވަރަށް ގިނަ ފަހަރު ވައުދުވެފައިވާ ކަމެކެވެ. ނަމަވެސް މިހާތަނަށް އެ ވައުދުތައް ފުއްދިފައެއް ނުވެ އެވެ.











